من متى و الغصـن يختـار الطيـور..!!

35

  ،
إن لم يزدك البُعد "عشقاً" فأنت لم تُحب حقاً.

،
السنين الماضيه ما زادت الحب الا عشق..بقلب كل عاشق ومفارق.. النظرات التواقه والأيدي المرتجفه ونبرة الحنين باصواتهم.. كلها دلالات ع العشق والشوق الدفين..
لكن هل جروح البعد سمحت للقسوه ان تغلف بعض تلك القلوب العاشقه ..؟!
،

الاحداث السرديه*
... . واقف طول ساعات العمليه عند باب قسم العمليات..الساعات طالت و الانتظار يحرقه... اليوم حزنه على ابوه منغص فرحته في لوجين وشوفتها..
سنيين غيابها عنه مازادته الا لهفه وشوق وحب يتجدد.. نظرات عيونها الحاده ونبرة كلامها الناشف والقسوه معه قبل العمليه، زادت حيرته..
حس بيد تربت على كتفه/الف سلامه للوالد ان شاء الله يقوم بالسلامه
مشعل التفت عليه/يا رب.. هلا رامي.. وش جابك هنا
رامي/جاي بوقف معك،شدعوه مشعل
اقبل عمر ومعه كوبين قهوه/اووهو جيت يا رامي.. ماجبت لك قهوه، اقعد بها
مشعل تنهد ومد الكوب لرامي/مالي نفس يا شباب.. خلوني شوي..
عمر /اكيد اللحين بيخلصون.. مرت ساعات.

*بعد نصف ساعه زياده...
طلعت سوزان..
مشعل خاف واتجه لها/لو سمحتي شلون الوالد..
سوزان/لا تخاف ،اللحين بتطلع لكم الدكتوره وتشرح لكم كل شي
راحت سوزان..
طلعت لوجين ومعها ممرضه وكانت تكلمها بصوت غير مسموع..
مشعل شافها مطنشته ورايحه اتجه لها/دكتوره بشري
لوجين وقفت والتفتت عليه، وكلمته برسميه/ابوك بخير وحاليا بغرفة الافاقه.. اذا تعدى هالمرحله راح نوديه للتنويم... عن اذنك
مشعل ما تقبل اسلوبها الرسمي معه، ضيعت فرحته بابوه و ضاق صدره/لوجين لحظه.
لوجين ما ألتفتت عليه،مشت والود ودها ماتتركه،طلعت جوالها و كلمت طريقها /..
مشعل ضل واقف يشوفها رايحه مايدري وش يسوي.. ،
رامي اتجه لمشعل/ الحمدلله ع سلامة الوالد
مشعل/الله يسلمك
رامي وعينه على لوجين وهي رايحه/ما شاء الله ع هالدكتوره ،والله انها حشيمه
مشعل ابتسم وهو يأيد كلامه/انا اشهد
عمر جاء بعدما سكر جواله/مشعل حجزت لاختك وزوجة ابوك وبيجون ع اول طايره هنا
مشعل ضاق صدره من طاري زوجة ابوه/انا طالع امشي شوي

/
/
/
/
/
/
/
وصلت المستشفى واتجهت لعيادتها حطت اغراضها بسرعه.. وهي تتذكر مكالمة لوجين لها قبل شوي بالسياره..
طلعت بسرعه لعيادة لوجين بالقرب من اقسام العمليات..
اتجهت لعيادتها ..وفتحت الباب/لوجين وش صاير
لوجين كانت جالسه ع الصوفا وكأن مكبوب عليها ماء بارد،تجمد فيها كل شي بعدما شافت مشعل من جديد،احتياجها اكبر من قبل،شوقها اكثر من قبل، تجاهلت مشاعرها بما فيه الكفايه طول هالسنين،كانت بخير لكنه ظهر في حياتها فجأه وعفسها/..
لمياء اتجهت لها وجلست عندها/لوجين انتي بخير؟
لوجين هزت راسها بالإيجاب/
لمياء خافت/اشفيك سااكته.. كيف صارت عمليتك اليوم .عساها عدت ع خير
لوجين بهدوء مصدومه/المريض كان عمي فيصل
لمياء تفاجأت/من جدك؟
لوجين وهي تغمض عينها وتسند راسها وتتكلم براحه/كان بين الحياة والموت.. انا من 6ساعات بغرفة العمليات،كنت خايفه افشل مليون وسواس دخل براسي..نفسيتي تعبت كثير.. عمري ماكنت اخاف من عمليه اسويها.. الا هالعمليه اخذت من مجهودي النفسي اكثر من اي شي..
