اها صديق يفكر ويفكر وما شال مودة من بالو ولا لحظة وبعد خلص قفل المطعم وحاسب الاولاد الشغالين معاهو علي اليومية .ورجع البيت. ولقي سريرو مفرش برة في الحوش. وطوالي اتجدع ورقد فيهو. امكن غمض عيونو لكن قلبو صاحي. ينوم حبة ويصحي تاني يعاين في السماء ونجمة نجمة الليل يعدو. اصبح الصباح. كالعادة صلي الصبح في الجامع ورجع لقي سهير عاملة الشاي بي اللبن المقنن والزلابيا ..اهع نادتو تعال يا صديق اشرب الشاي قال ليها :ما عندي نفس. اها قالت ليهو :هوي يا ولد انت قصتك شنو من امس. الغداء قلت م عايز وهسة الشاي برضو. في شنو يا ولدي. اها في اللحظة دي علي جاء داخل عليهم وسمع طرف الكلام .. قال ليها والله يا امي ولدك ده امس ما نام الليل كلو يتقلب وانا لاحظت ليهو. هنا صديق قال ليهو معناها انت ذاتك ما نمت هههه عمر قال ليهو انا بي سببي ممتحن والقراية متنشنة بي. لكن انت. لا تكون بتحب ونحنا ما عارفين وجري منو وصديق جري وراهو ساكيهو. وسهير تضحك عليهم. حاج عبد المعطي جاء داخل. قال ليها اولادك لقيتهم ساكين بعض في الحوش هسة عليك الله ما يخجلو. الولد الطويل العوير دة في الجامعة جارس ورا اخوهو. سهير قالت ليهو. :مهما كبرو ياها حركات الهظار بتاعه الاخوان . وعلي فكرة يا عبدو والله صديق ولدك ده ليهو كم يوم حالتو ما عاجباني. عبد المعطي :حالة شنو يا سهير. انتي عارفه شباب اليومين ديل الواحد من يدخل الجامعة ببدا يحس بالمسئولية ..زايدا دراستو زاتو بشيل ليها هم. فما تشغلي بالك الموضوع عادي. وقام مشى. اها فاطمة وهي طالعة ماشية المدرسة صديق قال ليها خليني اتقدم معاك لمن ماشة يا فاطمة طريقنا واحد وطلعو الاخ واختو مع بعض. اها فاطمة صادفت لينا في الشارع سلمت عليها وعرفتها علي صديق. واتفارقت منو في نص المسافه ومشت مع لينا المدرسة وشكلو الولد عجبهع واتكسرت من اول مرة. وبقت لاصقة في فاطمة 24ساعه. ومرات تشوف اي حاجة بتوديها بيت ناس صديق عشان تشوفو لكن ما بتلاقيهو علي طول. اها سهير لاحظت الزيارات المتكررة لي لينا. نادت فاطمة سالتها 'انتي يا بنت فصة لينا شنو الايام دي بتجيك كتير كدة. فاطمة "ابدا والله يا امي بتجي تذاكر معاي ومرات تتونس. البنت ما عندها اخوات ومعتبراني زي اختها. لكن انتي بتسالي لشنو يا امي؟ هوي اسمعي هنا. البنت دي امها صحبة سلمى وكلهم نسوان بتاعات مشاكل وتهاني دي سمعتها مشبوهه. وثم ثانيا خايفة البنت دي تعمل ليها مصيبة وتجي تلصقها في واحد من اخوانك وتشوه سمعتهم. يا بنتي المثل بقول ابعد عن الشر وغنيلو. فاطمة قالت ليها :يعني يا امي اطردها واقول ليها تاني ما تجي بيتنا. سهير :لا م تطرديها انتي خليك ساكتة انا بتصرف. بي هناك في بيت سلمي ♥. جوالها يتصل. ردت لقتو ده اشرف. اهلين شروووفي حبيبي كيفك. اشرف:اهلين امي كيف حالك. سلمي :انا تمام الحمد لله. وبي عاافية والله. اها جاي في رمضان ولا غيرت رايك والله يا امي غيرت راي. سلمي تقاطعو :سجمي خشمي يا يمة مالك غيرت رايك كر علي ما جاي ولا شنو؟ اشرف :جاي يا امي بعد اسبوع وهسة بديت في اجراءات السفر. سلمي :تجي بالسلامة يا ولدي فرحت قلبي والله. اشرف :دايما فرحانة يا امي ان شاء الله. يلا معاك سلامة برجع ليك تاني. سلمي :الله يسلمك يلا ودعتك الله. وقفلت الخط ولفحت توبها جري علي بيت ناس سهير وفي الباب صادفت لينا طالعه منهم وفاطمة مقدماها .سلمت عليهن الاتنين وفي جواها بتتسائل البنت دي الجابها هنا شنو؟ لكن ما اهتمت بالموضوع ودخلت طوالي لي سهير سلمت عليها وفكت فيها شمار انو ولدها جاي من برة
يتبع....
