Lulugu-lugong pumanhik sa hagdan si Ann. Nang bumaba ito ay dala na nito ang ilang maleta. Kahit paano ay nakadama siya ng awa para dito.
Matagal ng nakaalis ang sasakyan nito ay naroon pa rin sila sa sala.
Si Tita Carmela ang bumasag sa katahimikan. Kagaya ni Daddy Julius, hindi rin niya namalayan ang paglapit nito. "Ngayong napatunayan mo ng totoo ang ipinagtapat namin ng daddy mo sa iyo, Samuel, siguro ay panahon na para ayusin mo ang naging pagkakamali mo. Malaki ang pagkukulang mo kay Devon. Mag-usap kayo." Pagkasabi niyon ay pumanhik na ito sa hagdan. Sumunod dito si Daddy Julius na binigyan muna siya ng nagpapaunawang tingin.
Matagal na umiral ang katahimikan ng mapagsolo sila ni Samuel. Nagpapakiramdaman pa kasi sila.
Hindi na marahil ito nakatiis dahil ito na ang bumasag niyon. "P-patawarin mo ako, Devon. Hindi naging sapat ang pagtitiwala ko sayo. Actually, hindi ko alam kung paano ako magsisimula para maituwid ang lahat ng pagkakamali ko."
"Paano mo nakausap si Clifford? at bakit mo naisipang kausapin siya?" tanong niya.
"Ang totoo, hindi totoong nagkausap kami ni Clifford. Paano ko makakausap ang isang taong matagal ko ng kinasusuklaman??"
"H-hindi ko maintindihan..."
"Noong ngabalik si Tita Carmela mula sa firm ninyo at ipinagtapat sa akin ang totoong nagyari ayon sa salaysay mo, gusto ko ng paniwalaan ang lahat. Pero bumabalik sa alaala ko ang pag-amin mo noon kaya isang bahagi ng isip ko ang tumutol na maniwala sa sinabi ni Tita."
"Nasabi ko lang naman iyon noon dahil sa sama ng loob. Masakit iyon para sa akin dahil ako na nga ang biktima ay ako pa ang naging masama," mangiyak-ngiyak na sabi niya.
"I'm really sorry. Nabulagan ako ng labis na paninibugho. Pero ng muli kang bumalik dito, naobserbahan kong sa tuwing nagkakaharap kayo ni Ann ay parang natatakot siya habang ikaw naman ay laging parang nanunumbat ang mga mata. At noong nagtalo kayo sa pool, pilit ko siyang pinaamin pero matigas siya. Kaya nag-isip ako ng paraan. Noon pa kasi ako naghihinala. Ang ginawa ko kanina ay isang paraan para mahuli ko siya. Ginawa ko iyon dahil hirap na hirap na ang kalooban ko."
