#قلب_طائفي
#روز_الفياض
#ب١
.
.
.
لا أملُك في الدُنيا إلَّا قَلبي؛ وُقَلبي عَزيزٌ لا يَأخذهُ إلَّا عَزيز .
.
.
.
دخلت للمدرسه بسرعه اركض ركض لان متأخره واليوم خميس اصطفاف ورفعة العلم والمديره ست رجاء ماعدها تفاهم عصبيه وتظل تحجي ..
دخلت خليت جنطتي وركضت للساحه وكفت وغلست شفت ست رجاء باوعتلي وكملت حجيها ويه الطالبات على الزي والالتزام وقوانين المدرسه اليوم اول يوم دوام.
خلص الاصطفاف وبدوا الطلاب يدخلون للصفوف رجعنه لغرفتنه بالاداره دخلت سلمت عالمعلمات واخذت اوراقي واغراضي ودخلت ست رجاء المديره :
ست وسن؟
انخمش كلبي كلت اشتغلت المغثه من الصبح.
التفتت عليها وكوه جبرت نفسي ارد عليها:
نعم ست رجاء؟
المديره:
تعاي وراي للغرفه.
راحت واني درت عالبنات باوعتلهم.
ست مياده:
لتباوعين روحي واكليها بروح رياضيه عادي عادي اكلناها قبلج .
وسن :
شنو هي؟
ست مياده:
الرزاله ههههه.
عفتهم وطلعت رحت وراها لغرفتها وامشي وافكر بعذر للتأخير ظليت احجي ويه روحي لحد موصلت دكيت الباب ودخلت بسرعه واني مستمره احجي:
شسوي ياست تدرين بيتنه بعيد والصبح ازدحام والجسر يصير هوسه بسبب الازدحام واني كتلج بدل المره الف على نقل متقبلين تنطيني نقل بعد شسوي قابل بكيفي اتأخر؟
منفعله وأئشر بأيدي واحجي انتبتلها ساكته وصافنه علي وتباوعلي وتباوع وراي كأنما تأشرلي ..
سكتت ...
حسيت اكو شي ظليت متحنطه شويه ودرت التفتت وراي شفت رجال كاعد ووياه بنيه صغيره اتبسمرت واتحنطت.
ست رجاء:
ست وسن الاخ مسجل بنت اخته عدنه بالمدرسه بصف الاول عندج يعني ...
ويريد يوصيج عليها لان مثل مدتشوفين هي متقبل تعوفه وتروح للصف.
اني هنا حاولت استعيد وضعي واغلس على فشلتي مسحت وجهي بيديه واتنفست.
وسن:
اسفه ماانتبهت السلام عليكم.
ردوا السلام اني دنكت للبنيه لزمتها من ايدها وكعدت عالكرسي وخليتها بحضني.
وسن:
الله هاي شنو الجنطه الحلوه وهاي الكصايب الحلوه وهاي الملابس شنو هالجمال هاي منو جابلج هالاشياء كولها اكيد ماما مو؟
هزت راسها لا.
وسن:
لعد منو بابا؟
كالت:
بابا شهيد.
اني جفلت رفعت راسي باوعت للولد الي جايبها.
كال:
ابوها استشهد قبل سنتين.
وسن:
لاحول ولاقوة الا بالله انا لله وانا اليه راجعون البقيه بحياتكم.
الولد:
حياتج الباقيه
بستها من خدها انقهرت عليها:
زين اني ماعندي صديقات حلوات هيج مثلج وعدهم كصايب تقبلين تصيرين صديقتي؟
هزت راسها اي.
وسن:
معناها ترحين وياي للصف حتى انطيج كتب وشغلات حلوه تخليهم بجتطتج ومن نخلص دوام يجي عليج عمو ياخذج وانطيج هديه اذا مبجيتي .
كالت:
مو عمو هذا خالو.
وسن:
مو مشكله خالو ههههه
بس انت لهسه مكلتيلي اسمج شنو؟
كالت:
اسمي رقيه.
