اها واحد من الجماعه الطيبين سمع بي خبر انو صديق اتعافي من المصيبة العملوها ليهو. والشمار حارقو جرى طوالي لجماعتو قال ليهم زولكم ابو سبعة ارواح ده قام نصيح زي الحصان وكانو ما عملنا ليهو حاجة. في واحد منهم وعامل فيها سي السيد عليهم قاام علي حيلو وتاااخ ادي الولد الجاب ليهم الخبر كف. قال ليهو اصلك ما بتجيب خبر كويس انا طول اليوم بدعى ربنا يرفقنا ومخططنا ينجح. اهع الادوهو الكف ده طبعا اتغاظ شديد قال ليهو وانت عايز ربنا يوفقنا كيف ونحنا عايزين نأذي انسان وندمر مستقبلو ..وانت ادعي ربك واستغفر انو يغفر لينا علي العملناهو ده والحمد لله صديق ما مات والا كان حتبقي كارثة. قول لي حنمشي من ضميرنا وين ومن عذاب ربنا. اها سي السيد قال ليهو فكنا بالله من محاضراتك دي ..ويلا قومو نمشي ليهو في البيت نكفر ليهو لانو الولد ده طلع مننا حالتو كعبة وكدة حيشكو فينا اننا عملنا ليهو حاجة. وعشان نزيل الشك لازم نمشي ليهو ونمثل فيها اننا متاثرين بحالتو جدا ..((يقتلو القتيل ويمشو في جنازتو)).. اها قامو مشو لي صديق في بيتهم ..دقو الباب فتحو ليهم علي ..سلمو عليهو. قالو ليهو صديق في. قال ليهم اي قاعد اتفضلو .. اها دخلهم علي صديق ومشي لامو في المطبخ قال ليها يا امي صديق اصحابو جوهو هسه يكفرو ليهو اعملي ليهم شاي. امو قالت ليهو اصحابو؟ ؟؟ اهاااا خلاص امشي الدكان جيب سكر وشاي وتعال. لمن اخت الموية دي تسخن .. اها الجماعه بي هناك دخلو عليهو. سلمو وقالو ليهو حمد لله علي سلامتك يا بطل. ياخ والله خوفتنا عليك. ان شاء الله هسه احسن. قال ليهم:الحمد لله رب العالمين في احسن حال. اها قالو ليهو وده شنو الحصل ليك ده ومالك فجاة تعبت لمن مشيت المستشفى. انت لمن طلعت مننا ما ما اتخيلناك تتعب للدرجة دي والله قلنا مستهبل ساي ومتهرب من الشرح والقراية.اها صديق قال ليهم تعب بسيط وراح لحالو هسه كويس ما عندي اي مشكلة. اها انتو كيفكم والقراية وياكم. قالو ليهو والله من يوم طلعت مننا تاني ما فتحنا كتاب كنا خايفين عليك وهسة كويس انو اتطمننا عليك لذلك شد حيلك سريع وقوم عشان خلاص الامتحانات كلها بقي ليها خمسة يوم. صديق قال ليهم. اقرو بي راحتكم انا خلاص ما عايز امتحن. .قلبي كره القراية شديد. قالو ليهو يا مان قول بسم الله ..ونحنا نمشي وين كان انت ما عايز تمتحن.. والصراحة يا جماعه صديق دي خطة رسمها مع امو وابوهو انو يوهمهم ما عايز يمتحن عشان تاني ما يخططو ليهو مصيبة لانو هدفهم الاول والاخير انو صديق ما يمتحن ومستقبلو يتدهور .. اها علي جاب حاجات الشاي لامو ..عملت الشاي وجابتو ليهم ..اها لمن شافتهم عرفتهم انو دي الشلة المشئومة سلمت عليهم بطرف اصابعها وختت الصينية وحمرت ليهم وطلعت ..وطبعا يا اخواننا سهير عرفت كيف انو الاولاد ديل بالذات اللي كانو ورا مرض صديق ..اوريكم انا. الدكتور لمن قال ليهم الولد ده اخد مادة مخدرة سممت الدم .. طوالي سهير وعبد المعطي انتظرو لحد ما طلعو صديق من المستشفي ..وقعدوهو في كرسي ساخن رغم ثقتهم في انو صديق اخر ولد ف العالم يتعاطي شي مخدر. اها صديق قال ليهم والله اخر حاجة انا شربت شاي عند الاولاد المشيت اشرح ليهم وبعدها حسيت بروحي ما تمام وراسي لافي وبطني بتوجعني. وده كل الحصل. اها عم عبد المعطي قال ليهو معناها الشاي ده هو العملو ليك فيهو المادة المخدرة والسامه في نفس الوقت ..كل هدفهم انك تموت وما تمتحن ومستقبلك يتدمر لكن الحمد لله يا ولدي ربك ستر
يتبع....
