#قلب_طائفي
#روز_الفياض
#ب١٩
.
.
.
أنا تلك التي تعرف جيداً كيف تنجو لكثرة
مَ إعتادت الوقوف وحيده دون يد أو حائِط .
.
.
.
وره كم يوم جنت اغسل البطانيات بالحديقه حاطتهم بالطشت وادوس عليهم برجليه وشاده شالي على بطني ومتحزمه بي لان ظهري حسيته مكطوم وفروحه تقلدني حاطه الححاب بالطاسه وتدوس عليه برجليها واثنينه نضحك .
هالعطله من بدت واني اكرب حتى لو معندي شي اسويه جنت اطلع شغل من جوه الكاع حتى الهي نفسي.
اندك الباب حيل كمزت فتحت شالي وخليته على راسي وفتحت الباب شفت سياره شرطه وسياره ثانيه ماانتبهت عليها بالبداية ..
مسلحين ولابسين لبس شرطه ولبس مدني ولبس عسكري خفت وحسيت برعشه بكل جسمي.
وسن:
نعم؟
راسأ فات واحد من بينهم شايفته قبل :
انت وسن مو؟
بلعت ريكي حسيت حلكي يبس.
وسن:
اي نعم اني اتفضل؟
رد علي:
اتفضلي ويانه ست ..
وسن :
وين اتفضل ؟؟؟؟
جاوبني :
مطلوبه للتحقيق.
وسن:
شنوو ؟
ياتحقيق؟
منو طالبني؟
كال:
احنه من مكافحة الارهاب .
انخلست اتذكرت شكله هو هذا ابو تلث نجمات الي اجه اخذ خالد.
وسن:
خير بعد هالمره شكو المره ؟
القبلها اجيت اخذت الرجال وهسه دخلنه بسادس شهر ومنعرف شصار بيه ...
ولانعرف شمسوي ...
هسه شنو جريمتي اني؟
كال:
ست احنه العلينه نسوي شغلنه خو معدنه عداوه وياكم.
وسن:
حسبي الله ونعم الوكيل.
رد:
ونعم بالله يلا خويه منو موجود وياج بالبيت يجي وياج اخوج ابوج احد من اهلج؟
وسن:
محد موجود ...
ومااروح من كل عقلك ترديني اروح وياكم شعرف منكم؟
اتأففف :
اتصلي على اي احد من اهلج يجي هسه لو تره اخذج بحدج وبدون علمهم وحتى بتج مااخليج تاخذيها.
وسن:
على كيفك ..
على كيفك ..
شنو هي فوضى.
طلعت التليفون وايدي ترجف اتصلت بحمويني واني كل شويه اكول حسبي الله ونعم الوكيل واباوعلهم.
حجيت ويه حماي وكال جاي بس مسافة الطريق.
دخلت للبيت لبست واتجهزت واجوا حمويني اثنيهم اسمعهم يستفهمون عن الموضوع والسبب.
رحنه وياهم اني وحماي الجبير بسيارته وحماي الثاني اخذ فرح لبيتهم ويجي ورانه وصلنه ودخلونه لغرفه وبدوا يسألوني :
اسمج ...
عمرج ...
اهلج ...
وظيفتج ...
مخلو شي مسألوا عنه واني اجاوب عادي كلت شيردون يسألون خيسألون المهم خالد يطلع الظاهر هذا الرجال المسؤول سوه شي او حرك الموضوع.