لمياء تعاطفت معها/حبيبتي لوجين.. اجل روحي ارتاحي بالبيت وش تنتظرين
لوجين كانت تبي تقولها عن مشعل وسمعت صوت احد يطق ع باب العياده واتجهت لمكتبها/نعم نيرس؟
الممرضه/دكتوره عايزاني احدد لك مواعيد بكره
لوجين بارهاق/نيرس ساميه وبعدين معك... بكرا الجمعه صحصحي شوي
الممرضه تفشلت/ايوه صحيح نسيت... بس
لوجين صارت تلم اوراقها وترتب شنطتها/لمو ،انا طالعه اتصلت بالسايق من ربع ساعه اكيد وصل
لمياء/لوجين انتي كنتي بتقولين لي شي،شفتي مشعل صح؟
لوجين وصلت للباب ووقف شوي،كانت بتحكي لها.. ولكنها كملت طريقها وطلعت من المستشفى وكأنه احد يلاحقها/..
،
لمياء حست ان الموضوع فيه مشعل (هاللخبطه والارتباك وراها مشعل اكيد.. غريبه هالسنين... بدل ماتقتل الحب تزيده وتلهب نيرانه.. نفس الشعور يا لوجين لكن وضعي غريب وصعب ابوح به)
،
،
،
،

وصلت بيتها.. نزلت بسرعه من السياره واتجهت للداخل تمنت ما تشوف احد قدامها ..كانت مستعجله
ايمي كانت جالسه تشوف افلام كرتون بالصاله وشافتها ولحقتها/ماماا...
لوجين ماردت عليها صعدت فوق ودخلت غرفتها بسرعه وقفلتها وانهارت بالبكاء..
ايما وقفت وراء الباب وتطقه بيدها الصغيره وتنادي/ماما افتحي
لوجين كانت تبكي جلست ع سريرها ويزيد بكاها وهي تتحسس معصمها بعد مسكت مشعل لها، معاد فيها على البعد اكثر..
ايمّا من وراء الباب بكت/ماامااا افتحي لي الباااب
لوجين قامت غسلت وجهها بسرعه وحاولت تهدأ علشان بنتها.. واتجهت للباب وفتحته/ايمّي
ايمّا اتجهت لها وضمت رجليها وهي تبكي/
لوجين نزلت لها وحملتها واتجهت بها للصوفا وجلست معها/البنوته الشاطره ماتبكي.. يلا اششش
ايمّا بدأت تهدأ وتذكرت السالفه/ماماا
لوجين وهي تبسم لها/ي نعم
ايمّا/بابا رجع من الثفر؟
لوجين استغربت/من يقوله؟
ايمّا/اليوم في باث الروضه نايف يقول ثاف daddy
لوجين خافت وما علقت/...
ايمّا/ماما فين بابا
لوجين بضيق/بابا قلتلك مسافر.. ليه دوم تسألين؟
ايمّا وهي تطالع في امها/بث.. ابي اثوفه خليه يرجع بثرعه
لوجين يغيضها هالطلب وتحس بغيره وكأنها مقصره ،ضمتها/وانا ماتبيني خلاص؟
ايمّا ضمتها/احبك بث ابي بابا بعد. قولي له لا يثافر مره ثانيه
لوجين بتنهيده/لو فيه قلب يحس ما تركنا كل هالسنوات ..آآه يا مشعل قد ما انا حاقده عليك واتمنى اقتلك قد ما انا اعشقك واموت فيك.. تعبت من هالحساب القديم ابي انهيه وارتاح
ايمّا مافهمت شي بس ضلت بحضن أمها وساكته..
/
/
/
/
/
/

نعود للمستشفى*
دخلت عيادتها وجلست بمكتبها ،اليوم مافيه حالات طارئه وقسمها هادي عكس العاده..
دخلت الممرضه تبي تفهمها باللي سواه عُمر بعدما راحت/دكتوره فاكره المريضه فاتن ..اللي باشرتي حالتها قبل امبارح..
لمياء مستحيل تنساها/ايش بها؟
الممرضه/محدش تابعها بعدك.. جوزها رفض اي حد يشوفها غيرك
لمياء عصبت وعقدت حواجبها/يعني ايش الكلام هذا بيعلمنا شغلنا.. والا كيف..
الممرضه/والله حاول الدكتور هشام يقنعه ولكنه كان معصب ومعند ..
لمياء تضايقت وتكلمت بصوت غير مسموع/هذا ايش يبي مني؟
شوي ودخل عندها/مساء الخير
الممرضه/اهوه وصل.. عن اذنك
لمياء بنبرة صوت جاده/خليك مكانك لا تطلعي... نعم اخوي؟!
عمر بابتسامه/لو تتذكري البارح ،قلتي أسمي من دون اذكرك فيه.. مع اننا اخر مره التقينا فيها من 5سنوات.
لمياء تذكرت اللي سوته البارح، شلون ما نسته/...
عمر ابتسم و بدون تفكير/ معقوله للحين مانسيتيني؟!
لمياء استحت من الممرضه/روحي انتي شوفي شغلك..
طلعت الممرضه وهي ودها تقعد من فضولها..
عمر ابتسم/كيفك لمياء؟
لمياء تنرفِزت من اسلوبه البارد وهي تحس كأنه يلعب بمشاعرها وهو متزوج/انا بعادتي ما انسى احد.. مو بس انت يا أخ عمر ، مثلاً جيراننا من 6سنوات كان عندهم كلب ومسمينه جوي".. هذا انا مانسيته للحين بالرغم من كرهي للكلاب.
