الصفقة

كذبة

دخلت للفيلا..وانا مقررة نقتل فيا كاع الاحاسيس والمشاعر..معرفتش علاش جاني الجوع..دخلت للكوزينة ..كليت وكليت وكليت بحال الى شهر محرومة من الاكل...
جات هند لي لقاتني مزال تنتعشى وجلسات تتعشى معايا:شفتي المحامي ؟؟شنو قال ليك؟؟شنو درتي؟؟
أنا:صافي أهند تنتسنى غير سي بناني يرد عليا!!
هند:علاش شنو دخل عمي فهادشي؟؟!
انا تنضحك بتهكم:الا ماشي بابا!!سي بناني راه راجلي حتى هو كنيتوو بناني!
هند:ايواشنو غادي تقولي لعمي؟؟ولا باغا تزوجي بلا خباروو!!!
انا:هذا هو المشكل..لي مزال ملقيت ليه حل..عافاك عاونيني اهند..شنو نقوليه ..وكيفاش؟؟
هند:خاصنا نفكروا مزيان فشي حاجة متخليش عمي يشك حيت الى شك فشي حاجة راه مشا فيها.
أنا :راه هادشي لي خالعني ..ياربي تعاوني ياربي..!!
هند:ياربي تدير لي فيها الخير..
بقينا ساهيين وتنخمموا واحد الشوية:هند جاتني واحد الفكرة..غاديا نقول لبابا انني تعرفت على واحد الشخص شحال هدي ..ومنين عرف شنو وقع لينا قرر يساعدنا..وبالمقابل نخدم معاه..ونخلي موضوع الزواج حتى لمن بعد ونقولو ليه..
هند:وفاش تمشي عند راجلك..شنو تقولي لعمي..نقوليه راه داك السيد ففرنسا..انمشي نخدم معاه ونكمل قرايتي باش مايعارضش..
تدوز شي ايام وديك الساعة نقوليه راه ارتاحيت ليه وبغينا نتزوجوا المهم من تما بحن الله
هند:والله الى انا ممرتاحاش لهاد الكدوب كامل..خايفة على عمي والله
انا:انا علاش دايرة هادشي كامل راه غير خوف على بابا..ان شاء الله ربي مغاديش يخيبني..ويدير ليا تاويل ديال الخير..
طلعت لبيتي..وبصعوبة كبيرة استسلمت للنوم..ونفس الاحلام والكوابيس لي تتراودني كل ليلة..نفس الرعب وخفقان القلب..
قفزت من بلاصتي وكانت الشمس مضوية..شفت الساعة كانت ل10 ..نضت دوشت..وصليت..لبست عليا ونزلت نفطر

نزلت لتحت نفطر لقيت ماما فالدار الخدمات فالتخمال والتوجاد فالكوزينة شنو واقع لاش هادشي كامل..ماما غير شافتني ضحكات:حبيبة صباح الخير
أنا:صباح النور ماما أش واقع ..مالكم؟؟
ماما:حبيبة باباك راه غدا ايخرج ان شاء الله ايوا خاصنا نبداو نوجدوا راه ايبداو يجيوا الناس يوصلوا ليه..
عنقتها وانا فرحانة:على سلامتو اماما دارو توحشاتوو
ماما بحزن:معرفنا هاد الدار واش بقات ديالو ولا لا راه البنك غادي يحجز على كلشي..راني ابنتي تنخمم فباك فاش يحيدوا لينا الدار لي عشنا وكبرنا فيها
انا:حتى حاجة مغادي تمشي ..تنهضر بكل تقة..ماما على هاد الموضوع بغيتك..واش ممكن نهضروا؟؟
ماما:واخا بنتي ياك لباس!!
أنا:غير الخير الحبيبة ديالي
دخلنا للمكتب وبقيت نعاود ليها الموضوع من الاول حتى الاخير..وطبعا ماشي الحقيقة..حيت عارفة ماما مستحيل تقبل واخا منعرف شنو
ماما بقات مستغربة:واش ابنتي باقي شي واخد بهاد النبل كامل..ممتيقاش ابنتي..واش متأكدة من هادشي لي تتقولي؟؟ياكما خدام فالحشيش او الغبرة وبغاك تخدمي معاه؟؟
انا :لا ماما شنو تتقولي هو انسان محترم وانا عارفاه مزيان مدة تنعرفو و عارفة اخلاقة وخدمتو لي فضو!وزيدون حنا غنسددوا ليه فلوس على شكل اقساط..ماشي غايصدق علينا..!!
صراحة خلعاتني ماما..علاش ميكونش كلامها بالصح ويكون غبار او بائع مخدرات ..ونلقا راسي فالحبس..طردت هاد الافكار من راسي:شنو غايدير بائع مخدرات بيا ؟؟فاش غانفعوا انا!!وعلاش ايبغي يتزوح بيا..؟؟
قاطعاتني ماما:ايوا على ربي يكون هادشي صحيح ..عمرنا ننساو خيروو..!
انا:دابا البقية عليك بغيتك تقوليها لبابا وتقنعيه باش ميرفضش ..راكي عارفاه ايرفض نخدم مع شي حد..راه غير مدة وصافي..
ماما:ان شاء الله ابنتي..
بورطابلي تيصوني هدي نمرة المحامي خرجت للجردة نجاوب:ألوو سي العلوي صباحك مبروك
المحام:صباحك مبروك انسة ياسمين..نتمنى تجي عندي فاقرب وقت حيت وصل الجواب..ديال سي يوسف
انا:اوكي شويش ونكون عندك..
هزيت صاكي..وطيارة عندوو
دخلت شافني اتفاجأ..زعما وصلت بزربة..غادي يكون متصور انني ميتة على هاد الزواج محاسش بالنار لي فالداخل ديالي
محام:مرحبا انسة تفضلي
أنا:شكرا اشمن جديد كاين..!!؟
محام:سي البناني موافق على شروطك بشرط متفوتيش 15 يوم من ورا فاش يخرج باباك من المستشفى شنو رأيك
أنا :واخا موافقة
محامي:على بركة الله وجدي هاد الوراق باش نديروا عقد الزواج وكدلك توقعي على الوتيقة لي تتلتزمي فيها بشروط سي يوسف..وغادي نعطيك الوراق الخاصيين باباك..
أنا:اوكي يومين ونوجد ليك كلشي ..قبل ما يجي الانذار الاخير ديال البنك..تعمدت نقوليه هكدا باش يعرف ان هاد الزواج غير على قبل بابا..

خرجت وخليتوو..هاد المحامي كان بحال عزرائيل بالنسبة ليا كرهتوا ..كثر ما كرهت هاد "يوسف البناني"..