ْعلُيَ اتْارَيَُهوَ جْابّ ادِوَاتْ بّتْاْعُه ٌخيَاطِةِ وَْعلُبّةِ وَرَنَيَشِ..وقرر يساعد ابوهو رغم صغر سنه. .وما كلم ناس البيت لانهم حيمنعوهو .. اها مشي وحايم في السوق ..ومافي شغل مشي علي اتجاه كبري توتي. قال احتمال القي لي زول المع ليهو جزمتو. واكسب لي قرش قرشين. اها لقي ليهو صخرة كدة اتجاه البحر قعد فيها ..جوهو بنتين شكلهم بيدرسو في واحدة من الجامعات المشهورة ديل ..اها سلمو عليهو ..واحدة منهم ..واسمها نجلاء قالت ليهو لو سمحت يا ولد. انا شبطي اتقطع ممكن تخيطو لي. قال ليها طوالي بخيطو ليك ..وشال الشبط منها وبدا يخيط ..طبعا علي ده اكتر واحد في اخوانو. شال المهنة من ابوهو وعرفها جدا. اها نجلاء سالتو. انت من وين؟ .قال ليها انا من السودان من ولاية .......ده اصلي لكن ساكنين الخرطوم انا وناس بيتنا ..ساكنين الشنقيطي ..قالت ليهو ما شاء الله تمام عليك ..لكن انت لسه صغير علي المهنة دي .. علي قال ليها :نعم صغير عمرا ..لكن الحمد لله ربنا منحني عقل افكر بيهو ..ويا اخت مرات في اولاد كباار الواحد للان ابوهو بصرف عليهو وقاعد عاطل في البيت وبامكانو يطلع يشتغل اي حاجة لكن ما بحاول يتعب نفسو ولا يكافح ولا يشتغل. . نجلاء بقت محتارة وتعاين للولد ..الصغير ده بقول كلام منطقي كيف. اها قالت ليهو انت بتقرا؟ قال ليهو نعم بقرا. وحاليا خلصت السنة السادسة في الاساس وبعد سنة حاكون ممتحن شهادة الاساس. نجلاء قالت ليهو ربنا يوفقك ويسدد خطاك .اها خيط الشبط واداهو ليها ..قالت ليهو حقك كم يا اخوي. قال ليها ما بنختلف. انا بشيل منك جنيه واحد لانك انتي طالبة ..ولانك انت بنت. واهلك تعبانين فيك اكيد. ولانو انا عندي اخوات وبتمني اقيف معاهم اصرف عليهم عشان اريح ابوي واشيل عنو المسئولية. اها نجلاء ادتو خمسة جنيه .. قالت ليهو دي خمسة وخلي الباقي معاك. قال ليها لا ..انا حقي جنيه واحد. ما خمسة ..انا حاجة ما حقتي ما بشيلها ..وما تنسي انك بنت واحتياجاتك كتيرة ..هسه الخمسة دي بتركبك المواصلات. وبتحول ليك رصيد ووممكن تشتري منها مناديل ..انا ما عايز احس انك استحسنتي فيني. انا عايز اكافح وربنا بقسم الارزاق لعبادو وما بظلم زول. اها نجلاء دي دمووعها لمن جرت اتاثرت جدا بكلام علي في عز الدموع. قال ليها لي انتي بتبكي. ؟ قالت ليهو انا ببكي عشان الزيك بشيل علبة ورنيش ويحوم بيها او صندوف مناديل او بمسح السيارات .وبعض الناس ما بتحترمو وتستحقرو.عشان الزيك مستقبلو زاهر وحيكون ليهو شأن عظيم يوما ما. علي قال ليها شكرا جزيلا ليك ..كلامك ده اداني دافع وحفزني جدا ..وطبعا رجع ليها باقي قروشها واي زول مشي لحال سبيلو ((في حياتنا اليومية دايما بنصادف علي وامثالو. .اللي بخيط احذية. اللي بببيع مناديل في تقاطع المرور ..اولاد مكافحين بالجد. مرات ظروف الحياة بتضغط الواحد لذلك بشتغل اي شغل حلال يعول منه اهل بيتو. وفي ناس بتستحقرهم وما بتحترمهم نهائيا ..لكن الدنيا دوارة ..سداااية ورضاية ...وربنا ما شقالو حنكا ضيعو. واهلنا بقولو الزارعا الله في الحجر لا بد تقوم ...الشغل ما عييب ..عيب العطالة وقعاد البيت وعمود الكهرباء واللساتك ..عيب الولد يكون طويل وعريض وقاعد وجع قلب للناس. وابوهو بصرف عليهو وهو ولا همو يشرب وياكل وينوم النهار كلو. ويا عالم ..بكون بتابع شلليات فارغة ولا لا ..اغلب الاولاد ..تسالو من عطالتو يقول ليك السبب حال البلد المايل؟ .ما هو حال البلد ده حتتابعو كده يعني لمن يتصلح ..اطلع شق طريقك ..ابقي عتالي او.بيع ليمون ونعناع
يتبع....