عمر انصدم من هالتشبيه/اللحين انا والكلب سوى!!
لمياء وهي تلهي نفسها بملفات المرضى/انت شكلك مو ناوي تتكلم عن شي يخص عملي.. لو سمحت اطلع ماني فاضيه لخرابيطك.. زوجتك راح تتحول للباطنيه.
عمر جن جنونه وتصرف بغباء وتهور/وان قلت لك لا.. وش بتسوين؟
لمياء حاولت تهدأ و تصنعت الهدوء/سيد عُمر.. ممكن تتفضل برا، قبل ينزل بينا مستوى الحوار ،لأن واضح انك ماتدري ايش تبي،وعن ايش تتكلم
عمر حس بنفسه يغرق في بحر من الغباء.. وهو يستجدي منها الكلام ويحاول يطول معها الموضوع،رجع لعمر الحقيقي وصد/انا آسف لو كنت ازعجتك.. واسف لو احرجتك قدام الممرضه. انسي هالمقابله اعتبريها ما صارت.انا جد آسف.
لمياء تحب ذوقه وتعرف معدنه،لكن برضو ما ردت عليه، ووقفت وكأنها تبي تطلع..
،
طلع عمر بسرعه.. وهو ناقد على نفسه.. شلون سوى هالشيء.. من اعطاه الحق يناقشها بهالاسلوب..
،
لمياء جلست براحه و ابتسمت ماتدري ليه حاسه بسعاده بعد لقائه،تقلب شخصيته واصراره عليها، ان دل على شي.. فهو يدل على شي وااحد "..
رن جوالها وردت وهي تتبسم/هلا يممه..
ام زياد بالجوال/هلابك حبيبتي.. شلونك
لمياء بصوت مرتاح/مبسوووطه
ام زياد/باين بصوتك ،عساك دوم مبسوطه
لمياء/امين يا رب..
ام زياد/شوفي يا بنتي.. ترى زياد اخذ ساره معه مدري وين انا منعته بس هو قال بيمشيها..اخوك ما يعرف يتصرف مع الصغار
لمياء ببتسامه/بسيطه يمه يمكن بيوديها السوبر ماركت وراجع..
لحظات ودخلت الممرضه/دكتوره في حالة طوارئ
لمياء/يلا ماما عندي شغل ضروري اشوفك بالبيت سلام
سكرت جوالها وطلعت بسرعه..
،
،
،

في جناح ابو مشعل.. ،
في زيارتها اليوميه لمرضاها ،واقفه قبال سريره برسميه وساكته ماتتكلم الا مع الممرضه.. وتشوف وضعه من خلال اوراق الكشف حقته..
بو مشعل كانت حالته الصحيه مستقره لكن نفسيته كانت حيل مضطربه.. وهو يشوف البنت اللي كان ناوي يقتلها هي اللي اهتمت به وانقذت حياته رغم كل اللي سواه لها..
لوجين علقت الملف ع سريره ولفت تبي تطلع وهي حاسه بنظرات الحزن بعيونه بس ماتحب تشوف الانكسار بعيون احد..
بو مشعل بصوت أنهكه المرض/لوجين يا بنتي
لوجين وقفت بدون تلتفت وهي كارهه نبرة الضعف في صوته.. استغربت ان حقدها عليه راح بعد هالنبره.. كل المشاهد البشعه واساءاته لها راحت وهي تشوفه ضعيف وطريح الفراش.. وهي اللي منقذته بعد الله..
بو مشعل حز بخاطره وهو يتذكر اساءاته لها/معك حق تعطيني ظهرك.. وما تحترميني
لوجين لفت باتجاهه بهدوء/عمي لا تتكلم كثير ،حالتك ما تتحمل،جرحك للحين طري
بو مشعل نزلت دمعته/انا كنت ناوي اذبحك وانتي اللحين خايفه علي؟!!
لوجين قربت منه ومسحت دمعته اللي بللت لحيته البيضاء،تكره دموع كبار السن/ماتعودت اشوفك كذا... لا تخرب صورتك عندي...
بو مشعل/انتي تزيدين قلبي وجع بطيبتك هذي.. عاتبيني اجرحيني... عاقبيني
لوجين حبته على راسه/محشوم عن العتب واللوم.. وعفى الله عما سلف.. ماتدري وين كانت الخيره.. هذا انا صرت طبيبه ويوم انت احتجت لقيت بنتك تعالجك ..وان شاء الله معاد تحتاجني..
بومشعل/فعلاً الخيره فيما اختاره الله ،لكن دينك هذا برقبتي لين اموت..
لوجين ابتسمت تبي تصفي حياتها وتتصالح مع الماضي وترتاح.. كانت تفكر بأولادها.. وانه لازم يعرفون اهلهم..صارت اكثر نضج.. و تفكر بعقلانيه،باست عمها على راسها/أنا مابي منك غير تخلي لي من دعواتك نصيب..
