اها حسام جاء لي صديق بارك ليهو وشكلو الموقف الحصل بينهم بي سببو علاقتهم زادت ترابط اكتر. ودايما في علاقات لمن يحصل فيها توتر. ولا الطرفين يختلفو مع بعض. لمن المعزة في القلب تكون صادقة والخوة تكون لله في الله وما خوة مصلحة بترجع تاني واقوي من الاول مهما عصف بيها الزمن. وعلي طول بجيهو. وطبعا قدمو للجامعة. وشالوهم جامعخ واحدة لكن تخصصهم مختلف. صديق شالوهو هندسة معمار. وحسام شالوهو علوم حاسوب. كلياتهم في مجمع واحد وبتلاقو بين المحاضرة والتانية. دي ببساطة العلاقة بين حسام وصديق. كدي نمشي علي بنات عمنا عبد المعطي شوية . فاطمة الكبيرة في البنات. وبتقرا في اولى ثانوي يا داب. بنت هاادية شديد. ومرات عندها شوية كسل كدة. لكن في قرايتها النشاط مابفارقها نهائيا. بتقرا في مدرشة ثانوية نموذجية. وصاحبت ليها بنات. منهم اللي كانو معاها من الاساس وفي بنات جدد من مدرسة تانية. واحدة من صحباتها اسمها لينا. بنت مسلطة لدرجة ومفتحة. وتاني صحبتها اسمها هديل. دي مسكينة والكلب ياكل عشاها. لو دقوها ما بتتكلم ولا بتشاكل. هديل دي مقربة من فاطمة شديد . يوم واثناء فترة الفطور. لينا قالت لي هديل امشي الفصل عليك الله افتحي شنتطي تلقي فيها قروش جيبيها نشتري بيها تحلية هديل قامت طوالي مشت الفصل. وفعلا فتحت الشنطة. ولمن عايزة تشيل القروش في ظرف بتاع جواب وقع من جيب الشنطة وهديل شافتو وخافت. رجعتو في مكانو سريع وطلعت. في نفس اليوم كان في تفتيش مفاجئ للفصول ..وجا دور الفصل بتاع ناس فطومة. فتشو كل الشنط ولينا ما كانت عاملة حسابها اها الاستاذة لقت الجواب في شنطة لينا ..وساقتها الاستاذة ودتها للمديرة والجواب كان كلو عبارة عن غراميات . اها قالو ليها تجيبي ولي امرك. وطبعا ابوها متوفي. وامها متزوجة راجل تاني وما شغاله بيها. وده كلو بسبب التفكك الاسري. الام والاب يتطلقو واي واحد منهم يتزوج للمرة الثانية والاولاد يبقو ضحية للطلاق ده. وممكن يسلكو طريق كعب ويتشردو ..ولذلك ابغض الحلال الي الله الطلاق. اها لينا طلعت من المدرسة ومفتكرة الموضوع يعدي ببساطة ..في الشارع لقت ولد كدة قالت ليهو يا اخ انا طردوني من المدرسة. عشان مشكلة بسيطة وانا ابوي متوفي وما عندي زول. فرجاءا ممكن تمشي معاي المدرسة وتحل المشكلة. الولد ذاتو احتار في البنت دي لكن اتوكل علي الله ودخل معاها المدرسة. . بعد سلم علي المديرة قال ليها :انا ولي امر الطالبة لينا. وانا بعتزر عن المشكلة البسيطة الحصلت وان شاء الله م تحصل حاجة تاني. والولد ما مدرك حجم الكارثة ولا عارف قصة الجواب والمديرة حست انو ما عارف حاجة ..لانو ختت احتمال انو لينا م حكت الحقيقة كاملة. فقامت قالت ليهو :كيف مشكلة بسيطة. البنت لمن تشيل جواب وهي في عمر وطور مراهقة والجواب كلو غراميات وفارغ في فارغ دي حاجة بسيطة في نظرك ..وطوالي جدعت ليهو الجواب في وشو. الولد شال الجواب قراهووو كلووو. لمن عيونو اتقلبت شرار. اها قام من الكرسي وتاااخ ادي لينا كف. وقال للمديرة والله انا البنت دي ولا بعرفها ولا شي. لاقتني في الشارع وقالت لي تعال معاي المدرسة عندي مشكلة بسيطة وانا فاعل خير بس. ويلا ما عايز بلاوي ولا مشاكل. وطلع خلاها مولعة
يتبع....
