طبعا امتحانات الشهادة السودانية بدت خلاص والحاجة الحلوة انو صديق ما واقع مع اصحابو في مركز واحد. هو في مركز وهم في مركز ..وامتحن لحد ما خلص امتحاناتو وحسام بذاكر معاهو علي طول وبدون ما بعرف انو ممتحن معاهم. والجماعه فرحانين عشان صديق ما امتحن ومرت الايام سريعة والامتحانات خلصت وبعدها جات النتيجة. وصديق ما كان عارف. لانو شغال من خلص امتحانات مع اخوانو وابوهو في المطعم وما فاضي يحك راسو .. اها في راجل عندو راديو. الراجل ده زبونهم طوالي بجيهم يفطر ويتفدى تقريبا كل الوجبات لانو زوجتو متوفية وعندو ولد واحد ومغترب ما قاعد معاهو بجي من فترة للتانية . اها الراجل ده كعادتو. بفتح الراديو بأعلي صوت. وصادف مؤتمر اعلان نتيجة الشهادة السودانية. شغاال. اها كل الناس انتبهت وركزت ف الراديو ..وزي ما قال دكتور عمر.: يوم النتايج يوم فظيع. جاء المذيع وبدأ يذيع. صديق نجح وحسام نجح. وفلان نجح ... اها طبعا صديق خلاص اتوتر واعصابو بااظت ..وما هي الا لحظة وسمع اسمو بين المتفوقين. يذاع. واحرز نسبة 95%..نسبة سمحة وكبيرة شديدة ..كااافية بانها تخلي كل الجامعات تفتح ليهو ابوابها وبدون نقاش. علي جرى سريع نادي امو واخواتو ...ووراهم انو صديق ذاعوهو بين المتفوقين ..وسهير لفحت توبها وجات جارية تزغرد من الفرحة ..ولمن بكت ..وحتي صديق من الفرحة ودموعها سجد في الارض شكر لله. كل الناس والزباين في المطعم فرحو شديد. وفي ظرف دقايق بسيطة المطعم ده اتملى ناس من كل حدب وصوب. جو يباركو التفوق الباهر لي صديق. صديق المثابر ..المكافح ..الذي اجتهد رغم ما الم به من اذى. رغم العوائق والصعوبات احرز نسبة عجز غيره عن احرازها .. نجاح صديق كان سبب في فرح الكتيرين حتى الناس اللي ما بتعرفو فرحو لنجاحو. وجوهم في البيت ناس مسئولين في الحكومة وفي وزارة التربية والتعليم. واساتذة المدرسة ..والبارد والحلاوة اللي جابوها الناس تفتح سوبر ماركت ..غير الهدايا النقدية. وبرضو جابو ليهو جهاز كمبيوتر وجوال من النوع الحديث ده. غايتو نجاحو كان حدث ..رغم ظروف ابوهو. ورغم شغلو البسيط صديق كان بفتخر بيهو. وهو رافع راسو. وبقول :. ابوي القدلة بي عزة ..وابوي زغرودة السمحات. عظمتو سر سعادتنا يقابل الصعبة بالبسمات. اصحاب صديق اتصدمو صدمة قوية لمن سمعو اسمو بين المذاعين ..اتخلعو كلهم. واحد من اصحاب صديق اتصدمو صدمة قوية لمن سمعو اسمو بين المذاعين ..اتخلعو كلهم. واحد منهم قال ليهم لالا ما بصدق اكيد ده صديق واحد تاني ..تشابه اسماء بس. حسام كان معاهم. قال ليهم انتو جنيتو ده صديق ذاااتو. ما سمعتو اسم المدرسة انتو ..لكن صديق ده لي قال لي ما عايز امتحن. لشنو كذب؟ رغم اني اصريت عليهو. المهم ما علينا. واحد منهم قال ليهم والله صح من حفر حفرة لاخيه وقع فيها اهو نحنا رسبنا ومستقبلنا ضاع. حسام قال :ما ضاع ولا شي ..اهم حاجة انتو تمشو تباركو لي صديق وتعتذرو منو عسى ولعل ربنا يوفقكم ويلطف بحالكم. زعيمهم قال ليهو انا ما ماشي وانت عشان ضمنت نفسك نجحت عايز تعمل علينا ناصح. حسام قال ليهو. :العفو ..وانا ودعتكم الله ورسوله انا دربكم ده خلاص خليتو وحامشي ابارك لي صديق وانتو اقعدو ف مكانكم ده
يتبع...
