وعد العيون

البارت السادس عشر

البارت السادس عشر
#وعد_العيون
#بقلمي_شمس

دخلنا للبيت لگينا عمتي گاعده .. شافتنا تباوعت بطرف عينها .. سلمت ماردت ..
بهاء .. يمه ابشرج سمر حامل ..
سكتت ولا كأنه سمعت شي .. حتى مگالتله مبروك .. بهاء انقهر حيل وگام دخل للغرفه ..
ادري بيها متحبني بس بهاء خطيه المفروض تفرح الفرحه دخلت وراه .. ومحسسته بشي . بقيت اسولف واضحك وياه وحظني ونمنا فرحانين .. #شمس

گعدت الصبح سويت ريوگ البهاء وطلع للشغل . واني طبخت تشريب دجاج . ورجعت انظف غرفتي وگلت ب 11 اطبخ التمن بعد وقت هسا ..
دخلت للغرفه انضفها .. واني دا اشتغل حسيت اكو رطوبه وشي ديوگع عليه .. دخلت للحمام شفت قطرات دم .. خفت سألت صديقاتي متزوجات اتصلت عليهم .. گلولي .. عادي تصير بداية الحمل .. بس ارتاحي ونامي ع ظهرج ..
ولتخلين بهاء يتقربلج .. ولازم تراجعين دكتوره عمود تنطيج ابر مثبته ..
اتصلت ع بهاء .. ترك شغله واجه بسرعه ..
بهاء .. گومي هسا اخذج للمستشفى
سمر .. لا مو هسا اتركها للعصر اروح الدكتوره اضبط ..
بهاء .. اوك بس ارتاحي ..
صارت الساعه 2 بديت احس بوجع خفيف بهاء تخبل .
گلي گومي نروح للمستشفى راح گال الاخته وامه اجو ويانا .. #شمس

وصلنا للمستشفى .. بهاء بقى بالباب مقبلوا يدخل .. دخلنا اني واخته وامه القاعه كبيره يسموها ردهة ..
وبيها نسوان كومه يعيطن ومنظرهن يخوف .. واكو دكتوره گاعده وره ستاره ..
بقت تسألني ..
ماما شنو عندج انتي ..
شرحتلها الحاله كولها ..
گلتلي اصعدي افحصج ..
صعدت .. وفحصتني موتتني من الالم .. حيل اذتني
گلتلي .. هاي عندج اسقاط بس بعده عنق الرحم ممفتوح
.. من خلصت فحص صار يوگع عليه هوايه دم .. احس نفسي تفيضت واني بس ابجي . اتباوع النفسي واسمع الدكتوره وعيوني بعد مااشوف بيهن من الدموع البارحه فرحانين بالتحليل واليوم راح مني فرحتي وفرحت بهاء ..
اوووووف بهاء حتى ملحگت تفرح .. #شمس

دخلت عمتي وبمكان متواسيني .. گامت تحجي عليه وتگول شبيها تبجي قابل طفله .. اشو هند مرت حماها
جابت عمليه ومبجت ..
متدري الاسقاط المه يموت .. والاشد الم هو فرحتنا الضاعت اني وبهاء .. من 2للساعه 6 اني انزف ومدخلوني الصاله الولاده .. واني اسمع اصوات الي يمي من يطلگن واني يزيد وجعي من اسمعهم ..

الساعه 6 ونص دخلوني واني ميته خوف وحدي تمنيت احد يدخل وياي عبالك مدخليني اعدام وهو فعلا اعدام شفت الموت بعيني .. سوولي كرداش بدون بنگ
حتى تشاهدت ع روحي من الوجع الي ماأگدر اوصفه احس يدخلون سكاكين وادوات حادة ويحاولون يشلعون فد شي من جسمي ومن داخل رحمي ..
بدون رحمه ولا كأنه انسانه گدامهم .. الى ان خلصوا حسيت روحي خلصت من البجي والخوف ..

طلعوني بردهة الانتظار .. شفت ماما جايه ومنى اجو الي يركضون .. بس عمتي مااجت ولادخلت بقت برة گاعده ..
ردت اطلع ضجت حيل من المستشفى .. گالوا ميصير الا تجي الدكتوره تفحصج ..
تذكرت شلون فحصتني ..گلتلهم ماافحص واطلع ع مسؤليتي .. تركت ماما وحماتي بالغرفه واخذت عباتي وطلعت .. ع شنو اتحمل الوجع ابني وخسرته ..
مو كافي وجع الكرداش والدم الي نزفته .. هو بلا كولشي اني بيه فقر دم .. ماما ومنى يلزمون بيه واني دفعتهم وطلعت مثل المخبله .. #شمس

شافني بهاء سحبني عبالي ديرجعني للمستشفى..
گوتله اتركني مااروح كوله منك .. گتلك مااريد المستشفى ادري بيهم ماعندهم رحمه .. من 2 للساعه 6 اني انزف وخلص دمي وهم يباعون عليه وسوولي كورداش بدون بنگ احجي وابجي .. #شمس

اخوانه كولهم يمه واخواني هم بس اني بساعتها مااشوف شي من الالم والغضب .. هو يتقرب مني واني ادفعه .. هو خجل من تصرفي لان اخوانه يتباعون وواكفين ..
اجه اخويه احمد .. تعالي سمر اني اوصلج للبيت ..مشيت وياه واجت ماما ورانا ..
گعدت ع الرصيف بالشارع ..
بهاء ترك اهله واجه ورانا .. رجعنا للبيت اني وماما واحمد وهو بس عيونه تعاتب من تصرفي ..
ماما .. ابقي كم يوم هنا ارتاحي ..
سمر .. لا ماما اريد ارتاح بغرفتي ..
حسيتها ضاجت وزعلت .. اني سويت هيج حتى ارجع اعتذر من بهاء وماگدرت اخليه وحده لأن اعرف بحزنه اكبر من حزني لان هو روحه بالاطفال وماصدگ يصير عدنا طفل ..
ردت ابقى يمه اخفف عليه وابررله تصرفي وياه .. الي كان من شدة الوجع الي شفته .. بس هو دخلني للغرفه وطلع بدون ميحجي .. #شمس

شويه ودخلت هند مرت حماي الي وياي بنفس البيت وعبير مرت حماي الوسطاني ..اجو يسلمون عليه وگلولي حمدا الله ع سلامتج .. بقوا يمي ساعه وطلعوا ..
شويه ودخل بهاء .. شكله كولش مهموم اول مرة اشوفه هيج ..
سمر .. بهاء شبيك بعدك زعلان مني ..
بهاء .. سمر ادري بيج ضايجه بس مو تسوين هيج تدرين امي شتگول .. مرتك فضحتنا وتعيط ودفعت امها واختك گدام العالم وكلام هوايه گدام اخواني متت بدمي ..

بررتله موقفي وگوتله شنو سوو بيه وابجي .. هو انقهر عليه وحظني گلي والله لو ادري هيج يسوون مااخليج دقيقه جوه .. اني واكف بره  من دخلتوا الى ان طلعتي وگلبي نار عليج . 
دا يحجي وشاف دم يابس برجلي .. گومني للحمام سبحني بأيديه ونشف جسمي وشعري وطلعني ..
جابلي ملابس ولبسني وخلاني بحظنه وبقينا واحد يواسي الاخ ..
#بقلمي_شمس
يتبع….