من متى و الغصـن يختـار الطيـور..!!

5

بسيارته ينتظرها مثلما وعدها.. جلس يناظر ساعته.. وهو على أعصابه،قربت تنتهي الربع ساعه وهي ما وصلت، شكلها ماراح تجي!!
قرر مشعل يمشي بهاللحظات..شافها مقبله عليه ووقف مبتسم ابتسامه صغيره. .
انفتح باب السياره،وركبت وهي ساكته/..
مشعل حرك السياره ومشى/توقعت انك خلاص ماراح تنزلين..
لوجين ساكته..وحركة يدها مو طبيعيه،كانت تحاول ماتتكلم،لأنها عارفه لو تكلمت بتخرب الدنيا كفايه تصرفاتها الغريبه..حاولت تتصل باللي تعرف سرها وتطلبها مساعده لكن للأسف مالقت تلفون.. وهالشي حيل مضايقها!! كانت تحاول تهدي نفسها.. مثلما كان دكتورها يقولها(لوجين.. هدي نفسك واسترخي ،انتي هاديه ومرتاحه،مافي شي يستحق العصبيه،خليك دووم هاديه)..
مشعل،لاحظ يدينها تمسك خيط شنطتها بقوه لدرجة ابيضت اصابعها/لوجين فيك شي؟
لوجين التفتت عليه وعينها تترجاه/ممكن تنزل لأبها بليييززز
مشعل لاحظ لمعة عينها/احنا نازلين ابها اصلاً..
لوجين وهي تحس بتشتت/استعجل شوي،الله يخليك.
مشعل خاف لأنها واضح انها مو طبيعيه/فيك شي؟!
لوجين صدت لجهة اليمين تناظر وتحاول ترخي نفسها،وما تبين له ضعفها/لا بس مخنوقه شوي
،،
وصلوا أبها... ،
ووقفوا عند إشارة مرور...
لوجين لفت نظرها أسم الصيدليـة المعروفه اللي تاخذ منها دواها دايماً،التفتت على مشعل/وقف عند هذي الصيدليه بسرعه..
مشعل اتجه للصيدليه وهو مستغرب لهفتها/طيب.
لوجين شافته وقف وكانت بتفتح بابها وتنزل/...
مشعل مسك يدها/ويين ووين اجلسي انا اللي بنزل.. قوليلي وش تبين
لوجين خافت تقوله،هي عمرها ما قالت لأحد،أمها وابوها كانوا يعرفون.. بس توقعوا انها تعافت بعدما كبرت!!،كانت تحاول تسيطر على نفسها، ترجته بنظراتها/مشعل اللي ابيه شي خااااص،
مشعل،لاحظ رعشت يدها اللي يمسكها،وتفهم الموضوع/اوكي بنزل معك
لوجين وهي مستعجله/لا ماله داعي.. ثواني وراجعه.. الصيدليه قدام عينك وتشوفني
مشعل اقتنع لأنه مايبي يحرجها فكرها اغراض بنات/
/

دخلت لوجين الصيدليه واتجهت للصيدلاني وكلمته بالانجليزي/Can u help me
الصيدلاني/What do u want?
لوجين طلبت منه اللي تبيه.. وتناقشت معه.. لأن مامعها وصفه.. لكن بالاخير اقتنع واعطاها طلبها واخذت معها كريمات وشامبو علشان تبعد الشك عن مشعل/..
رجعت للسياره،بسرعه..
مشعل/خلصتي اغراضك
لوجين/ايوه..
،
،
،
،
،
جـــدّه..،
جالسه على الكومبيوتر وتتعرف على الجامعه اللي بتدرس فيها.. في كندا..وكيف نظام تعليهم واختباراتهم.. طرأت عليها رفيقة عمرها بهاللحظه وخافت حيييل وهي تتذكر ، وقت الاختبارات،نهاية السمستر الثاني من السنه الأولى في كلية الطب. لحظتها انهارت لوجين من شدة الخوف من الاختبار..
*فلاش باك*
الكل فكر انه انهيار طبيعي وهي من ضمنهم!!
اخذوها للمستشفى الجامعي مع الدكتوره حقتهم..
و ثاني يوم وصحت بعد المهدئات.. ولزمت الدكتوره ع لوجين انها تخضع لفحص روتيني ..وكانت المفاجأه اللي محد عرف عنها غير لوجين ورفيقة عمرها لمياء انو نتايج الفحوص تأكد ان لوجين تعاني من متلازمه اهتزاز الاعصاب الوراثي.!! وهو مرض ناااادر جداً.
لوجين كانت مصدومه/بس انا ما اعصب يا دكتوره..
الدكتوره/تاريخ سجلك من المتوسطه والثانويه وحتى دخولك الجامعه كان سلييم لكن..
لوجين/ايش اللي لكن!!
