#صراع_سلطان
الجزء14
طلعت ويا الخدامه للسوك هاي أحب شغله إليه أغير جو وأتونس لان طلعه وطبه ماكو واني ماعرف اخبار عن سلطان ظليت الوب مشتاقتله اهواية فكرت اطلع وياها حتى اروح مناك واشوفه كتلهم يسبقوني ومن يخلصون يخابروني نرجع سوية رحت على بيت جدي جان هوسة يم الباب دخلت عبالك عزا شفت ام سلطان وسارا كاتلين روحهم بدون ماافهم شنو السالفة بديت الطم واملخ بروحي لحد ماوكفتني نجوى كل بالي احتمالات مو زينة وسلطان صاير بي شي
مخبله هاي شدتسوين خو ماميت بس محبوس أحتمال بعد ساعة يطلع تدرين منو رجع
شنو سلطان محبوس وليش مكلتيلي البارحة شمسوي راح انجلط احجي
شمدريني بعائلتج واحد يكتل الثاني يكولون قاتل منصور خطيب اسيل بنت عمج وخالج كامل كاعد ويا أمج بغرفة سلطان
خالي كامل اشكد مر سنين واسمه بس باقي محفور بذاكرتي بينما شكله اشكد احاول الكا اله شبيه افشل
راح أطلع بكفالة بعد ماشرحو جثة منصور تبين ماميت بالطلقه جان مسموم تأكدت هاي شغلة قصي وكعني بفخ أستلمت غراضي وركبت سيارتي اريد أوصل للبيت أشوف أمي بعدها راح نتواجه ياقصي دخلت شفت مي وسارا وامي مسووين مجلس عزا سلمت من بعيد وعبرتهم لغرفتي شفت عمتي وياكامل
حمدلله على سلامتك شيخنا أتصور راح تعيد حساباتك بعد اللي صار وأعتبر هذا درس حتى تراجع نفسك
صدك سلطان اللي سمعناه شلون راح تتصرف لو بيدي اروح أعدم عشيرة اليامور نفر نفر ولا يرمشلي جفن
ممكن تطلعون ثنيناتكم برا اكثر من عشيرة اليامور أنتو الأثنين كسرتو ظهري عمتي مكفاج سنين خانكه بنتج وانت حضرة ماعرف شنو ليش رجعت وبعد شنو ماعندك مكان يمنا أخذ أختك وطلعو من هالبيت
خلينه وحدنا صفية اريد احجي ويا سلطان الظاهر اعصابه تعبانة
خالي كامل رجع مااصدك ركضت على غرفة سلطان شفت امي تطلع صاحتني مهتميتلها اريد أشوف كامل صحت ليش رجعت بعد هالسنوات ليش تخليت عني حرام عليكم ضيعتوني وابجي أيدي على وجهي مكدرت اسيطر على نفسي
سمعت صوت شابة معرفت منو بس من حجيها عرفت هاي مي كبرانة صايرة عروسة عيوني دمعت اقتربت أضمها بقت ترفسني وتبتعد خليتها بحضني وأني أبوس براسها أشم بيها ريحة أبويه كعدتها بحضني وهي تبجي خليتها ترتاح أشرلت لسلطان يخلينه وحدنا
أريد اطلع كامل من حياتي تأخر بالرجعه دروبنا أختلفت سمعت صوت مي يالله بكل مصيبة انتي موجودة يمكن أنولدتي للمصايب يمتى ترتاحين وارتاح وياج بعد سلسلة أفكار براسي طلب مني كامل أعوفهم وحدهم غرت منه شفت مي بحضنه وهو يبوس بيها.
