Baryong Fil-Fil

Chapter 1

Chapter 1: Ninya De Loslos

Usa ka gabii, sa pinakatunga sa bukid, naay usa ka baye nga naglakaw-lakaw ug wala na kabalo kung aha ang dalan pauli. Gikan siya sa usa ka tindahan nga layo sa ilang balay pero mao ra ang pinakaduol nga tindahan gikan sa ilang baryo. Naa ra siyay spat nga gidala para suga sa iyang dalan pero nahadlok lang gihapon siya sa palibot kay ngitngit na ug wala nay laing tawo nga naglakaw-lakaw.

Mga pila ka tikang sa iyang tuo, murag naa siyay nakit-ang anino. Iya pod gispatan basig naay tawo makauban niya ug lakaw pauli pero wala man siyay nakit-an nga tawo didto. Nagsugod na siyag huna-huna nga basin wak-wak na to o manananggal. Mao raba ang iyang permi nga madungog sa ilang mga silingan. Bisag layo ang ilang balay sa tindahan nga giaadtuan niya, naa pa man pod hinoon silay silingan sa iyang pamilya pero ang kinalibugan lang gyud kay walay tindahan sa ilahang baryo.

"Naunsa man pod si mama ui! Kabalong gabii na kaayong dako, gisugo pa gyud kog papalit ug ginamos!" gabagulbol niyang ingon. Pero padayun gihapun siya sa iyang paglakaw bisan wala na gyud siya kabalo sa dalan nga iyang gilakwan.

"Nah, patay gyud ko ani. Pila naman ko kaoras nagtuyok-tuyok diri!" ingon na pod niya sa iyang kaugalingon. Nahadlok na pod siya nang naay nitingog sa iyang kiliran. Hadlok man kaayo, gabuto-buto nag kusog iyang dughan, hinay-hinay intawun siya ug lingi.

Paglingi niya, nisalubong sa iyaha ang usa ka nawung. Ngit-ngit man ug wala niya natarung paglantaw gawas sa nagpula nga mata niini nga gasiga, galantaw sa iyaha ug duol kaayo sa iyahang nawong. Sa kakulba ug kapaspas sa iyang buto-buto sa iyang dughan, nakuyapan siya ug didto nabuslot ang silupin nga gisudlan sa ginamos.

Ambot ug pila na kaminuto ang nilabay, maayo ug nakamata ra gyud siya. Pagmata niya, natingala na lang siya kay naa na siya atbang sa ilang balay. Wala na siya kabalo kung unsa gyud ang nahitabo pero maayo ug naabot ra gyud siya. Pero wala gyud siya nahimutang ug sigeg pangutana sa iyang kaugalingon kung giunsa niya pag-abot sa ilang balay.

"Naglakaw while gatulog?" pangutana pa niya sa iyang kaugalingon ug nagkatawa pa sa iyang giistorya.

"Hoy, nabuang naka dira?" nakuratan na lang siya sa nag-istorya ug gilantaw ang iyang mama nga murag nakuratan pod sa nahitabo sa iyang anak.

"Nagkatawa na man hinoon ka dira! Aha na man ang akong gisugo nga ginamos nimo?" pangutana sa iyang mama. Nakulbaan na pod siya kay wala na siyay nakit.ang ginamos sa iyang kamot o sa yuta lang pod unta.

"Hala ma, nawala ang ginamos!" ingon pod sa baye sa iyang inahan. "Sus, anak, pagkadanghaga gud nimo ui! Nag-unsa diay ka galakaw? Galupad nang imong utok? Unya aha man ang spat nga mao man unta ang mo suga dira sa imong gilakwan?" nanghinawak nga yaw-yaw sa inahan. Nakulbaan na pod ang anak kay hasta pod ang spat kay wala didto.

"Ma, nawala gyud siya ay. Nawala man gali unta ko sa dalan dayun pagmata nako kay naa nako sa balay" ingon pod intawun sa anak. "Huh?! Unsa?! Wala man intawun ko kasabot sa imong giingon ui. Nawala ka sa dalan? Naunsa diay ka? Nagteleport?! Kay pagmata nimo naa naka sa balay?!" murag nabuang napod ug huna-huna ang inahan sa gipangistorya sa iyang anak.

"Naunsa diay na 'day?" nilingi pod ang duha sa nag-istorya.

"Ay nang, kaning akong anak, gisugo nakog papalit ug ginamos unya nawala daw ni siya sa dalan unya pagmata niya naa na daw siya sa balay. Nagteleport guru ni." Istorya pod niya sa silingan. "Hala, basin unyag unsa na na dira 'day ha. Ayaw pod intawun pagawsa nang imong anak ug gabii na kay naa ra ba gyud hinoon nga dili ingon natu nga maglakaw-lakaw sa dalan, usahay pa gyud kay magsunod pa nimo. Kahadlok ba ana ui." Ingon pod sa silingan.

"Ada, tuo pod ka ana nang ui. Hinimo ra na sa mga tawo~" ingon pod sa inahan. "Sulod na diri kay mangaon na ta, mag tuyo'g suka ra ta run!" ingon sa inahan sa anak nga gihinganlan ug Ninya. Nisunod na lang pod ang anak. 

'Maayo na lang unta 'tung ginamos kaysa tuyo'g suka. Naunsa man pod ning nahitabo sa akoa ui. Luh, nagteleport baya siguro ko. Naa na koy powers noh?!' ingon ni Niña sa iyang kaugalingon ug gangisi na pod siya. Nakapalingo-lingo na lang gud ang inahan nga si Nicole pero naglingi-lingi pod siya sa iyang palibot basin tinood tung giingon sa iyang silingan gihinganlan ug Erica. "Patay gyud ning anaka nakog—naa! Patay gyud!"

-----------------------------------------------

EDITED. =_=