رواية|| فى الحلال

ا لنهايه

__

- اااااااااااااااااااااااااااااااااااااااااااااااه

إنتفض إسلام من مكانه وهو يصرخ بخوف بينما عادت هند للوراء بفزع وقالت :

- يا إسلام إنت بتستعبط !! خضيتني إيــــه ده !!

أخذ ينظر حوله بذهول وقال :

- هو في إيه ؟ وإيه اللي جابك هنا ؟!!

نظرت له بغضب وقالت :

- بطل إستهبال مش ناقصاك دلوقتي ، وخد موبايلك أهو علشان أنا جبت أخري خلاص

ألقت الهاتف أمامه وكادت أن تغادر بينما قال هو بعدم فهم :

- هنــد إستني !! هو في إيه ؟ وموبايل إيه ده ؟ أنا مش فاهم حاجه ؟!!

زفرت بملل وقالت :

- صاحبك عمال يتصل بقاله كتيــر أوووي لحد ما كرهت نفسي وعماله أصحي فيك بقالي سنه وإنت ميت إيه ده بقالك سنين منمتش ، خد بقي رد عليه علشان أنا زهقت

فتح فمه ورفع حاجبه وإتسعت عيناه وهو يقول :

- صاحبي مين ؟ هو في إيه ؟!!

نظرت له بضيق وقالت بتأفف :

- صاحبك محمد يا إسلام هيكون مين يعني ؟!! خد كلمه بقي علشان إتصل كتير بعد ما إنت نمت وماما ردت عليه وقالتله إنك نايم ومن ساعة كده قعد يتصل تاني كتيـــــر أوووي وانا زهقت بس إتكسفت أقفل الموبايل وكل شويه أدخل أصحيك علشان ترد وإنت مفيش فايده

قالت جملتها الأخيره وذهبت علي الفور وضربت الباب خلفها بشده ..

نظر إسلام لهاتفه بذهول وقال :

- محمد إزاي يعني ؟ هو إيه اللي بيحصل ؟!!

ثم أمسك هاتفه وضغط علي زر الإتصال فوجد المتصل الآخير يدعي " أبو شعر مسبسب " فإنتفض من مكانه علي الفور وألقي الهاتف بخوف وقال :

- إيــه ده في إيه ؟ محمد الله يرحمه أنا غيرت إسمه من زمان

ثم نظر لغرفته وقال متعجبا :

- هو أنا إيه اللي جابني هنا ؟

نظر بجواره وقال :

- وفين سلمي ؟

تحسس وجهه بتعب ثم إتسعت عيناه فجأة وشهق بخوف وقال :

- وفين اللحيه ؟

أزاح الغطاء عن نفسه ونهض من مكانه ونظر للمرآه وقال :

- مين ده ؟ وإيه اللي بيحصل هنا ؟ وفين إيدي المتعوره ؟!!

تذكر كلمات هند فعاد لفراشه مره آخري وأمسك هاتفه بخوف وإتصل علي " أبو شعر مسبسب " ووضع الهاتف علي اذنه بتوتر وسمع شخصا يقول :

- علي فكره يا إسلام إنت بتستعبط وأنا غلطان أصلا إني فكرت أقولك علي حاجه ، عموما البرنامج هيتعاد الساعه 2 بليل لو عاوز تتفرج إتفرج ولو مش عاوز براحتك وبرضو شكرا علي الإهتمام ، يلا سلام