#قلب_طائفي
#روز_الفياض
#ب٢١
.
.
.
حماي الجبير اقترح عالضابط :
اني ابقى بمكانها ..
وهي تجي باجر كملوا تحقيق وياها
المهم ترجع للبيت بتها طفله والله تبجي عليها.
شبعت بجي على فرح وخايفه ميخلوني ارجع شكلها انسدت فد مره وبس السجن بقى ماانسجنته ياربي رحمتك.
ظلوا حمويني يلحون عالضابط وادخلوا بعد ضباط الكل حاول واكو ناس شفتهم ساكتين حسيتهم يخافون يتدخلون رغم مبين عليهم مقابلين وغيرهم حسيته يبرر تبريرات مالها علاقه بالموضوع.
ظليت واكفه ممفتهمه شي وراسي ظل يوجعني من البجي ودخت وتعبت.
اخر شي استسلم الضابط وقبل يخليني اروح بس حجز حماي الزغير بمكاني وزاد همي هم.
من طلعنه حسيت الضابط على اعصابه وافق ونظرته معجبتني ومفهمتها ..
طلعت وكلبي مقبوض ورجعنه اني وحماي لبيتنه اخذت ملابس وشغلات الي ولفرح ورحت وياه لبيته خفت ابقى وحدي .
بس وصلنه ركضت اشوف فرح لكيتها نايمه بحضن زوجة حماي ودموعها على خدها كابلتها وشبعت بجي.
حماي ساكت اكيد متضايق مني مدري من سواية ابوي بس شيحجي ..وشيكول .. مستحي مني اكيد.
ومالي عين ارفع عيني بعين احد بيهم ولا احجي بالموضوع.
بليتلها طفت عيوني من البجي ولا اكلت ولاشربت فرشتلي زوجة حماي اني وفرح بالديوانيه مالتهم وظلت كاعده يمي تسولف وتصبر علي بس اني دمعتي مبطلت .
كلها نامت واني كاعده مكابله الشباك وادعي ربي حلها من يمك بستر ربي مناقصه بعد كسر.
ربي لاتصغرني اكثر من هيج بعيون العالم ولاتفشلني كدامهم اكثر من هيج ..
يكولون الدعاء بالمطر مستجاب وهسه السما تنكط ربي انت الكلت ادعوني استجب لكم واني دعيتك ربي لاتردني.
عين على فرح وعين عالسما لحد مطلعت الشمس وليل الشتا شطوله.
الصبح كعدوا وصاحولي عالريوك جوعانه وجسمي يرجف مااكلت شي من ريوك البارحه بس مالي خلك ومخنوكه بعبرتي ومستحيه من حماي.
وسن:
بالعافيه مجوعانه انتو اتريكوا.
طلعت زوجة حماي راحت للمطبخ شويه واندك الباب وانفتح دخل حماي جنت نازعه حجابي جريته هالسريع وعدلت كعدتي.
صباح:
خويه شقصتج ؟؟
شنو مستحيه من عدنه لو متحبين اكلنه؟
وسن:
لا والله لا مو مستحيه ولا شي ولا مااحب اكلكم بس مااشتهي مجوعانه ومالي خلك.
دمعت عيوني ودنكت.
صباح:
هو انت من البارحه مااكلتي شي شلون مجوعانه كومي خويه كومي لخاطر هالطفل حرام اكليلج لكمه حتى لو متشتهين جبري نفسج.