بو مشعل بابتسامه/الله يسلم اللي رباك وخلاك دكتوره نفتخر فيها
لوجين بادلته الابتسامه/تقدر تقول هالكلام لأخوك.. واظن جاء الوقت اللي ترجعون اخوان مثل قبل صح؟ هالعايله لازم تكون مترابطه يا عمي..
بو مشعل/انا مستغرب ان ماجد ما زارني ..اكيد ما قلتي له
لوجين/بالحقيقه ماقلت له... وناويه اجيبه حتى لو انت ما طلبته..
بو مشعل سكت بابتسامه..
دخل بهاللحظات مشعل وانبسط بوجودها/السلام عليكم
لوجين بسرعه رجعت الكمام ع فمها وانفها بدون اهتمام لمشعل/يلا عمي ..انا طالعه وراي مرضى لازم اشوفهم
بومشعل/الله يوفقك يا بنتي..
طلعت لوجين بدون حتى تطالع فيه...
مشعل ما استغرب تصرفها بس ضاق صدره وراح لأبوه وهو ساكت وباين متضايق/..
بو مشعل فهم ولده/تستاهل
مشعل طالع في ابوه مستغرب/وش سويت
بو مشعل/تستاهل الصده .. واحد عنده مثل هالجوهره و يفرط فيها.. !
مشعل بضيق/يبه لا تنبش الماضي.. ترى ما فرطت فيها من كيفي انتم ماقصرتوا
بو مشعل/الرجال اذا ما حب يخسر زوجته بيقاوم كل شي وما يسمح لشي انه يفرقه عنها.. بس انا ماشفتك متمسك فيها ورحت تدورها وتستسمحها. وانت عااارف انها مستحيل تجيب الرديه.. ومستحيل تكون مثل ما ظنينا فيها..
مشعل انقهر من كلام ابوه/يعني بالنهايه طلعت انا الغلطان؟!!
بومشعل/انت كنت سلبي في كل القصه.. مع ذلك انا ما اجرد نفسي واجرد امك من الذنب.. كلنا اخطينا بحقها
مشعل انفجر زعله/تتهمني وكأني طلقتها غيابي..
بومشعل تضايق من نفسه وصد/الله يسامحني..
،
،
،
،

في غرفتها اللي متنومه فيها.. كانت فاتن تسمع كلام الطبيب وهو يقولها نتائج الفحوصات وهي منهاره من داخلها. نفسيتها صارت صفر.. فكرت ياللي سوته بحياتها و بولدها من بيداريه بعدها..!
الدكتور/انا ما كنت بقولك النتائج لولا اصرارك علي..
فاتن بهدوء مصدومه/ماتفرق دامني كذا كذا بعرف
الدكتور/احنا لازم نبدأ بجلسات العلاج من هذا الاسبوع.. استعدي ..
فاتن/دكتور ممكن اطلب منك طلب
الدكتور/ممكن
فاتن/لا تقول لزوجي عن نتايج الفحص
الدكتور/بس.. هو راح يعرف اذا خضعتي للعلاج و..
فاتن/ماراح اخضع لأي علاج
الدكتور انزعج/بس ..
فاتن بإصرار/ارجووكك.. ماني حابه اتعالج..
الدكتور/ليه تعاقبين نفسك، المفروض تقاومين علشان زوجك وولدك
فاتن سكتت وهي تقول بخاطرها( انا لازم اموت علشان عُمر يرتاح بحياته ويذوق السعاده اللي حرم نفسها منها..)
الدكتور طلع من عندها وهو متضايق من قرارها...
لحظات ودخل عمر ومعاه عبود.. واستقبلتهم بنشاط وابتسامه ولا كأن فيها شي..
،
،
،
،
في الصاله كانوا الصغار توهم راجعين من الروضه وبلبسهم الرسمي وجالسين مع جدهم اللي جالس ويشرب فنجان قهوته ونزله ع الطاوله وقام/يلا يا هدى انا رايح المستشفى
هدى استغربت/ليش؟
ماجد/لوجين متصله فيني وتقول تبيني بموضوع
هدى/ماقالت لك ايش هوه
ماجد/لا.. بروح واشوف ..
نايف انبسط/جدي بروح معااك
ماحد بابتسامه/لا حبيبي،انا عندي شغل غير مشوار امك
نايف ما رد عليه وجاته فكره...
قام بسكات من دون يحسون عليه وراح من باب المطبخ الخارجي واتجه لسيارة جده وركبها وتخبى بالمرتبه الخلفيه..
ماجد ركب السياره شغلها ومشى.. ماحس عليه..
نايف كان حريص انه مايحس فيه.. لانه عارف انه بينزله..
وصل ماجد المستشفى ونزل ودخل المستشفى..
نايف رفع راسه وهو مبسووط وهو راسم ابتسامة الانتصار.. فتح باب السياره.. ونزل ودخل ..
الريسبشن كان فيه موظفات يعرفونه/نااايف.. تعااال تبي ماما؟..انت نايف والا مشعل
نايف تلفت بخوف وهرب داخل.. داخ راسه ..ماشاف جده بأي اتجاه راح.
