POETRY COMPILATION

Mahal

Sa ilalim ng liwanag ng buwan,

Sa gitna ng paglubog ng araw ay ang paglundo ng kama

Paglundo hudyat ng aking paglubog,

Paglubog na naging dahilan kung bakit pinili kong lumubog

Ang kama na siyang nagsisilbing kumunoy na humihigop sa akin,

Ang kama na siyang humihigop sa bawat luhang namamalisbis dahilan ng masidhing damdamin

Damdamin na hinubog ng mga alaala,

Alaalang binuo nating dalawa

Damdamin na nagbigay sa'kin ng isiping magiging isa ang langit at lupa

Ikaw ang langit, ako ang lupa

Lupang sa'yo lamang tumitingala

Kailan kaya magiging isa ang tibok ng puso nating dalawa?

Titingnan mo pa kaya ako gaya ng pagtingin mo sa'kanya?

Ibig ko mang ibigay sa'yo ang lahat,

Hindi ko magagawa 'pagkat para sa'yo siya na ang sapat

Kaya't, mahal, sasabihin ko sa'yo ang salitang 'mahal kita'

Mahal kita kahit mahal mo siya,

Mahal kita kahit mahal ka niya,

Mahal kita kahit may mahal kang iba,

Mahal kita kahit nagmamahalan kayong dalawa,

Mahal kita kahit mahalin man ako ng iba

Mahal kita, mahal, ngunit kahit hatakin ko man ang mundo palapit sa araw ay balewala

Mahal kita ngunit kahit magliwanag man ang mundo siya pa rin ang iyong makikita

Mahal kita kahit ang sakit-sakit na

Mahal kita kahit wala na akong magagawa

Mahal kita, mahal...ipagpaliban man ang paglubog ng araw,

Pahintuin man ang pagliwanag ng buwan

Huminto man ang pag-ikot ng mundo,

Ang pagmamahal ko sa'yo ay mananatiling totoo.