Baryong Fil-Fil

Chapter 9

Chapter 9: School Time

Usa kadto ka semana human sila mamalit sa mall. Naa sa kwarto si Ninya, natulog pa. Ug nikalit na lang ug sulod iyang mama. Pagsulod sa iyang mama, nabati dayon niya ang katugnaw sa kwarto. "Kalasa ug kuryente aning bataa ui." Ingon pa ni Nicole. Dili lang ang aircon, banha pa gyud kaayo ang alarm clock ani pero lami pa gihapon ug tulog ang isa.

"Ninya, wala ba ka nagplano mosulod ug klase? Pinakaunang adlaw pa ninyo pero late na ka. Pagdali dirag bangon!" Pukaw intawun sa inahan sa anak. Dili man unta ing-ani ang mahitabo kang Ninya. Kay kani si Ninya, sayo man ni matulog pero kay una pa ning higayon ni Ninya nga makasulod ug eskwelahan nga popular kaayo sa siyudad nga gisudlan pod ni Meriflor, dugay ni katulog. As in 1 hour sa wala pa ni sulod iyang mama.

"Unsa man? Lami kaayo itulog" Ingon pa ni Ninya nga katulgon pa. "Ah, dili ka mubangon?" Ingon pa ni Nicole ug gipasulod ang isa niya ka katabang ug gihatag kay Nicole ang gipadala niini. Ug dali dayon gibubuan ug bugnaw nga tubig nga naa pa gyud daghang ice. Dali-dali nga nakabalikwas si Ninya sa iyahang kama ug niadtu sa CR. 

"Ahak man ka ma ui!" Syaget pa ni Ninya gikan sa CR. "Tagam, pagdali dira! Naa na ang imong pagkaon sa ubos!" Syaget pod ni Nicole para pod intawun madunggan siya sa iyang anak. Dali-dali pod ug ligo si Ninya kay nakahinomdom siya nga unang adlaw lagi sa pageskwela karon sa Aukoladeno High nga gisudlan pod ni Meriflor. 

Nganung naestudyante man si Meriflor nga web designer man kaha siya? Katung higayuna, iya gyud gibwiset iyang mama nga siya ang padesignon sa bag-ong niabot nga request. Bisan labag sa kabubut-on, nisugot na lang ang iyahang inahan. Pero hinoon, gwapo man pod diay nga design ang nahatag niya, so giapprove na lang sa iyahang mama ug niingon nga kas-a ra daw to. Mao ra man gihapon kay ipamana ra lagi pod sa iyaha ang ilang negosyo. Pero wala na, nakaila na siya ug bag-ong amiga. Bisag wala gyud siyay amiga bisan usa sa wala pa niya naila si Ninya. Karon nga naa na siyay kauban, dili na siya mahadlok ug lakaw-lakaw sa tunga sa ilang hallway.

Senior High na ang duha kauban si McPhail Amsohat, anak ni Mayor Denlaoso nga friend pod nila. Si Neca ug Leocil hasta pod si Karyat, nasa elementary pa sa Cekoladeno Elementary School, grade 3 pa kini. Ug kaning si Jhee ug Jazeel, nga maayo nga mananayaw, nasa 3rd year high school sa mao ra gihapun nga eskwelahan ni Ninya ug Meriflor.

Naa pay ilaha gyung school bus ang Baryo Fil-Fil. Ug didto, nakasakay ang mga batang mueskwela karong adlawa. Ang mga nawong sa mga bata gadako ra ang ngisi. Intawun, nakaeskwela na gyud sila ug tarong. Atung niagi man gud, wala sila kaeskwela tungod kay pobre man sila ug layo pa gyud sa siyudad. Karon nga makaeskwela na gyud sila, dagko kaayo ug ngisi ug malipayon sa usag-usa.

"Ui, maayong buntag diay ate Jazeel!" Ingon pa ni Neca kay Jazeel. Nikatawa pa si Jazeel ug gipislit pa ang aping ni Neca. "Kacute gud nimo ui" Ingon pa ni Jazeel. "Haha, dapat lang gyud 'te" Tubag pa sa bata. "Kapilingon nga bata" Ingon pa ni Jhee ug gipislit ang aping. Giwakli pod ni Neca ang kamot ni Jhee. "Ay" Naingon na lang ni Jhee. "Kamaldita nga bata" Napalingi na lang si Neca sa nag-istorya ug nakit-an niya si Leocil nga nilingkod na sa lingkuranan niini. 