الموظفه نادته/ناايف.. مدري مشعل.. ماما من هنا..
نايف ما سمعها لانه ابعد.. بدأ يدخل بهالغرف يدور ويهرب..
،
،
،
،
،
بالسياره
راجعه من دوامها ..وهي متعبه ومجهده. كانت عيونها تشوف الاماكن ووجوه الناس، وتتبسم بتفاؤل بوجه الدنيا .مرت سنين على وفاة زوجها.. كملت دراستها وتوظفت معلمه في احد المدارس الخاصه بذوي الاحتياجات الخاصه.. تستمتع وهي تخدم هذي الفئه،تلقى راحتها فيها.. كانت تتصدق عن جابر كل ما سمحت لها فرصه.. تدعي له بكل وقت.. جابر حبها من جد.. وهي ما بادلته الحب لكن قررت تعطيه شي اغظم من الحب وهو الحسنات والصدقات الجاريه..
وصلت هنادي البيت.. ودخلت..
شافت خالها جالس يتقهوى مع زوجته واتجهت لهم وسلمت/مساكم الله بالخير
ام عهود/مساك الله بالخير يا أبلا هنادي
هنادي بابتسامه جلست/شلونكم
ابو عهود بابتسامته/بخير ،تأخرتي اليوم
هنادي/اليوم كان فيه يوم مفتوح.. والطلاب مبسووطين . مددوا الاحتفال ساعه علشانهم.. انت تعرف ظروفهم
ابو عهود/بس يا بنتي وش لك بهالتعب بس.. تعب وبس..
هنادي/خالو... انا مبسوذه بهالشي اللي اسويه.. صدقني
ابو عهود/دامك مبسوطه.. اجل الله دووم يسعدك
ام عهود غمزت له علشان يفتح الموضوع/اسمعي يا بنتي.. هالمره ابي افاتحك بموضوع مهم ولازم تـسمعيني
هنادي عرفت الموضوع وقاطعته/خاالي، مين الخاطب هالمره
ام عهود تحمست/بندر ابن حماتي
هنادي اعتفست/بندر عبدالرحيم؟ ماغيرو
ابو عهود استغرب ردة فعلها/ايوه هوو
هنادي قامت متنرفزه/هذا استحااااله اتزوجه
ابو عهود/طيب ليش يابنتي
هنادي/حاب تعرف ليش؟... أسأله مين كان يتعرض لي ويرسل رسايل صبيانيه مع اخته الصغيره.
ابو عهود/انتي بتجننيني.. انتي شكلك ماتبين تتزوجين
هنادي بحزم/شوف ي خالي رجل اقل من عمر36سنه مستحيل اتزوجه،انا تزوجت قبل كذا ومن حقي اللحين اقولك عن رأيي في اللي بيتزوجني..
ابو عهود جاه احباط/انتي تطلبين المستحيل
هنادي باسته على راسه/بالنهايه.. ماراح اخذ غير نصيبي.. صح؟
ابو عهود يسايرها/صح..
هنادي بابتسامه/ويمكن بعد نصيبي ما اتزوج ..واقعد عندك طول العمر.. يلا سلام حابه انام شوي قبل العصر
راحت هنادي..
ام عهود بابتسامه/احب هالبنت.. تحسها عاقله ومتفهمه الحياه الله يسعدها
ابو عهود/امين..
،
،
،
،
،
قسم التنويم..
حرصت ام مشعل انها تزور ابو مشعل في هالحاله الصحيه الصعبه.. تغيرت جداً ام مشعل. الفراغ بعد شتات العايله خلاها تفكر بطعم السعاده اللي كانت فيها بين عيالها وزوجها ببيتها.. لكن لا فات الفوت ما ينفع الصوت..
دخلت بكامل وقارها مع مشعل، وشافته ملقى ع سرير المرض وباين عليه الشحوب... تغير عليها حيل لها منه سنين ما شافته،قربت من السرير شوي علشان يسمعها/السلام عليكم يافيصل
بومشعل انتبه لها بعد نبرة صوتها/وعليكم السلام،هلا يام مشعل
ام مشعل خنقتها العبره/الحمدلله على سلامتك ي بومشعل طهور ان شاء الله ماتشوف شر
بو مشعل بحنين/الله يسلمك من الشر.. مشعل جلّس امك وصب لها قهوه
مشعل انبسط/ابشر يبه
ام مشعل/لا مافيه داعي انا جايه اتطمن عليك واتحمدلك بالسلامه.. وماشيه
بو مشعل/وان قلت علشان خاطر مشعل،..
مشعل وهو يبوس راسها/لا تفشليني يمه..
ام مشعل راحت وجلست/ليه كل هالمغذيات والانابيب.. عساها مؤقته
مشعل/ايه مؤقته..الدكتوره تقول بيشيلونها بعدما تستقر حالة جرحه
بو مشعل جالس يفكر بلوجين واللي سوته له، اعاد حساباته كلها من جديد.. اللي سوته لوجين معه خلاها اقرب شخص له.. غيرت قناعاته ونظرته لها وللواقع..
