#قلب_طائفي
#روز_الفياض
#ب٣١
.
.
.
دع القطار يفوتك، ليست كل السكك تحمل وجهتك .
.
.
.
مر اسبوع وخالد ميحجي وياي ابد واحسه مطايقني انقهرت على روحي حيل حيل رغم اني عاذرته بس شذنبي.
باجر جمعه الصبح اروح لبيت ابوي حدي اليوم بالليل شفت منه ريك حلو انجبيت وظليت ابيتي ..
لا والله بقى هيج مااكدر اتحمل اطك واموت لان فعلا ضغطي ارتفع ومينزل على ساعه يموت الطفل ابطني لو اموت اني.
رجع بالليل اني سابحه وكاشخه ومكيجه كمحاوله اخيره للتصرف بصوره طبيعيه دخل ولاكأنه يشوفني غسل وراح للغرفه نام.
معناها الصبح اروح كافي هيج ذله عيشتيش هاي ..
رحت باوعتله نايم حضرت جنطه صغيره خليت بيها ملابسي وملابس فرح واني اصلا مجهزه جنطه ثانيه زغيره للولاده ظليت كاعده للصبح مااخذت عيني نوم من قهري كمت اتوضيت وكعدت اقره قران بلكي انسى قهري وبلكي الله يهديه.
ظليت كاعده للفجر انوب صليت ونمت.
كعدت الساعة بالعشره هو نايم كعدت فرح غسلتلها وبدلتلها هو كعد اتصلت على علاوي يجي ياخذني كعدت اريك فرح لحدما اجه علاوي دخل سلم واخذ الجنط وطلع خالد كاعد يباوع كمت اني اخذت فرح من ايدها وطلعت.
خالد :
وين؟
التفتت عليه باوعتله ماادري شجاوبه.
وسن:
رايحين.
طلعت ورحت اني واخواني لبيت ابوي الباب مفقول علاوي كسر القفل ودخلنه.
صدك طلعت مكسور خاطري وصدك ابوي سبب كل المشاكل الي صارت بس من طبيت لبيته ارتاحيت عالاقل اخواني هنا ابيت ابوهم مكاعدين ابيت احد.
اعتبر نفسي بعدني وحدي وخالد بعده مسجون.
فات اسبوع وخالد لااجه لااتصل ولاسأل ولا اي احد من اهله همه بالله يمكن محرجين بس هو شبي ؟؟
استمريت بدوامي وانطتني ست مياده السلفه هالشهر الحمدلله وبديت اطبخ هم للجيران هنا ومعارفنه.
اليوم كعدت الصبح عندي الالام بيمن اتصل هديل اصلا حامل ومابيها حيل ..
اتصلت على جيرانه وكتلها والمره مقصرت جزاها الله خير كلتلي:
اكيد اروح وياج بس تحسين بالالم يقوى اتصلي علي راسأ اجيج.
للظهر بعد متحملت متت اتصلت عالمره واجتني تركض اخذت فرح يم بناتها واخذتني هي واسيل للمستشفى واجه ورانه علاوي حبيبي.
وصلت للموت بالولاده لان ضغطي مرتفع وسببلي نزف ظلوا يدورولي دم فصيلة دمي نحسه -A علاوي خطيه جاب جماعته كلهم وعمر نفس الشي بالكوه حصلوا متبرع نفس زمرة دمي.
الحمدلله انكتبلي عمر جديد يمكن لخاطر جهالي ويمكن لخاطر اخواني مالهم غيري ظليت اسبوع بالمستشفى.