"Unsa man? Nangita na pod kag away?!" Ingon ni Neca ug giduol kani ug sumbagon unta kunuhay pero kay nikalit ra man ug padagan ang driver sa bus, nakalingkod nuon si Neca sa salog. Dungan gud ang tanan ug ingon ug "Ay kabayo ka!" Nakum-ot ang nawong ni Neca sa nadungog. "Kabayo ba diay ko?!" Ingon pa ni Neca sa iyang kaugalingon. Pero nasuko gyud siya sa driver. "Kawala gud nimoy batasan, driber! (driver)" Suko nga ingon ni Neca sa driver nga wala man pod nakadungog kay nakatutok man intawun ni sa dalan. Gitabangan na lang siya ni Leocil nga makatindog ug nilingkod sa tapad sa igsoon.

Pila ka minuto ug unang nakaabot ang mag igsoon ug uban pang elementary nga bata sa CES ayha sila Ninya sa AH. Pagnaog nilang Ninya, nakaingon gud sila ug "Wowowow". Kay dako man kaayo ang building nga mura na pod ug mall kadak-a. Una pa ni nila nga higayon makasulod ug inga-ani nga eskwelahan. Kay ang eskwelahan  nila nga nasudlan sauna kay mura rag isa ka mercado. Sa gate pa lang, naa na si Meriflor gahulat kay Ninya.

"Dali na bes, late ta ani. Kuyaw raba ang punishment kay pasayawon ka ug cha cha sa tunga sa ground. Ulaw baya kaayo." Ingon pod ni Meriflor ug niuna na ug lakaw. "Okay ra ui, kabalo bitaw ko musayaw basta naa lang koy partner!" Confident pa kaayo nga ingon ni Ninya. "Ayay, lrj. Aha man pod ka katuon ana?" Pangutana pod ni Meriflor. "Ay siyempre, mga lola ug lolo namo sa baryo samot na si Lola Lyka! Nah! Maayo kaayo to mucha cha ug tango!" Proud nga ingon pod ni Ninya ug nisayaw pod kunuhay siya nga naa na sila sa tunga sa ground. Gipanglantaw-lantaw intawun sila sa mga ninglabay nga estudyante. 

"Nabuang na guru ni siya oh" Ingon pa sa usa ka baye sa iyang amiga.
"Halaka ui, practis?" Ana pod ang usa ka bayot sa iyang beshy.
"Basin, ready na siya to rampa girl" Ingon pod ang kauban sa bayot.

Naulaw si Meriflor sa gibuhat ni Ninya mao nang wala na lang niya gipansin si Ninya ug nag-una na ug lakaw. "Hoy, Meriflor! Hulata sa ko!" Tawag ni Ninya kay Meriflor ug didto nakaabot ra pod sila sa building. Sa kilid, naay usa ka dako nga bulletin didto. Gilantaw pod sa duha kay didto man gipangbutang kung unsa ka nga section napadulong.

"11-F" Dungan pag ingon sa duha nga magkauban. "Luh, ui, kalayo ba gud sa atuang room" Ingon pa ni Meriflor ug didto lang niya nahuna-hunaan, malate gyud sila ani kay layo ang ilang room. "Aha diay atong room?" Pangutana pa ni Ninya. "Naa sa 4th floor. Dagan na ta bes!" Ingon pa ni Meriflor ug giguyod pa si Ninya.

Nagdagan sila sa hallway, nabantayan ni Ninya nga murag dili na mao ang palibot. Pasabot niya nga murag dili na eskwelahan ang ilang gisudlan kundi murag usa ka dakong mansion nga naay mga design pa nga karaan na kaayo. Walay tawo, medyo ngitngit kay naay kurtina ang mga bintana. Medyo nahadlok na si Ninya sa palibot pero nilantaw siya sa likod ni Meriflor nga nagguyod niya, murag wala ra man poy problema sa iyaha. "Meriflor, ing-ani gyud ang design sa eskwelahan?" Pangutana intawun ni Ninya. 