ام مشعل/الدكتوره قلت لي انها لوجين صح؟
مشعل وهو يمثل اللامبالاه/ايه هي..
ام مشعل/والله ونعم فيها.. هالبنت كفو.
،
لحظات ودخل عندهم نايف الصغير ،لابس لبس الروضه الرسمي شورت اسود وقميص ابيض كمه ربع وربطة عنق سوداء،ومعلق على صدره بطاقه تعريفيه كان خايف احد يكشفه.. وتفاجأ بالناس اللي بالغرفه ..
مشعل كان يغسل فنجان القهوه لأمه/وصلت ساره؟
ام مشعل ابتسمت/لا والله مب ساره...تعال ي حبيبي
نايف ارتاح لان الغرفه مافيها ناس كثير ارتاح للعجوز اللي جالسه
ابو مشعل/شكله مضيع.. تعال يا ولدي
مشعل طلع من دورة المياه والفناجين بيده/شفيكم تنادوني ..
ام مشعل/ههه مانناديك ننادي هالمزيون
نايف فتح عيونه ع الآخر وهو يلتفت صوب مشعل،اتسعت ابتسامته وتكلم بصوت غير مسموع وكأنه يكلم نفسه/بابا!!
مشعل نزل الفناجين واتجه لنايف/حبيبي شكلك ضايع من اهلك..
نايف انقهر وذبلت ابتسامته ،لانه يظن ان ابوه ينكره،ماتكلم...
مشعل انتبه للبطاقه التعريفيه اللي معلقه على قميصه "نايف مشعل ال عاصم" جاه خرس مؤقت وهو يتأمل ملامح الولد ..
ام مشعل/سبحان الخالق الناطق..ذكرني فيك وانت صغير لك صوره انت فيها نسخته.. ونفس مكان الغمازه بعد
ابو مشعل التفت عليها/عز الله صدقتي
مشعل امتلت عيونه دموع وهو يلمس خد الولد بحنان/أمك اسمها لوجين،صح؟
نايف مد يده ومسح دمعة ابوه/بابا ليه تبكي..انا احبك لا تثافر مره ثانيه
مشعل ضمه بقوه،ضمه بشوق السنين وعاطفة الابوه اللي حابسها له سنين ضمّه لين طاح عقاله وحمله من ع الأرض وهو يضمه لصدره بقوه وكأنه بيسكنه بين اضلاعه..
ابو مشعل وام مشعل ضلوا متفاجئين..
ابو مشعل حاول يستقعد ولكن ماقدر..
ام مشعل اتجهت لهم وهي تبكي من شكل مشعل يبكي بعمرها ما شافته هالشكل بعدما صار رجال/قلبي كان حاس،ارتحت اول ما شفته،الدم يحن
مشعل وهو /ولدي يمّه هذا نايف
ام مشعل مدت يدها لنايف/تعال ي حبيبي انا جدتك
نايف رفض ودفن نفسه بحضن ابوه/لا
ام مشعل ابتسمت بدموع/لك حق ترفض.. انا قد عذبت امك وهي حامل فيك..
مشعل ما يبي يتذكر اوجاع الماضي وولده بين يديه بعد،كل هالانتظار القاتل/نايف انت جاي مع مين؟
نايف/جيت مع جدي..هو ما يدري انا اتخبيت بثيارته.
مشعل انبسط بوجوده وضل يبوسه ويشمه مو مصدق ان ولده باحضانه( جابك الله يا روح ابوك،تمنيت هاللحظه وكنت مستعد انتظرها عمري كله )
،
،
،
،
،
بالممرات رايحين لقسم التنويم..
ماجد مو مصدق/شلون هذا كله صار وما قلتي لي
لوجين/ما امداني يا ابوي،جدولي مزحوم.وانت دوم مشغول بعد.قلت اليوم احجزك و اناديك اكلمك بالموضوع بالمستشفى علشان بالمره تشوف عمي..
ماجد ابتسم لها وناظرها بفخر/والله وحققتي حلمي وخليتيني افتخر فيك.. اللي سويتيه لعمك شي يرفع الراس، المسامح كريم
لوجين ابتسمت/خلاص يا ابوي ماعدت صغيره ،كبرت وصرت أم وانا بصراحه مابي عداوات مع احد من اهل اولادي..وناويه اخليهم يقابلون ابوهم. بس مو اللحين
ماجد/عين العقل يا بنتي
لوجين حاولت انها تكون متماسكه لان الوضع موترها هالايام بعد شوفة مشعل/يلا ابوي.. هذا جناح عمي.خلك هنا شوي وبناديك
،
انفتح الباب ودخلت لوجين ومعها ابوها/السلام عليكم..
الكل/وعليكم السلام
نايف خااف من امه وبسرعه دفن وجهه بحضن ابوه..
