اها صديق بعد طلع. سهير تدعي ..يا رب تحفظو وتوفقو. اها مشي ووصل للجماعه وسلم عليهم. لقاهم قااعدين وخاتين كتبهم ومذكراتهم ومنتظرينو. قعد وبدا معاهم الشرح ..اها جابو ليهو كباية شاي. بحسن نية شربها وشغال يشرح معاهم ..فجاة حس راسو لاافي وتقييل والصداع حيكسرو. قال ليهم والله يا اخواني ما بقدر اواصل شرح معاكم انا حاسي نفسي ما تمام. حارجع البيت ونواصل وقت تاني ان شاء الله. اها قالو ليهو اقعد يا مان ارتاح هنا وبعد تحس نفسك كويس امشي بيتكم ..قال ليهم لا حامشي. وطلع منهم ..بعد ما طلع ..قعدو يضحكو. هههههههه. في واحد فيهم قال ليهم عامل لينا فيها حفيد نيوتن. هه واحد تاني قال خليهو نشوفو بكرة حينجح كيف في الامتحان ..ههه نط واحد منهم قال ليهو هو ذاتو ما حيلحق يمتحن وفقعوها ضحك. اها صديق وصل البيت امو من شافتو ملامحو ما طبيعة ومسك بطنو وقعد يتلوي من الالم ..امو فكت الكواريك ..وووب علي مالك في شنو يا صديق؟ ؟ اجري اجري يا عبدو شوف ولدك. اها شالوهو وع المستشفي جري. الدكتور فحص ليهو. وقال يدخلوهو عملية مستعجلة لانو دمو كلو اتسمم والا يغيرو ليهو الدم. اها الدكاترة باشرو اجراءات العملية ودخلوهو. والعملية اتعملت ونجحت. الدكتور طلع وطمنهم قال ليهم الحمد لله انكم اسعفتوهو سريع والا كان مات. عبد المعطي قال ليهو مالو ولدي عندو شنو؟ الدكتور قال ليهو ولدك اخد جرعة او مادة مخدرة سامة جدا ..بتعاطوهو شباب الزمن ديل. والجرعه لمن تكون زايدة بتؤدي بالحياة طوالي .. اها عبد المعطي قال ليهو انا ولدي ما بتعاطي حاجة. وانا مربيهو كويس جدا وعارف اخلاقو وسلوكياتو. الدكتور قال ليهو انا مقدر موقفك يا حاج. لكن ما تنسي انو تحليل الدم اثبت لينا تعاطيهو مادة مخدرة. ولو انا ما بعرفكم ..كان بلغت الشرطة لكن عارفك انت راجل مسكين وما قدر تلتلة الشرطة. المهم حياخد معانا يومين في المستشفي وبعدها ممكن تطلعوهو ..لكن انتبهو ليهو كويس وخلو بالكم منو. ومشي علي كدة .. اها عبد المعطي قال لسهير ارجعي البيت لانو البنات براهن. سوقي معاك علي وعمر ديل والصباح رباح خلوني انا مع صديق. اها سهير قالت ليهو انا من هنا ما بتحرك واخلي ولدي قال ليها يا سهير الله يخليك امشي ..البيت واسمعي الكلام ..بناتك حتخليهن لمنو .. والولد كلها يومين ويطلع ما تشيلي هم ..وان شاء الله حنحل المشكلة. انا واثق انو صديق ده ما اتعاطي حاجة غير بفعل فاعل. ولدي وانا عارفو. سهير قالت ليهو والله انا زاتي شاكة في كدة صديق ده طلع طبيعي الصباح من البيت ومشي لاصحابو ديل. ورجع منهم حالتو حاله اكيد هم اللي ورا السبب .. وطبعا يا اخواننا مفترض تتابعو اولادكم وتعرفو اصحابهم كويس. لانو صحبة الاولاد بالذات بتاثر جدا ..لذلك انتبهو ليهم كويس. وضروري تعرفو اخلاق اصحابهم وتربيتهم وسلوكهم ..لانو في اولاد كعبين شديد. الواحد يتعاطي كل الانواع المخدرة. والسجائر والتمباك والمسكرات كلها ووومكن برضو اصحابهم يتاثرو بيهم والما بتاثر بيهم بقولو ليهو ود ماما وانت ما راجل. مفتكرين الرجولة بالسجارة والمسكرات وقلة الاخلاق . والمصيبة الواحد تسالو يقول عندي مشاكل وما قادر عليها. لذلك بشرب اي حاجة تنسيني الهم. وما عارف انو كدة بخلق مشكلة جديدة ليهو...اها مرت الايام وصديق طلعوهو بيتهم وبلغ كمال الصحة وامو حرمتو الطلعة من البيت الا يوم الامتحان ..ومجتهد شديد
يتبع...
