وعد العيون

البارت السابع

البارت السابع
#وعد_العيون
#بقلمي_شمس

من گوتله طلگني…..!!!
هو بقى صافن بوجهي .. لان بعد كل الي سويته بي وهو مااتجرأ يطلگني .  واني اعرف ليش صبروا عليه كل هذي الفتره .. بسبب الحاظر والغائب .. لان مخلين مبلغ يكسر الظهر وبقوا متحملين حتى ليدفعون مع انه الله منطيهم وحالتهم زينه ..
من سمع كلامي اخذني للاستقبال .. وگال الامه وابوه اجو للاستقبال.. ومن سمعوا اريد اتطلگ .. #شمس

بقوا يحجون ويعيطون عليه .. بس اني ماهمني اي شي وبقيت مصره ع رأي .. واتصلوا ع ماما واجت هي وخالوا الوسطاني اسمه حسن .. مادخلت للبيت اني اخذت ملابسي وطلعتلها اخذتني وطلعنا واني ممصدگه حخلص منهم ..
طبعا خالوا الطريق كوله يسأل ليش مترديه وليش تردين تتطلگين .. وهو انسان مثقف وواعي واكيد حيفهمني ..

سمر .. خالو مااريده لان هو طفل وماعنده شخصيه ومااحسه زوج كنت دايما اعتبره اخويه بس انتو الي جبرتوني عليه ..
خالو .. سموره كل هذي امور بسيطه يعني متوصل للطلاق .. #بقلمي_شمس

مرت الايام وخوالي يتناقشون بهذا الموضوع .. وكل ساعه واحد جاي ويحاولون يصلحون .. بس اني ارفض وكلما اقدملهم اسبابي .. ميقتنعون .. لأن عندهم هذي مو اسباب تستوجب انه اتطلگ ..
واقربائنا انقسموا .. ناس صارت وياي ومقتنعه بأسبابي وناس صارت وياهم ضدي .. وبدأ النفاق والكلام الي طلعوه عليه ..
خالوا ومرت خالوا .. يحاولون يشوهون صورتي ويطلعون ابنهم ماكو منه ..
ساعه يگولون تحب واحد وتريد تتطلگ وكم مره لگينا رسائلها وياه .. وساعه يگولون وسخه وغرفتها 24 ساعه مو نضيفه .. ومتعبه ابنه مع انه اكثر شي اسوي بالبيت هو الشغل والتنضيف لانه الوسيله الوحيده الي تخلصني من ابن خالي . 
وغرفتي دايما نضيفه ومعطره .. اول مادخلت كان بيتهم مزيله لان كولها دوام ومحد فارغ ينضفه واني الي سويته بيت صدوگ بالتنضيف والترتيب ..
بس رغم كل اتهاماتهم .. محجيت شي وفوضت امري لله ..
اكيد البعض يتصور اانه اريد الطلاق بسبب بهاء . وهذا الشي مو صحيح لان اعرف نفسي بهاء صفحه وانطوت وماممكن اكو شخص يتزوج وحده مطلقه وخاصه امه كانت رافضتني واني بنيه .. فمستحيل هسا تقبل يتزوجني واني مطلقه ..

اني ردت الطلاق .. حتى ارجع الحياتي ودراستي . تعبت واني كل يوم اشمئز من نفسي واني احس شخص مثل اخويه يتقربلي بالاضافه للضرب والاهانات تعبت واريد ارتاح .. #بقلمي_شمس

رضا .. سمر انسي الطلاق .. الزواج ستر للبنيه واكيد اذا تطلگتي الناس تحجي عليج مو عليه ..
اخويه رضا صعبها عليه لان لعبت نفسه من الزعل من ورى اختى كل يوم زعلانه وراجعه ..

واختي رنا من سمعت صارت وياهم عليه .. وماما ساعه وياي وساعه وياهم اعرف متريد تكسر بأخوها لان هي تحبهم وهم مريضه وماالها رأي ..
تعبت هوايه بهذي الفتره .. اتمنيت يخلص كولشي وارتاح بس بيوم من الايام .. اجه اخويه رضا وعيونه يطلع منهن نار من العصبيه .. وشكله ميبشر بخير ..

اني گاعده بغرفتي واجه دفر الباب ودخل ..
وسحبني من شعري ويضربني ..
رضا .. گولي لج شبيه زوجج ومترديه .  ويضرب بكل قوته ودور لزم حديده يضربني بيها .. بعمره ماضاربني هيج .. ماما واختي يردن يسحبنه ميگدرن ..

اكيد هاي مرت خالو وخالو .. گالوله شي عني وخلوه هيج اعرفهم عقارب واشكال طلعوا كلام عليه ..
سحب عباتي وخلاها ع راسي وراد يرجعني ..
گتله يس ترجعني اموت روحي ..
بهذي اللحظه اندگت الباب .. اجه زوج اختي حتى ياخذها لان صارلها فتره عندنا .. رضا انشغل وي زوج اختي لأن بقه يومين يله راحوا ..
من راحت اختي .. ماما اتصلت ع خالو حسن.. گلتله تعال اخذ سمر يمك .. لان خافت من رضا ليسويلي شي .. #بقلمي_شمس

اجه خالو اخذني وبقيت يمهم اسبوع ..
بيت خالو حاولو يصلحون بينا اني وحيدر .. وخالو دز ع حيدر واجه .. گلي تعالي اگعدي وياه وتفاهموا بلكي توصلون الحل ..
سمر .. گمت ابجي . خالو مااريد اشوفه ليش تجبروني ..
بنات خالو كبار گلولي احنا ندخل وياج لتبجين .. دخلنا وگعدت بس مباوعت بوجها ابد ..
هو بقى يحجي وي بنات خالو ويگللهن هي متخليني اتقربلها ومن هذا الحجي ..
هن مزوجات استحن وهو ميستحي يحجي في سبيل يطلع الصوج بيه .. بس بنات خالو دافعن الي ومانطنه فرصه يحجي ..
تالي طلع وصارت جيته مابيها فايده .. لان ميدري اني افضل الموت ولاارجعله ..
شگد حاول خالو حسن وياي وگلي خالو ارجعي الخاطري انتي مو تحبيني وحاسبتني مثل ابوج ..

سمر .. خالو اني احبك وخاطرك كبير عندي بس مااگدر لتجبرني وبقيت ابجي .. هو زعل مني ورجعني البيت اهلي ..
رجعت واني ميته خوف من اخويه رضا ..
رضا من شاف ماكو فايده مني شال ايده من السالفه .
واني عاندت وراسي والف سيف ماارجع بعد ماملوا مني وتعبوا وياي اجه خالو وگال البسي عباتج وتعالي  حيدر حيطلگج ..
اني طرت من الفرح ☺️.. بس انقهرت ع رضا من سمع ترك البيت وطلع ضايج ادري بي كان رايدلي الستر بس اني خلص بعد مااگدر وربي مااگدر وماعندي طاقه اتحمل ..
#بقلمي_شمس
يتبع….