#قلب_طائفي
#روز_الفياض
#ب٢٠
.
.
.
ونستعيذك يا الله مـن خُبثاء النوايا مُتصنعي الود .
.
.
.
الضابط:
لتستعجلين هسه ...
اراويج تسجيلات من غير مناطق عبرت عليها نفس السياره وانتبهي للتاريخ والوقت.
شغل عدة فيديوات كلها تبين بيها السياره البيضا الي بيها ابوي الى ان وصل لاخر فيديو التصوير بعيد مو قريب وكفت السياره ونزل ابوي وبيده جليكان ورش فد شي اباب محل والمحل بشارع تجاري الشارع الي بي محل خالد وشعل النار.
حسيت اتضايقت ونفسي ضاك وعركت ماادري شصار بيه مسحت وجهي بيدي :
اريد كلاص مي لو سمحت؟
الضابط:
اي ان شاءالله.
انطاني بطل مي صغير شربت شويه وصبيت بيدي بللتها ومسحت وجهي.
الضابط:
تعبتي ؟
تردين استراحه شويه؟
مكدرت احجي وارد عليه ..
اختنكت ودموعي ظلت تطافر امسح وحده تنزل الثانيه هو ابوي ماكو غيره هذا الي بالفيديو وهو هذا محل خالد ماكو غيره الحركه.
هزيت راسي لا وبجيت.
الضابط:
يعني فهمتي .
وسن:
لا لا ممعقوله ..
مفهمت شي ..
انت ..
انت بالله فهمني ...
بس عفيه الله يخليك مو الي ابالي ...
مااريد اسمعه ..
اريد اسمع الصدك.
الضابط:
وهو هذا الصدك ..
ابوج هو الي حرك محل زوجج.
وسن:
ياربييي ....
ياربيييي ..
ظليت ابجي حيل ..
شحجي شكول فضيحه مصيبه وطاحت على راسي بيا عين اطلع واحجي لاهله واخوانه ؟؟
بيا عين احجيله هو ؟؟؟
بيا عين اباوع للناس من تعرف ؟؟
الضابط:
ارتاحي شويه خويه وبعدين نكمل .
طلع وخلاني كل حسره اذبها تهز الحيطان احسها.
ظليت كاعده متحنطه عالكرسي وافكر بمصيبتي وسواية ابوي المتنحجي ولاتنكال ياربي دخيلك من يمك حلها لاتفشلني وتفضحني ياربي دخيلك محد الي زوجي مسجون وابوي طلع مجرم ومابي خير وامي مريضه وعد اهلها وبغير محافظه وماعندي احد الي يعيني غيرك لاتتخلى عني ربي.
رجع الضابط دخل:
ها ست شلون صرتي ؟
مسحت دموعي :
شلوني بعد ...
وشلون صرت ...
ياريتني لاصرت ولا عشت ولاهالمصيبه.
الضابط:
الله يساعدج.
وسن:
شيساعدني ....
شساعدني ...
رجعت بجيت :
بلوه سوده ..
ليش هيجي يسوي شمسويله والله عقلي ميستوعب كل المصايب الي دتصير وحده وره اللخ بس هاي متتصدك ومتنحجي يعني يكطع رزقنه اني وجهالي مفكر بينه ؟؟
اشهر ظلينه عايشين عالراتب مال التربيه وخلصناها تلزيك العيشه لحد ميجي راس الشهر انترسنه ديون لحد مرجع وكف على رجليه حتى محبس مثل البنات مبقى بيدي ...
والله اتمرض مااكول مريضه حتى ليكلي روحي للطبيب ومنين اجيب فلوسه ..
تالي يطلع ابوي الكاطع رزقي واني اكول يوميه وادعي ياربي الي سواها فضحه ..
تالي اني انفضح حسبي الله ونعم الوكيل الك المشتكى ربي لامن خيره ولامن كفاية شره.
ابجي واحجي وهو ساكت يباوعلي ومقهور يمكن علي ...
يافضيحتي بين الناس من يعرفون.