الدكتوره/انا معاي سجلك المرضي طلبته من عمادة الطلاب ولقيت فيه تقاريرك في الابتدائي والروضه بعد.. واللي أكدت لي اكتشاف المرض فيك وانتي صغيره لكنك تعافيتي بعدما اختفت الضغوط!! وأهلك استجابوا للدكتور وعرفوا كيف يتصرفون معك.. وما يثيرون اعصابك ومايخالفون لك شي انتي تبينه.. اهنيك على اهلك..
بس الناس كلهم مو اهلك والنتيجه سقوطك من الارتباك والشد العصبي اثناء اختباراتك في الجامعه!!
لمياء تسمع ومو مصدقه/!!!
لوجين ناظرت لمياء بنظرات خوف ورجعت تكلم الدكتوره/والحل؟
الدكتوره/راح اعطيك اقراص مهدئه لاززم تاخذينها يومياً..وراح احولك للدكتور محمد.. هو عنده خبره في هالمجال.. راح تكملين علاجك عنده..
طلعت لوجين من العياده وهي محبطه... بس تذكرت شي والتفتت على لمياء/لمياء مابي اوصيك.. لا احد يعرف.. خصوصا امي وابوي.. يا عمري عليهم كانوا شايلين همي وانا صغيره وتعبوا معاي كثير.. اذا عرفوا ان المرض مازال مستمر معي يمكن يصير لهم شي من القهر ويحسوا بالتقصير وانا مابيهم يحسون بالذنب.. لانهم ماقصرّوا ابدا معي..
لمياء ابتسمت بدمعه/ولا يهمك.. محد راح يعرف بس لاتنسين تاخذين الحبوب بوقتها.. انتي عارفه لو قطعتيها بدون استشاره ايش راح يصير فيكِ
لوجين/مستحيل اقطعها.. الا اذا قالي الدكتور..
لمياء/ولا تتوتري قد مافيكي.. انتي شاطره وذكيه مايحتاج كل هالخوف من الاختبارات
لوجين/مو بيدي لازم اتوتر لكن ان شاء الله هالحبوب تساعدني بعد الله
لمياء/ان شاء الله..
،
رجعت لمياء لواقعها و مرعوبه من الحاله اللي ممكن تكون فيها لوجين تحت الضغوط والزعل وهي بعيده عنها،وموقفه العلاج من شهرين بأمر الطبيب، وقفت وغيرت مكانها وتعوذت من الشيطان وهي تكلم نفسها( يارب تكون في عونها محد يدري عن مرضها بعد الله غيري.. ياترى كيف بتتعاملين مع واقعك يا لولو. ان شاء الله تقدرين تتغلبين ع اهتزاز الاعصاب وماتنهارين)
طق الباب/لميييااا
لمياء وهي تحاول تبعد افكارها/ادخل زياد الباب مفتوح
دخل زياد وهو محبط وجلس ع الكرسي قبالتها،وهو ساكت!
لمياء/ايش فيك متنح كدا
زياد/ولا شي
لمياء ببتسامه/لا تحاول تكذب علي،بين بوجهك ترى
زياد/احس اني كنت غبي ..وشعور بالكأآبه من نفسي
لمياء/اووف اووف ليش طييب
زياد/كلما اتذكر اني اقول لخالتي وولأمي وابوي عن خطبة لوجين اقول ايش هالغبي اللي مفكر الدنيا على هواه.. وكلما اتذكر اني ادق عليها واتحجج فيكِ اطيح من عيني!! انا حاس اني ارخصت نفسي كثيرر.. وكنت ازعجها، اصلا ماعمرها حكت معي ،مدري ليه كنت معشم نفسي
لمياء تسمعه وهي تتبسم/الحمدلله انك عقلت وعرفت تصرفات الغبيه
زياد بمزحه/يووه مو تذلينا علشان هالاعتراف..
لمياء/اتمنى فعلاً انك تنساها
زياد/كيف انساها وخالتي تقول انها مجبوره تتزوج هذا الهمجي اللي اسمه مشعل!!.. انا ما انكر لك بصراحه بالي مشغول عليها، هذا اسمه زواج بالإكراه يا لمياء،وهالزواج مايجوز..
لمياء/المشكله انها ما كلمتني ولا ادري كيف احوالها..
زياد/يعني خلاص بتكنسل دراستها
لمياء وهي تهز كتفها بالنفي/ماني عارفه..
/
/
/
/
/
الجنوب*..
مطعم (انديان سبايس)
مشعل بعد نص ساعه لاحظ لوجين تغيرت180 درجه!! ورجفت يدينها وقفت/ها.. شرايك بالمكان
لوجين وهي تحس باعصابها مرتخيه ومزاجها عاالي/nice بس حار ههه
مشعل وهو مُعجب بعفويتها/وش تشربين بعد هالاكل..
لوجين استرخت ع الكرسي/حابه امشي واحرق اللي اكلته
مشعل/بس سمعت انه مايصلح المشي بعد الاكل مباشره
لوجين بمزاج عالي/مثلما تبي دكتور مشعل. شرايك نركض!!
مشعل استغرب/هاه
لوجين بابتسامه/نركض.. ماتعرف تركض!!..
