#قلب_طائفي
#روز_الفياض
#ب٩
.
.
.
لا تحتضن يداي ، الإرتجاف في الروح هذه المرة .
.
.
.
بعد فحص الكاميرات اكتشفوا انه العمل كان بفعل فاعل .
تسجيل الكاميرات بين شخص ملثم نزل من سياره ورش بانزين مااعرف شنو وحرك المحل .
بس مكدروا يتوصلون لهوية هذا الشخص ولا السياره مبين منها ارقام او علامه داله.
خالد جان مكتئب ميطلع من البيت ..
وماله خلك يروح لاحد او يستقبل احد ..
فحجيت ويه ام رقيه بفكره اجت على بالي ..
وسن :
ام رقيه عندي وياج موضوع بس مااريد احد يعرف بي.
ام رقيه:
اي حبيبتي كولي شكو؟
وسن:
خالد مقهور وماله خلك ومهموم علمود سالفة المحل ومشلوع كلبي عليه.
ام رقيه:
اي والله يا وسن اني هم مثلج.
وسن:
اني عندي الذهب مال الخطوبه وعندي وياه كم قطعه من الاول مشتريهم من راتبي اريدج تاخذيهم للسوك وتبيعيهم ..
اريد انطي فلوسهم لخالد حتى يبدي من جديد.
ام رقيه:
ياا سبحان الله .
عمرج اطول من عمري ..
نفس تفكيري اني هم عندي كم قطعه كلت ابيعهم وانطيه فلوسهم وكله من خيره هو جان ينطي واجمع واشتري وجنت اريد اكولج على فكرتي ..
وسن:
سبحان الله
ام رقية :
اي والله .
وسن :
بس حبيبتي ام رقيه انت ذهبج خليه انت عندج ايتام باجر عكبه تحتاجيه الله ليكولها ضمي للزمن.
ام رقيه :
لا يمه شلون اعزه على خالد !!
شنو جهالي اعز منه ...
فدوه اله الذهب وصاحبة الذهب المهم يرجع لشغله عود من الله يرزقه يجيبلي غيره ان شاءالله.
شبكتها وبجيت :
انت اخت ونعم الاخت اول مره اشوف اخت تحب اخوها هيج.
ام رقيه :
شعندي غيرهم ..
عايشه بخيرهم وممقصرين ويايه ولا ويه جهالي عايشين احسن عيشه يمكن ابوهم لو عدل ميدللهم هيج.
وسن:
الله يرحمه.
ام رقيه :
الله يرحمه .
رحت صعدت جبت الذهب وانطيته لام رقيه وسلمت عليها وطلعت للدوام.
بالدوام جنت اسولف للمعلمات عن الي صار ووضع خالد الحالي وجانوا يواسوني ويحاولون يخففون عني ...
بس ذاك اليوم من وصلت لكيتهم متجمعين بغرفة ست رجاء استغربت !!!!!
كلت اليوم اني جايه من وكت وماعندي خبر اكو اجتماع خليت عبايتي وجنطتي بالغرفه ورحت دكيت الباب ودخلت سلمت :
السلام عليكم
ست رجاء:
وعليكم السلام
ابن الحلال بذكره فوتي وسن.
ست مياده:
تعالي كعدي يمي هنا.
