Duwag
Kahit isang beses lang, gusto kitang kabigin
Ikulong sa mga braso ko, matatawag na akin
Kahit isang saglit, maramdaman mo sana
Pag-ibig kong hindi ko man lang naipadama
Kahit ngayon lang, gusto kitang hawakan
At ang labi mo’y nais ko sanang mahagkan
Mga mata’y sa akin lamang nakatitig
Parang noon, akin ang ‘yong pag-ibig
Huli na ako, patawad kong hindi kita nasalo
Pagkat ako’y duwag sa nararamdaman ko
Napalitan na ng lamig, wala na ‘yong init
Tuluyang naglaho, kay saklap ng sinapit
Ang puso mo’y nakalaan na para sa iba
At ako ngayo’y unti-unting nangungulila
Wala akong ginawa at ika’y aking nasaktan
Akala ko noon, isa ka lamang kaibigan
Pinilit kitang limutin, iniwan kita sa ere
‘Di sukat akalain, ganito ang mangyayari
Pagbalik ko’y iba na ang nagmamay-ari
Ng puso mong sa akin mo binigay dati
Pinilit kong ngumiti sa iyong harapan
Ibang kamay ang ‘yong hinahawakan
Ibang bisig ang iyong yakap-yakap
At ibang tao ang ‘yong hinahanap
Wala kang sinambit, ‘yun ang mas masakit
Naging manhid sa dulot kong puro sakit
Hindi ako duwag pero ibabaubaya na kita
Hanggang dito na lang ako, paalam na
BINABASA MO ANG
PasiliP (Poetry Compilation)
Poesia"Mga pighati.. Mga dalangin... Sa tinta idinaan.. Ibinulong sa hangin..." ●Plastik Ka Talaga ●Ikatlong Pahina *Ang ibang tulang nakapaskil ay kasama sa PNY9 compilation na na-publish.* ©Kyrian18