رواية|| فى الحلال

الحلقه الثانيه والاربعون

السلام عليكم
نبدأ بِسْم الله  :

- معلش يا سلمي علشان فاروق عمال يتصل علي جوزك كتير بس هو مش بيرد وكنا عاوزين نعرف عمل إيه في التثبيت ؟

قالتها نهي عندما إتصلت علي سلمي لتسألها عن أمر التثبيت الخاص بشركة إسلام ، قالت سلمي بعدم فهم :

- تثبيت إيه ؟

أجابتها علي الفور :

- إيه يا سلمي بتهرجي ؟!! النهارده واحد عشره يا بنتي والمفروض إن جوزك كان هيتثبت !! معقوله متعرفيش ؟

إتسعت عينا سلمي وقالت بذهول :

- أوبــــس تصدقي نسيت خالص !!

تنهدت بحزن وقالت :

- أخص عليكي يا سلمي في حد ينسي حاجه زي كده برضو ، طيب يلا إسألي جوزك بسرعه وقوليلي

تنحنحت بإحراج وقالت :

- إسلام مش موجود دلوقتي يا نهي ، بإذن الله هتصل بيكي بكره وأقولك اللي حصل بالظبط

- ماشي يا سلمي هستني تليفونك ، السلام عليكم

- وعليكم السلام ورحمة الله وبركاته

_________________________________

إرتمت سلمي علي الفراش وظلت تنظر للهاتف بذهول ، شردت قليلا ثم قالت هامسه :

- معقوله أنسي حاجه زي كده ؟!! طب يا تري حصل إيه ؟ طب هو ممكن اللي إسلام عمله النهارده ده كان بخصوص الموضوع ده ؟ طب بس هو إتخانق معايا علشان حكاية أستاذ سيد ده

نظرت للجانب الآخر وقالت بقلق :

- طب هو أصلا إيه اللي جابه المدرسه عندي ؟ وإيه اللي رجعه من الشغل بدري النهارده بالذات ؟ هو ممكن يكون متثبتش وعلشان كده خرج بدري ؟ طب بس حتي لو متثبتش إيه اللي هيرجعه بدري ؟

تحسست وجهها وقالت بتوتر :

- معقوله يكون إتخانق معاهم بسبب الموضوع ده ؟ أيـــــوه أكيد إتخانق معاهم لانه كان بيقولي مش هستحمل الظلم أكتر من كده ، وممكن كمان يكون خاف ييجي البيت لوحده ليعمل في نفسه حاجه فقرر ييجي ياخدني وشاف اللي شافه بقي ..

تنهدت بعمق ونظرت للمرآه قائله بصرامه :

- أيــوه أكيد ده اللي حصل ، يعني هو متخانقش معايا بسبب موضوع أستاذ سيد ده لانه بيقول مكانش شايف كويس أصلا ، أكيــــــد من الضغط اللي عليه مقدرش يمسك نفسه لما شافني انا كمان بعمل كده فراح مطلعه فيا انا بقي ، يـــــــــاه يا إسلام شيلت ده كله جواك ومقولتليش ليه ؟

ثم نظرت لذراعها بحزن وقالت :

- هان عليك تعمل فيا كده يا إسلام ؟ هان عليك تخوفني منك بالطريقه دي ؟!!