وعد العيون

البارت التاسع

البارت التاسع
#وعد_العيون
#بقلمي_شمس

سمر .. طبعا كلام الاخير الي گاله بهاء كان بوجود ماما واخته گلتلها هيج يگول ..
من سمعت هذا الكلام .. طرت من الفرح ودموعي نزلن تلقائيا مشاعر ممزوجه بالخوف من اهله وعدم موافقتهم ..  وصار عندي حافز للدراسه .. وبالحياه اني عايشه ع امل اسمه بهاء .. اتأمل انه يرجع بيوم بس بهاء كان معاند وي اهله وميرجع من سفره ..
كان عنده امل انه فراقه يخلي امه تتنازل وتوافق.. بس امه كانت مصره ع رفضها ..
مرت الايام وبهاء يجي يوم واحد حتى يشوف اهله بس اني مالي نصيب بشوفته ..
لأن ماكو اي وسيله نلتقي بيها وطلعتي من البيت للمدرسه .. ماكنت اطلع بعدها الاي مكان ..
بس افرح بداخلي من اسمع انه اجه للمنطقه يكفي انفاسه قريبه مني ..

ومرة كنت طالعة رايحة للمكان الي انتظر بي الخط مال المدرسة كنت بكامل اناقتي ﻻبسة حذاء رياضي اسود نص بوت وبي كابوي شكلة كولش حلو وع الموديل وشال ابيض وجنطة بيضة وبيهة وردة سودة كبيرة وساعة بيضة وعباية راس طبعا ..
ومخليه عطر كلش طيب بيومهة كان عندي امتحان صعب وامشي واراجع بيني وبين نفسي..

صارت عيني ع ولد يمشي مقابيلي .. مااشوف بس ضهره بس طوله وجسمه مو غريب عليه ..
الولد يمشي سريع .. واني هم مستعجله خفت لاأتأخر ع الخط .. وصدفه الولد دار وجهه مع انه مطلعت صوت برجلي لان دنيا الظهر والشارع فارغ فخفت .
اتباوعت 😲 هذا بهاء . يربي گلبي گام يدوگ سريع ووجهي مبتسم من وحده ماگدرت اخفي الابتسامه ..
وهو بقى يباوعلي بلهفه ونظراته كولها عتب .
استمرينا بالمشي اني رحت بأتجاه وهو بأتجاه كان رايح للمحل ..
ارتاحيت همزين ماتبعني وسولف وياي .. خفت ليشوفنا احد .. امشي وبداخلي فرح مصاير .. احس الگاع متشيلني.. وصلت بالمكان الي نتجمع بي للخط ..
وعيني ع المحل ..
اگول بلكي يطلع واشوفه .. بعد دقايق التفتت شفته جاي من غير مكان بأتجاهي .. خفت ليحاجيني والبنات واگفات درت وجهي وسويت نفسي مشفته ..
هو هم غير طريقه ودخل محل مال حلاقه مقابيلنا وعينه عليه يتباوعلي من المحل ..
بعد ثواني اجه الخط ورحنا للمدرسه .. بداخلي الفرحه مسايعتني .. وسولفت الصديقاتي وفرحولي . 
لأن مسولفتلهم ع بهاء .. واخيرا شفته من بعد فراق دام اكثر من سنه ..
خلص الدوام ورجعت للبيت ..
سمر .. السلام عليكم ماما ..
ماما .. وعليكم السلام .. روحي غيري ملابسج وتعالي عندي كلام وياج ..
سمر .. شنو ماما گولي الفضول قتلني مااتحمل ..
ابتسمت وماما وگالت .. احزري من اجه اليوم ..
سمر .. منو ومستغربه ??
ماما .. بهاء
سمر معقوله وشنو يريد ..
ماما .. اجه وسولف وياي عليج وگلي خاله سمر أمانه يمج لحد مااقنع اهلي واتقدملها واخذها. .
وگوليلها تنتضرني .. واني مراح اخذلها ..

سمر .. من سمعت كلامها .. فرحتي صارت فرحتين وادري بس رجال وگد كلمته .. راح ابقى انتظره الاخر عمري خسرته مره ومستحيل اخسره مره لخ ..

حياتي تغيرت الى فرح .. گمت اطلع واتونس وي بنات خالي لان هم اكبر مني وماما عندها ثقه بيهم ..
نروح زيارات سويه وللسوگ وطلعات وونسات .. حتى بالمدرسه ضحك وونسه وي صديقاتي مخليت اي شي يعكر مزاجي وفرحتي ببهاء وحسيت نفسي مخطوبه اله

حيدر ابن خالو تزوج بهذي الفترة وصار عندة ولد واني صرت صف خامس علمي ومتفوقة كولش ..
ماما هي هي نفسها ساعه زينه وياي وساعه مرضها وشكها يزيد ..
مرة كنت راجعة من بيت خالو طبعا خالو جابني بنفسه لبيتنا ومريت من يم بيت اهل بهاء شفت ولد گاعد بالباب ومن تقربت تأكدت انو هذا بهاء فرحت حيل ﻻن صار هوايه مسامعة بي جاي لبيت اهلة ضليت الليل كولة افكر بي بس هوة مشافني طبعا ثاني يوم اجة لبيتنا وجايب اكل ثواب ﻻنه رمضان وطلعت ماما ..
بهاء .. شلونج خاله هذا ثواب
ماما .. هلا بيك خاله وواصل ان شاء الله بس خالة بعد لتدگ بابنا وتجي أخاف اخوتها يشكون ..

من سمعت ماما هيج گالت ضجت بس ماأكدر احجي..  حتى صوتة الي كنت اسمعة من يگول اني ويفتحولة الباب خلص بعد ماسمعة وحرموني منه ..

بهاء طول هذي المره عند اهلة مو مثل كل مرة يرجع ثاني يوم بقيت احوس اريد اعرف ليش طول هذي المرة بس استحي اسأل أخواني طبعا رقمة بتلفون اخواني وآني صار عندي موبايل بس ابد ماتجرأت اتصل بي جنت اطلع الرقم  واباوع عليه بس اخاف اتصل ﻻن مااريد يصير بينا شي بالحرام حتى لو بس موبايل كانت عندي قاعدة انه اي اثنين يصير بينهم شي بالحرام الله ميوفقهم ونهاية حبهم الفشل وميتزوجون لهذا كنت اخاف اتصل

بهاء بقى شهر رمضان كولة يم اهلة وكنت مرات اشوفة من اباوع من شباك اﻻستقبال ﻻن مضلل واكدر اشوف الشارع .. 
كنت افرح من اشوفة .. طبعا اني دايما يم الشباك بلكي اشوفة مرات اشوف بس ضهره ومرات اشوف شكلة كانت الدنية ماتوسع فرحتي من اشوفة اقضي اليوم كلو فرحانة واغني ..
كانت هذي مشاعري مقتصره بداخلي امنيتي عندي احد اسولفله اخت او احد قريب عليه .. بس للاسف دايما احس نفسي وحيده ..☹️
#بقلمي_شمس
يتبع..