"Diba nice? Pero nagpasabot lang ni nga late na ta, Nya. Giingnan baya tika nga sayo ug mata! Hadlok man lantawun pero anad nako. Basta lang dili ka magyaya ug lakaw, walay mahitabo sa imo" Taas nga ingon ni Meriflor. Nikunot pod ang agtang ni Ninya. "Unsa poy mahitabo sa imo kung magyaya ka?" Pangutana pod ni Ninya pero nakaabot na sila sa ilahang room. Giablihan dayon ni Meriflor ang pirtahan.

"Good Morning" Ingon ni Meriflor nga gihangak-hangak pa, utro pod si Ninya nga nakagunit gud sa ding-ding, supporta nga dili matumba. "Bag-o nang school year, Meriflor. Pero late as always?" Pangutana pod sa iyahang ma'am nga panganlan nato ug Ma'am Alcardis. "Sorry ma'am" Ingon pa ni Meriflor ug giguyod ra gihapon ang amiga nga si Ninya padulong sa likod sa classroom. Naglakaw pa lang sila, gipanglantaw na sila sa mga estudyante-- mga classmate nila hangtud sa nakalingkod na sila sa ilahang lingkuranan, tapad pa sila. Siyempre pareha sa halos tanang estudyante,  sa may bintana gyud sila manglingkod. Dili pareha sa hallway, mas fresh ug hayag ang classroom.

"So, karon dili na kinahanglan nga muadtu pa sa gym para sa opening ceremony. Kay dili pareha sauna, mas daghan tag 'bisita' karon" Taas nga ingon ni Ma'am Alcardis. Naglibog si Ninya sa giingon ni Ma'am nga 'bisita' pero nihilom na lang pod siya. Pangutan-un na lang daw niya unya si Meriflor. Lahi man gud nga pagkaistorya ni Ma'am sa 'bisita' kay murag naay nakatago nga meaning. Naay mga estudyante nga pareha ni Ninya nga wala kabalo sa giingon ni Ma'am kay tungod kay transferee nga wala pay nahibal-an about sa eskwelahan, o katung mga daan na nga wala kabalo kay wala ing-ni ug walay balak nga mangutana o di kaya wala nay labot sa mga istorya.

"So karun, magpaila-ila na mo sa inyong kaugalingon ug iistorya ninyo ang inyong mga panganduy sa kinabuhi. So una, ako. Ako ang inyong adviser, Alcardis Orevian. Unta way mga badlungon nga estudyante diri, ug nagbag-o na unta tung mga daan ug dapat magbinut-an ang tanan para way samok mahitabo" Taas nga ingon ni ma'am Alcardis ug nilantaw sa first line ug nitindog pod dayon tung nalantawan ni ma'am.

"Maayong buntag sa tanan, ako diay si McPhail Amsohat, anak sa saunang mayor diri sa siyudad. Maayo ko musayaw, mukanta, mutambling, muambak, muakatkat ug musalom. Ako diay tong tipo nga laki nga muabot dayon pag tawagun lang nimo akong pangalan. Ug akoa diayng panganduy kay musunod sa akoang papa." Taas nga ingon ni McPhail. Naa poy estudyante nga gitaas ang kamot para mangutana. "Unsa poy sundon nimo sa imong papa? Kanang mahimong mayor pod?" pero nilingo-lingo lang si McPhail sa pangutana sa iyang kaklase. "Ang mulakaw sa kabaybayun, sa kalasangan, sa kabukiran, sa kasapaan, ug sa kangitngit sa atoang kalibutan..." Ingon ani nga murag wala na sa iyahang kaugalingon kay naghuna-huna na kini sa iyang pangandoy. Panlingo-lingo pod si ma'am sa iyang kaugalingon, "Ayay, murag lahi naman ni".

"Abe ba nako sa pikas section siya?" Pangutana pod ni Ninya. Pero nangambot lang si Meriflor. "Niingon diay siya kung unsa siya nga section?" Pangutana pod ni Meriflor sa iyaha ug wala kini katubag. "Nah, pataka lang man ka ug yawit ui" Ingon pa ni Meriflor ug nagpadayon ang pagpaila  sa kaugalingon ang ilang mga kaklase.