شفت هالعيون الحلوه والله مدّا اكدر اتحمل فراگج اني سألته صدگ استلمت النتيجه جاوبني نجحت لخاطرج لان امي وعدتني بس انجح تجي تربط موقف ويا اهلج تحجز لحد ما اتخرج اني حسيت نفسي اريد أطير من سمعته هيج ديحجي
غمزلي حضري نفسج اسبوع الجاي تجي عليكم انطي خبر لامج /وثواني شاف ماكو احد بالممر رفع بطن ايدي بوسها جريتها بسرعه گتله اول وآخر مره تسويها أزعل عليك جاوبني اني ترى صابر عليج صار سنه الا كم شهر لو اريد افرغ المشاعر الي كابتها سكت مكمل حسيته تراجع يكمل الي راد يحجي
اني انطيت خبر لامي اكو ولد رايدني ومن يتخرج يخطبني بس أمه راح تجي تثبت موقف وتحجي بالموضوع وصدگ أمه اجتي وحجت ويا امي ابني يحبها ويريدها بالحلال بس يتخرج نخطب ونگطع مهر بسرعه امي حبت أمه وگلتلها ان شاء الله تصير من قسمته
امي حسيتها فرحت لان متحب زواج الاقارب علمود النسل تصير بي تشوهات مرات أو حالات مرضيه وبالفعل بت عمي الي ماخذه ابن عمي عدها طفل عنده متلازمة داوون وبنفس الوقت بيت عمي أهل بهاء زادوا بالتلميحات كدام امي وامي تعرف ما أريده
امي نقلت الموضوع لابويه ذكرت سابقا اني منطيني ثقه عمياء إجى بابا گلي تعالي للحديقه دنسولف رحت ورا كعدنا گلي انت تعرفين اكو ٢ من ولد عمج يريدوج بس اني مستحيل أجبرج على احد لذلك اريد تحجيلي على الولد اذا اعرف اكو علاقه بينكم ما اوافق عليه اني هم حجيت لابويه بس متعمقت بالتفاصيل مجرد ولد حباب ويخاف عليه وصدگ بكلامه وبَقى محافظ على الحدود بينا حتى محد يعرف بالقسم گلي انت رايدته استحيت أجاوبه گتله بابا ما الگه احسن منه اجاني من الباب بابا تفهم
بقى ابويه يسأل عليهم فتره وعرف ابو ابراهيم وين يشتغل وطلع اكو صديق مشترك بينهم
رجعنا للدوام اني ٢ هو ٤ بهالفتره عشت احلى ايّام عمري ويا يخاف عليه من ألهوا الطاير ومحاوطني وين ما اروح اشوفه حتى عفت خطي القديم وسجلت بخط باص وهو بقى ينتظر الى ان يحرك الخط يله يروح وبدا يدرسني بعض المواد من احتاج بدون محد يشك اكو شي بيناتنه لان الكل يعرف احنا بنفس الكروب وكروبنا علاقتهم كلش قويه وبقوا فقط ٤ أشخاص يعرفون شنو يربطنا وهو حبيبي بقى محافظ على المسافات حتى متجيني حجايه بس هو صار اجرء بالحجي مرات من يدرسني يبقى صافن عليه اباوع عليه يگلي تعرفين انت لو هسه مرتي العب بيج طوبه حتى قرايه ما اخليج تقرين أجاوبه همزين نبهتني حتى ما اقبل بيك الا من اتخرج گلي اذا تريدين اموت سويها جاوبته اشاقى وياك اني اتمني الأيام تمر حتى نلبس الحلقات ونگطع مهر وبعد ما اخاف من حجي الناس ولا اخاف احد يدري بمشاعرنا .هو صافن بوجهي من دا احجي ويا من خلصت حجي گلي ليا اذا اطلب منج طلب بسيط تسوي جاوبته اذا اكدر عليه گلي اريد اشوف خطوط ايدج متباعده لو ملزوگه گتله أهو انت تؤمن بهالخرافات گلي اي اريد اشوفها اني هم مديت أيدي لزمها سوه نفسه دشوف ما احس الا شفايفه على أيدي يبوس بيها اني جريتها بسرعه گتله ترى محلو هيج انت وعدتني جاوبني مبتسم ترى فرغت بهالبوسه مشاعر اني وجهي صار احمر وگلبت الموضوع هو يضحك