وسن:
الله شنو هالاسم الحلو اسمج احلى من اسمي تعرفين اني شنو اسمي؟
هزت راسها لا:
اسمي ست وسن.
من تردين شي تجيني هنا للغرفه او بالصف وتكولين ست وسن اريد هذا الشي ، زين؟
هزت راسها اي :
معناها هسه نروح للصف حتى انطيج كتب تخليهم بجنطتج هاي الحلوه ميصير تبقى فارغه ..
وخالوا بعد لازم يروح لان انت جبيره عيب يبقى وياج بعدين البنات والاولاد يظلون يضحكون عليج.
هزت راسها اي
وسن:
معناها يلا بوسي خالو وامشينه نروح للصف نشوف باقي صديقاتنه عدنه بالصف هوايه صديقات حلوات مثلج وكلهم ينتظروج تجين تلعبين وياهم .
راحت باست خالها واخذتها من ايدها ورحنه للصف طبعا هي خايفه مثل اي طفل باول يوم مدرسه.
خلصنه اول درس عادي وثاني درس نفس للشي ثالث درس بجت :
لا لتبجين بس تبجين تخسرين.
وكفت بنص الصف كتلهم راح اسوي مسابقه يوميه الي ميبجي من اول درس لاخر درس انطي هديه بس اليبجي يخسر وماانطي شي.
فرحوا وكيفوا وهي هم سكتت على واهس البقية .
اول يوم خلص ويه صف اول بتعب نشرح ونعلم مثل كل سنه تخلص السنه وهم بعدهم ميعرفون قوانين المدرسه وعلى الرغم من برائتهم بس متعبين وينرادلهم صبر وطولت بال.
بنهاية الدوام اغلبهم اجو عليهم اهلهم ورقيه بقت يمي لازمه ايدي لحدما اجه عليها خالها وراحت.
رحت لغرفة المعلمات اخذت جنطتي واغراضي ولبست عبايتي وطلعت للسياره بره بيتنه بالمدينه بالمركز واني اداوم بالاطراف حاولت كذا مره انقل دوامي للمركز بس ست رجاء متقبل تنطيني نقل تكول الكادر اصلا بي نقص.
وتعبت وانشلع كلبي بس اكول ميخالف هو وين اكو تعيين بهالوكت هالتعب ولاكعدة البيت.
اني جنت جبيرة اخواني عندي خوات 2 واخ واحد كلهم اصغر مني وامي ربة بيت وابوي عنده محل مال كماليات نسائيه.
تخرجت واتعينت كلت اطلع مصرفي عالاقل ابوي يالله يلحك على عيشتنه مصاريفنه هوايه مدارس وكليات وغيرها اختي الاصغر مني مخطوبه بس اني لا محد خطبني بيوم من الايام مااعرف ليش رغم شكلي مقبول صح عيوني زغار بس بيضا وشكلي وجسمي مرتب واني من النوع الهادئ يعني مو النوع الي لسانه طويل لو يتليكف بالحجي ...؟بس ماادري ليش محد ينعجب بيه كل الي اجو شافوني وشفتهم بس اول مره يجون وراها يختفون لو يتصلون يطلعون عذر.
جنت استغرب اكول لهدرجه اني قبيحه لو شنو معقوله اكو شي اني ممتنبهتله بشكلي بسلوكي.
كبرت صار عمري ( 32) واتغيرت افكاري واهتماماتي مظليت افكر بالزواج بالعكس ظليت افكر اني هسه صرت جبيره وناضجه لازم افكر اطور نفسي يمكن اكمل دراسه جامعيه بما انه اني خريجة معهد معلمات لازم اساعد اختي هديل اصغر مني و مخطوبه ..
.
.
.
مؤخراً كان سلامي الداخلي أكثر اهمية من إثبات وجهة نظري .
.
.
.
اعادة نشر بناءا على طلبكم
ياريت لو تتفاعلون بلايك وتعليق وعشر ملصقات فضلا وليس امرا .