وسن:
زين يعني هيج قضيه هم تعتبر ارهاب ؟
الضابط:
الي شفتيه هسه افراد عصابه وهاي تعتبر اعمال تخريبيه لاثارت الفتنه بالمحافظه لان ماكو اي سبب يخلي والدج يسوي هيج شي بزوج بنته الا لو مشكله جبيره لو هم عصابه وهذا شغلهم وابوج وياهم واول ما بده ينفذ نفذ بزوج بنته حتى يثبت ولائه.
هزيت راسي :
مفهمت.
الضابط:
مو موضوعنه هذا ست ..
هذا موضوع ثاني .. دنحقق بي هسه .
موضوعنه هسه انتو عرفتوا الجاني واذا تردون تكدرون تشتكون عليه هذا شي راجلعكم بس احنه هسه نريد مساعدتكم لذلك استدعيناج اذا تعرفين مكانه ياريت تساعدينه حتى نحقق وياه.
وسن:
ششتكي عليه ؟
اشتكي على ابوي ؟
شكول وشحجي؟
ووين اعرف مكانه اصلا ...صار فتره علاقته بي مقطوعه بسبب زوجته ومااريد اعرف مكانه بعد الي عرفته شسوي بمكانه.
رجعت بجيت على حظي.
بعد مخلص التحقيق الضابط سمح لحماي يدخل حتى يسمع ويشوف الفيديوات ومن دخل دخل وياه حماي الثاني هم جاي ورانه اتمنيت الكاع تنشك وتبلعني متت من الفشله ودموعي مبطلت ولازمه نفسي كوه حتى ابجي بدون صوت.
حمويني من شافوا الفيديوات اتعجبوا واستغربوا وظلوا يحسبون على ابوي وكل ميحسبون ينعصر كلبي ويزيد القهر.
من خلصوا كللهم الضابط:
تكدرون ترحون بس الست تبقى متروح.
فتحت عيوني عبالي مسمعته ودرت عليه :
هاا شنو ؟
مسمعت؟
الضابط:
اختي انت بعده التحقيق وياج ماانتهى.
وسن :
شنو يعني ماانتهى؟
شنويعني ابقى هنا؟
اتخبلتوا انتو !!!!؟
صباح:
شنو تبقى وين تبقى؟
متبقى ليش تبقى؟
الضابط:
لحد ميخلص التحقيق.
وسن:
من كل عقلك؟
صباح:
استاذ شنو تبقى ؟
مره تبقى بالمركز شنو شلون ؟
بالله صايره دايره.
صلاح:
ميصير اخي عيب شنو هالحجي تردون تحققون وياها بعد تجيكم باجر.
الضابط:
مو بكيفنه هاي اوامر.
صباح:
يا اوامر !!!
اوامريش هاي الي تكول المره تبقى بالمركز وين كاعدين متبقى تردوها باجر الصبح نجيبها.
اني كلبي مثل الطبل يركع من الخوف حتى ظل يوجعني خفت خاف حمويني يتعاركون ويه الضابط ويحجزوهم.
ظليت لازمه حماي الجبير من ايده واتوسل بي بس ميعصب.
صلاح:
اخي لازم تروح ميصير تبقى اصلا عدها طفله صغيره شبعت بجي وراها من الصبح لهسه متنام الا امها يمها وهي اصلا هاي كدامك مره حامل وتعبانه وكل شويه توكع شلون نخليها هنا شلون حجي هذا.
الضابط:
يابه مو كلنه مو بكيفنه هاي اوامر.
صباح:
اوامر منو بالله فهمني ؟؟
اومر منو اني اروحله هسه واحجي وياه.
حماي الثاني شاف اخوه صار عصبي وخاف الامور تتطور واني ايدي على گلبي لا انوب الضابط يخلص صبره ويحجزهم وبدل محاجزين واحد يحجزون التلاثه سوا وفوكهم اني ...
.
.
.
رباه خلصني من كل عاطفة لا جدوىٰ منها أيًا كانت .
.
.
.
لايك وتعليق وعشر ملصقات فضلا 🌹🌹
