وعد العيون

البارت الثاني عشر

البارت الثاني عشر
#وعد_العيون
#بقلمي_شمس

گعدت يوم السبت من الصبح بدلت وكملت ولبست جنطه وحذاء بصلي وكب بصلي والباقي اسود .. ورتبت نفسي طلعت حلوه اتباوعت ع الساعه اشو الخط اتأخر واني متعود يرن بالهورن واطلع بس ماكو .. فتحت الباب تباوعت لگيت سياره واكفه طلعت عرفته جديد وميعرف الشغله .. #بقلمي_شمس
صعدت للسياره گلت السلام عليكم واني منصيه راسي .. رد الولد السلام .. بس الصوت مو غريب اخذ روحي وياه بس بقيت منصيه راسي ..
وگلت بداخلي شبيج سمر اي صوت يشبها يرف كلبج عليه تالي اتأخرت وهو بعده ممتحرك .. رفعت راسي اريد اگوله اتحرك لأن اليوم بس اني اداوم ..
اتباوعت شفت بهاء مكتف ايديه ويباوع بالمرايا ويبتسم ويگولي صارلي ساعه واگف منتضرج ليش اتأخرتي ..

اني مصدومه ومااعرف اوصف شعوري گلبي يدوگ سريع والساني تلعثم بعد مااعرف ارد .. اول مره اكون قريبه هيج وياه .. ونفس السياره ووحدنا ..
خجلت ووجهي صار طماطه .. گوتله اني مكمله من زمان بس لأن متعودين السايق يرن بالهورن ونطلع ..
هو ضحك وحرك .. همزين كنت كاشخه ومرتبه نفسي ..
اتباوعله متغير وحلو او يمكن لأن اول مره اشوفه عن قرب جسمه حلو وعظلات وكذا ..

بالطريق گلي شوفي هذا ونطاني موبايله .. ركزت بي صوره هديه اني منطيتها الزوجة اخوه ..
گوتله هاي شتسوي عندك ..
بهاء .. عرفت انه هاي من ريحتج واخذتها منهم ..
اني ضحكت ونصيت راسي .  صرنا قريب ع المدرسه گلي شوكت تطلعين گتله مااعرف لان المدرسه كانت تحدد ماده يعني كم ورقه تگول نخلصهن ونطلع ..
وتوصينا نجيب موبايل حتى نتصل ع الخطوط ..

بهاء .. اوك لعد سجلي رقمي يمج .. اخذت رقمه ونزلت
كملت الاضافي وطلعنا واني طايره من الفرح ..
اتصلت عليه ثواني واجة مااتأخر صعدت بالسياره وهو يباوعلي بالمرايا ومشغل اغنيه .. كولشي بالقسمه وقسمتي ارجع عليك .. #بقلمي_شمس

بعدين سألني .. سمر تعرفين تطبخين ..
سمر .. اي اعرف
بهاء .. اريدج ترفعين راسي ومتخلين احد بالبيت يتشمت بيه .. بوقتها عرفت اني داخله ع حرب والكل منتضرلي الغلطه .. حتى يتشمتون ببهاء ..
مرت الايام وخلص صفر .. وصارت خطبه نسوان ورجال .
وحددوا يوم الخطوبه .. طبعا شعور لايوصف بعد يأس دام سنوات وكان شبه مستحيل ارتبط اني وبهاء ..
اشتريت اربع بدلات .. وحده بيظه طويله كيبور ومن وره سلفي طلعت بيها اميره والثانيه لونها حليبي والثالثه فستان مو بدله قصيره وبيها فتحه من الظهر وبيها شغل من الخصر مثل الحزام لونها وردي والرابعه هم قصيره بس تجنن لونها مشمشي .. طبعا شعري كان قصير وبالصالون خلولي بوستيجه يلة گدروا يسولي تسريحه والميك اب اختاريته خفيف كولش بس طلعت حلوه ..

اجه بهاء واهله والحفله كانت ببيت خالتي .. واقربائنا كولها اجت ومن ظمنهم بيت خالو ابو حيدر كنت ماخذه ابنهم .. ونظرات الغيره والحقد بعيونهم .. لأن ابد متوقعوا راح اتزوج ولد شاب وحلو وممتزوج ..
دخل بهاء وانبهر من شافني واخذنا صور هوايه والمفاجأة الاحلى بهاء داگ حرف اسمي ع ايده ..
فرحت من شفت حرفي ..
بقيت كل ساعه البس شكل وكولها تباوعلنا واني ماهمني بس بهاء الي ماشال عينه مني .. حتى الصور كولهن طلعن يباوعلي بيهن ..
گوتله بهاء اخجل لاهيج تباوعلي مشايفني قبل ..
بهاء .. طبعا مشايفج صار سنين واني محروم منج
بعدين لبسني الذهب وكان حلو ونازك ..

ومااعرف ليش اجه عبالي .. خطوبتي بحيدر ومن لبسني الذهب شلون كان حالي ودموعي وكسرة خاطري وبكل ذكرى احمد الله واشكره الف مره ..
لان هسا احس بسعاده محاستها من قبل ..
خلصت الحفله وكل واحد راح البيته ..
آني وبهاء بقينا للصبح نسولف مانمنا هو يحجي عن عذابه وهو بعيد عني .. واني اگوله عن فرحتي من اهله قبلو .. وبعدين سولفتله عن كسرة خاطري وشلون نجبرت بغيره واحجي عن عذابي وانتظاري واليأس الي عشتة سنين كنت احجي وابجي وهو كذلك لل 4 الفجر احنه نسولف بعدين نمنا .. لأن ب 7 عنده شغل خطيه

بعدها بكم يوم قررنا نروح لمنتزه .. كنت فرحانه لأن اول مرة نطلع سويه .. كان طول الطلعه لازم ايدي وكان كولش رومانسي وياي .. وبس يدلعني .. حبيته بكل تفاصيله ..
گام كل يوم من يرجع من الشغل يمر عليه .. اني سويت قلاده بأسمه وكنت البسها دايما ..
وهو هم فاجأني وكاتب اسمي كوله بالانكليزي ع ايديه .. اني گمت اعيط من الفرح وهو يسد بحلگي ويضحك
بهاء .. ههههه فضحتينا كافي ..
بهاء كان مدللني وبين فتره وفتره يشتريلي ملابس وشالات وكان اكثر شي يشتريلي ملابس داخليه واني اخجل 🙈 بس هو ميگعد راحه ..
كان مرات يجي بالليل ونگعد سويه .. فترة خطوبتنا كانت 5 أشهر بس كانت احلى ايام بحياتي .. وبهاء كان رومانسي كولش ويحب يتغزل ..

بعدين گمت اتواصل وي اخواتي من بابا ملاك وهديل اخويه علي نطاهم رقمي .. طبعا من انخطبت غيرت رقمي وانحذف رقم بابا بس صرت اتواصل وي اخواتي واعرف اخبارهم ومره اجونا للبيت وي امهم ..

#بقلمي_شمس
يتبع…