مشعل ابتسم وخبى نايف وراه عنهم وهمس له/لا تخاف
لوجين وعينها ع مشعل وهو يخبي احد،ماتوقعت1%انه ولدها،اتجهت لعمها/مساء الخير عمي.. شلونك اليوم
ابو مشعل/انا بخير يا بنتي
ام مشعل/هلا بلوجين.. شخبارك بنتي
لوجين مسستغرربه هاللطف منها بس تجامل/تمام.. ايوه عمي فيه شي يوجعك.. تحس بوخز محل الجراحه؟
ابو مشعل وهو يأشر عليه/ايه احس به من هنا
لوجين ابتسمت/لا تخاف ..هذا الجرح يلتأم وبتطيب ان شاء الله انت بس ريح راسك ولا تشيل هم شي ولا تتكلم كثير مثاما قلت لك.
ام مشعل/ما شاء الله صبرتي ونلتي..
لوجين ما ارتااحت من تصرفات مشعل لكن ماراح تكلمه مهما كان.. بس لمحت جزمة نايف وسمعت عطسته و خزت مشعل لان حركته مريبه/اشوف هاللي مغطي نفسه معك
نايف تشبث اكثر في مشعل وهو خايف/ماما انا
لوجين اتسعت عيونها من المفاجأه ماصدقت انه ممكن يسوي كذا/نااآيف!!
نايف التفت عليها،ويطالعها ببرائه/ماما انا اثف اثف
لوجين وهي تكبت غضبها من تصرفه اتجهت له ومسكته من معصم يده ونزعته من حضن مشعل/كيف جيت هنا؟!
اخذته وطلعت برا الغرفه/ان ما وريتك.. عقابك بيكون عسير
ماجد استغرب/اش جاابه هذا؟!!
لوجين/ابوي انت روح لعمي ينتظرك.. وانا بعرف بعدين كيف جاء هالنتفه لمكان شغلي.راح يتعاقب
مشعل شاف عمه ماجد ولكن لحق لوجين اللي تمسك نايف بقوه وهو يتألم/حصل خير لوجين، لا تعصبين عليه ا..
لوجين التفتت عليه قاطعته بعصبيه/مالك شغل انت..فاهم!
مشعل تلفت حوله محد موجود بالممر غيرهم/لوجين!!!
ام مشعل وابو مشعل حسوا ان فيه كارثه بتصير ومايقدرون يتدخلون خايفين تزعل لوجين مافيهم يتدخلون ابداً..

مشعل وقف مصدوم من نيران الحقد والكراهيه اللي يشوفها ببريق عيونها وكلامها القاسي معه...!!
لوجين اتجهت له بالكلام وبنبرة تهديد/صحيح يحمل اسمك"للأسف".لكن هذا عمره ماراح يعطيك حق ولا يشفع لك بعد كل هالسنين تدخل بيني وبينه..
ماجد يسمع ومو مصدق كلامها.. ماكانت تسب مشعل وعمرها ماكنت قاسيه مع اي انسان.. ليش مشعل!!
لوجين مشت وهي تشيل ولدها وتركت مشعل واقف مكانه مذهول من اللي سمعه منها.. زاد قهره اكثر.. لأنه ضحى طول هالسنين ومنع نفسه يشوف عياله علشانها طلبت منه ما تشوفه.. وهي ماقدّرت هالشيء.. !!
ماجد ربت على كتفه/ماعليه يا ولدي ..اعذرها
مشعل التفت عليه وعينه تحكي قصص من الحرمان/عمي قول لي انا وش اخطيت عليها فيه؟..كل اللي سويته اني نفذت كل شي هي طلبته مني،حرمت نفسي من عيالي علشانها .طلبت مني اشيل نفسي من حياتها وهالشي صار... ولكنها للحين ماتبي تسامحني ولا شي..،
ماجد/خلاص هدي اعصابك ي مشعل
مشعل بانفعال/شفتها كيف تنزع الولد مني ،محسستني وكأني خاطفه!! عمي هو اللي دخل علينا الغرفه،لا يكون تظن اني بروح وباخذ عيالي من وراها!! وحتى لو باخذ... باخذهم كلهم ماباخذ واحد واخلي البقيه.. الواحد يفكر بمنطق شوي
ماجد/مشعل يا ولدي انت منت عارف مشاعر الأم تكون حساسه شوي.. هي فتره وتعدي صدقني.
مشعل/اسف يا عمي طولت صوتي عليك،وضايقتك
ماجد/مو مشكله.. تعال خلنا ندخل على ابوك واسلم عليه
مشعل/تفضل انت ي عمي.. انا عند اجتماع مهم ولازم اروح
ماجد/طيب.. موفق
مشعل/مشكور..
دخل ماجد الغرفه...
.. وضل مشعل برا ويفكر بطريقه ثانيه يقدر يتعامل فيها مع لوجين،خصوصا بعدما لمح الكراهيه بعيونها، عقد العزم بينه وبين نفسه ومشى ،بعدما شاف ولده اللي خلاه يندم على كل لحظه مرت من حياته وهو ما كان مع اولاده.. ندم انه سمع أوفى بعهده لها وطلع من حياتها..!!!
