#قلب_طائفي
#روز_الفياض
#ب٣
.
.
.
وردة نادرة مهما عصفت بـها الأيام لاتذبل"
.
.
.
خفت هذا شمدريه واحد تحرش بيه ؟؟؟
هذا بس لا مراقبني ؟!!!
اندحست بالزاوية اكثر وجنطتي على گلبي وكتله بعصبية :
وانت شمدريك اكو احد تحرش بيه ؟
باوعلي مستغرب !!!
ماادري ليش احس شكله مألوف
ابتسم وجاوبني بضحكه:
شالقضيه خويه هههه !!
غير قبل شويه جنت كاعد يمج بذيج السياره من اتعاركتي ويه هذا الطايح الحظ حشاج ..
صفنت كلت يمكن هو نفسه هذا الولد الجان كاعد بصفي وكام ضرب هالحقير الوراي ؟؟؟
شكد فشله والله عيب.
هسه شيكول علي ذاكرة سمجة من سيارة لسياره نسيته ..
وسن :
اعذرني خويه مااعرفك ماانتبهت ومشكور جزاك الله خير.
الولد :
لا عادي خويه ميحتاج شكر هذا واجبي وهو جان يستاهل اكثر بس مع الاسف ...
المكان والناس والله جان دست ابطنه ميستحون حشاج لاغيره ولا شرف.
وسن :
حسبي الله ونعم الوكيل الله يقهره مثل مقهرني ..
الولد:
لا بس انت سباعيه ماشاءالله عليج مقصرتي بيه.
ضحكت على كيف اتذكرت من لويت اصابعه وكطعت السبحه وكمت شمرتها عليه من اجتني هالشجاعه هههه ..
وسن :
يستاهل واحد حقير حشا السامع حسبي الله عليه.
دمعت عيوني رجعت درت وجهي عالشباك واباوع عالشوراع فرغت لان مطر ..
الطريق شطوله بدت الدنيا تظلم معناها وراي اليوم رزاله من رزاله الله يعيني.
نعست وظليت كل شويه اغفى وافز اخر شي فعلا غفيت دقايق ثواني ماادري شكد بس كمزت لان السياره اتحركت حيل الظاهر جان اكو بالشارع طسه ( حفره ) ..
فزيت وكعدت باوعت هاي اني جنت غافيه ومحاسه على نفسي بس لا جنت حاطه راسي على جتف الولد متت من المستحه بس غلست.
سحبت عبايتي على راسي عدل ودرت وجهي عالشباك وطلعت التليفون التهي بي خاف اغفى.
وصلت للشارع العام مال منطقتنه وكلت خل انزل هنا احسن كافي احراجات اليوم الي صارت.
اتشكرت من الولد وسلمت ونزلت .
نزلت وخليت الكتب على راسي من المطر ورفعت شويه عبايتي من الطين وظليت امشي شويه شويه حتى لا ازلك بالطين واوكع بس حسيت احد يمشي وراي خفت التفتت ظليت امشي اسرع ..
كلما اسرع بالمشي احسه الي وراي يسرع اكثر ..
خفت حيل وانرعبت فجأه اجت سياره تمشي بسرعه وفاتت من يمي ولان سريعه انترست طين ومي من فوك ليجوه ظليت واكفه متحنطه بس سمعت الي وراي ظل يصيح ويغلط على ابو السياره التفتت عليه بعصبيه اريد اشوفه منو.
طلع نفس الولد !!!!
وكف ينكت ملابسه ...
رجعت كملت مشيي واني الدمعه بطرف عيني هي جانت عايزه والتمت طين ومي ووصخ وتأخير وتحرش وهذا ماادري طريقه مثل طريقي لو ديتبعني ..
