اها حسام بعد سمع رد صديق. اتاثر شديد. وقال ليهو عليك الله يا صديق ما تحسسني اني بقيت سبب دمار مستقبلك. صديق قال ليهو لالا ما تشيل هم ولو اي حاجة غلبتك او ما فهمتها تعال لي في باقي الايام دي اشرح ليك. والصراحة يا اخواننا صديق عايز يضرب عصفورين بحجر واحد. منها صديق ما يعرف انو عايز يمتحن لكن ما عايز يوريهو الحقيقة لانو لسه ما واثق فيهو ومتاكد انو حيكلم باقي الجماعة وتاني حيدبرو ليهو مصيبة. ومنها يذاكر مع حسام في نفس الوقت ويستفيد من الشرح . بالنسبة للمطعم فكرتو نجحت وشغالين فيهو عمر وعلي. .وسهير وبناتها بعملن الاكل بافضل الطرق وحبة حبة الزباين كترت في المطعم ومرات بتجيهم طلبيات مناسبات. . اها سهير لمن شافت الحكاية ماشة بسط معاهم قالت لي عبد المعطي تخلي شغلة الخياطة دي وتجي تقيف في المطعم لانو الاولاد ديل لسه صغار وما بقدرو عليهو براهم. ومرات في حاجات بتتطلب يكون معاهم زول كبير. عبد المعطي قال ليها انا الشغل ده اتعودت عليهو وبالنسبة لي زي الاكسجين البتنفسو ومن قمت صغير وانا بشتغل اسكافي ..وما بقدر اغير شغلي بي شغل تاني. سهير قالت ليهو انت امكن فهمتني غلط. انا اقصد ليك انك تخلي المكان اللي بتشتغل فيهو وتجي هنا قدام المطعم ده تشتغل وزباينك حتزيد ومنها حتتابع اولادك وشغلهم وعينك حتكون عليهم. عبد المعطي قال ليها لو كدة خلاص موافق مافي مشكلة .. يوم والوقت كان زي نصف النهار كدة سهير جاتها جارتها سلمي تتونس معاها وتشرب القهوة. سلمي قالت ليها ما شاء الله عيني باردة عليك فتحتو ليكم مطعم والرجل ماشية وجاية فيهو. سهير قالت ليها اي والله قلنا احسن نستفيد. والله يا سلمى الحياة بقت صعبة وتربية الاولاد والمسئولية وغلاة المعيشة. عشان كدة لازم المرة والراجل يعملو مع بعض ويدعمو بعض ويكونو في المرة قبل الحلوة يد واحدة. سلمي قالت ليها والله كلامك سمح بالحيل. .عليك الله فهمي الراحل الدلاهه الاسمو راجلي ده. سهير :عيب عليك يا سلمى ده راجلك وابو اولادك ما حلوة في حقو تقولي دلاهه. سلمي قالت ليها اهو قلتها وخلاص. سلمي دي يا اخواننا من النوع البزعل سريع وصعب الاعتذار منو. وحمقاء لدرجة قف ... اها اخدت قعدتها مع سهير وقالت ليها بعد ده اقوم امشي يختي عنديـشغل كتير في البيت .. سهير قدمتها وطلعت معاها لحد باب الشارع وكانت عايزة تقول ليها ان شاء الله نا نجيك في شينة ..قالت ليها ان شاء الله تاني ما تجينا. سلمى زعلت زعل واتحمقت وردت لي سهير. تاني انا كان جيتك الله يقطع رحليني ديل. والله انتي ما بتخجلي ..كان تطردينا عديل ..كان تقولي انا ما بستقبل ضيوف. وسهير تشيل وتعتذر ..والله اسفة يا سلمي. دي ذلة لسان وانا ما قاصدة والله ..عليك الله اعفي لي. سلمي قالت ليها انا ماشة بيتي وتاني القي البجيك
يتبع....