،
طلع مشعل وعند باب المستشفى شاف زياد يدخل ومعه بنت صغيره...وناظر بتساؤل معقول زياد تزوج .. بس ليش جاي بالبنت لحالها لهالمستشفى بالذات!!
زياد شافه وماصددق ابداً/مشعل!! السلام عليكم
مشعل بنظرات حارقه،وبنفس هدوءه/وعليكم السلام.. زياد
زياد/عسى ماشر.. ليش جاي المستشفى
مشعل/ابوي مريض ومنوم هنا... وانت؟لا يكون البنت فيها شي
زياد ببتسامه وهو شايل البنت/لا والله ..بس أمها موظفه هنا وحبت تشوفها
مشعل تذكر بنته.. وخاف لا تكون هذي بنته اللي بيد زياد،
زياد ابتسم وهو يتذكر الماضي ولاحظ نظرات الشك بعيون مشعل/يلا اشوفك ع خير
مشعل ضلت عيونه ع البنت اللي تناظر فيه بابتسامه بريئه، كره نفسه هاللحظه، عمره ما حس نفسه غبي مثل اليوم.. اليوم اللي لو يشوف بنته او ولده ما يعرف انهم عياله...شي يحرق قلبه ويحسسه بالغبينه..
طلع مستعجل.. وهو ما يدري شلون يتصرف..

،
،
،
،
،
في فرع المؤسسه في الرياض اللي يديرها عزيز*
في مكتب كله بلاك اند وايت.. مودرن يدل على استقلالية صاحبه وذوقه.. واقف عزيز يسمع موظفه وهو مو مصدق وباين مصدوم/انت متأكد من هالكلام يا خليل
خليل بخوف/ايه ..الدفاع المدني جالس يطفي نيران المخازن. .وللحين ماطفت النيران..
عزيز فك زر ثوبه من فوق وهو يحس بالاختناق.. ثقة مشعل راحت في الهواء.. كان يخطط يكسب ثقة الجميع فيه ويطور من نفسه..
استلم فرع رئيسي وكبير... ولكنه اللحين يخسر بحرائق المستودعات، طلع مستعجل يشوف الوضع كيف صار..
،
،
،
،
،
،
،
،
بغرفة ابو مشعل.. وبعد السلام واللقاء الحار بين الاخوين.. ام مشعل اتصلت بالسايق وجاء ياخذها،استحت من اللي سواه ولدها.. شلون تركها لحالها وراح...!!
بو مشعل والتعب باين في نبرة صوته/ماجد ياخوي.. انا خربت حياة ولدي.. عذبته معي..
ماجد ما علّق/..
بو مشعل/مدري وين كان عقلي..لوجين سامحتني.. لكن من اللي صار قبل شوي واضح انها ماراح تسامح مشعل..
ماجد/اسمحلي ياخوي.. لكن الحق كلّه على مشعل. البنت طبيعي بتحكمها عواطفها. لكن هو وين كان عقله وحكمته. ..فيصل انا شفت بنتي تنهار قدامي.. تمثل القوه بعز ضعفها.. اضطريت اسوي كل شي هي تبيه.. وما اتدخل بحياتها لأني شفت مشعل يتركها ومو مهتم ..مستحيل اتكلم معها عن واحد مو سائل فيها..مع اني ضد ان الاولاد يتربون بعيد عن ابوهم.. لأني أب وعارف شعور الأبوه..
بو مشعل اقتنع بكل كلمه قالها ماجد. وسكت سوي وبعدها نطق/أنا السبب... وأنا اللي بصحح هالغلط.
ماجد/وشلون..
بومشعل/طلقتها من مشعل غيابي وبتوكيل!! وبرجعها له.
ماجد ابتسم بدون أمل/لا تتعب نفسك.. لوجين ماراح تقبل.. خلاص..
،
،
.
،
.
طلعت لمياء من غرفة الطوارئ وعيونها تلمع وقفت عند الباب وهي تحس باختناق/..
لحقتها الممرضه/دكتوره انتي كل مره بتشوفين حالات صعبه وتتأثرين
لمياء/الولد بعز شباب يفقد نفسه ويحرق قلب اهله والسبب تفحيط بسياره بلحظه يبي ينبسط فيها.. هذي لعبة الموت...
الممرضه/هذول الشباب مستحيل تتحكمين في تصرفاتهم
لمياء مشت متجهه لعيادتها/هذي عاشر حاله اشرف عليها خلال اسبوع..والعدد يزيد الله يستر
الممرضه/انا اللحين استراحه،حابه اشرب قهوه دكتوره اجيبلك
لمياء دخلت عيادتها/Noشكرا
راحت الممرضه.. وجلست لمياء ع كرسيها باسترخاء.. وشافت ظرف سماوي تحت قلمها،استغربت وفتحت الظرف بسرعه تبي تشوف وش مكتوب فيه.. وعقدت حواجبها بامتعاض بعدما قرأت المكتوب/......
،
،
،
،
يتبع.. '