مشعل/انا اقول خلينا ع المشي أحسن بنركب سيارتنا وبنروح لحديقه نركض ونمشي فيها..باين عليك روقتي
لوجين وهي تاخذ نقابها/لحظه خليني ألبس هذا..
مشعل واقف وينتظرها/
لوجين خلصت والتفتت عليه/مامعي مرايه.. شوف انت كذا مزبوط؟
مشعل وهو يشوف عيونها ضاحكه بعد الضيقه اللي طول الطريق،ابتسم بخفيف/ايه
لوجين اخذت شنطتها/يلا مشينا.
،
طلعوا يتمشون.. بالحدايق العامه ويفترون من مكان لمكان ونسوا الساعه...
جلسوا على كرسي خشبي طوويل مقابل حديقه حلوه..
ظلوا ساكتين شوي..
لوجين وهي تشم الهواء العليل/تعبت من المشي
مشعل/هذي فكرتك
لوجين وهي تلف عليه بدلع البنات الفطري/وانا حابتها بس مو معناتها اني ما اتعب.
مشعل وهو يحاول يفهمها انقلب مزاجها فجأه/انتي غريبه
لوجين/هههه كلنا اغراب عن بعض،و بين يوم وليله صرت زوجي!
مشعل ماحب يضيق صدرها/ماقصدت بهالشكل
لوجين كانت تحت تأثير الدواء اللي اخذته،وتتذكر موقفها لمن صدت عن أمها غصب عنها لانها عارفها مرضها *ماكانت تبي تصرخ عليها وتجرحها* /تعرف يا مشعل.. انا انسانه سيئه جداً بس صدقني مو بيدي.. هههه يعني أنا مالي دخل اذا ربي خلقني كذا صح!! أمي وابوي حاولوا يساعدوني وانا صغيره بس ماقدروا مع كل تعبهم ما تغيرت حالتي!!
مشعل استتغرب كلامها،وما فهم وش تقصد!!واضح انها مو بوعيها اكيد!!
لوجين كملت/شي غريب ان المريض حاب يصير طبيب جراح ههههه.. بس هذا انا هنا و ماراح اصير طبيبه والبركه في ابوك ههههههههه ابوك ذكي يا مشعل..بس انت احسن منه.
مشعل/لوجين شرايك نقوم نرجع،بردنا
لوجين قامت/اي والله بردت وانا ماحسيت هههههههه
مشعل،خاف من لخبطتها وسوالفها وبرودها المفاجئ،وضحكها!!
لوجين مسكت يده/لا تستعجل بالمشي معاد فيني حيل
مشعل ظل يمشي معها لين وصلوا للسياره.. وركبها ومشوا...!!!
/
/
/
/
/
بالبيت ..
ابو مشعل جالس وع اعصابه/ياا بنننت.. وييينك انتي
ام مشعل جاءت مسرعه/خير يابو مشعل
ابو مشعل/سااعه انادي..
ام مشعل خافت/ككنت انتظر مشعل تحت تأخر
ابو مشعل خزها باحتقار/انتي انهبلتي!! تنتظرين واحد عمره34سنه يالعجوز الخبله
ام مشعل انكسر قلبها/الله يسامحك.. هذا ولدي مهما كان
ابو مشعل/اقوول بس تعالي افركي لي رجلّي ودهنيها بسرررعه
ام مشعل خافت/ابشر طال عمرك..
ابو مشعل/بلا في شكلك من عجوز قشرا
ام مشعل تكبت في نفسها... ماتقدر ترد عليه لو ايش،تخلف يذبحها بأرضها.. كذا تعودت من امهاتها الزوج تسنعين كلامه لو يدوسك برجليه!!
/
/
/
/
بهاللحظات وصلوا للبيت..
مشعل وهو يناظر بالساعه/الساعه1
لوجين ببتسامه غريبه/اشش محد صاحي.. لاتخاف
مشعل/اللي يسمعك يقول منحاشين من المدرسه
لوجين/هههههههه
مشعل/اششش انتي لا تصحينهم
لوجين سدت فمها ومشت معه..
وصلوا جناحهم/
لوجين التفتت عليه/يلا تصبح على خييير
مشعل/وانتي بخير..
لوجين دخلت غرفتها وعينها الضاحكه بعينه وسكرت الباب/...
مشعل شافها سكرت الباب ودخل غرفته وسكرها..
لحظات وسمع واحط يطق باب غرفته وراح يفتح. وتفاجأ فيها/لوجين!!
لوجين مبتسمه بفضول/مشعل ايش معنى كلمة "منحاشين من المدرسه"؟!!!
مشعل استغرب/ماتعرفين معناها!!!!
لوجين وهي تهز راسها بالنفي/هئه ماعرف!!
مشعل ابتسم/كيف يقولونها بجده.. يعني هربانين من المدرسه<<يقلد نبرتها الحجازيه
لوجين/ههه كيدااا هههه.. طيب باي
مشعل/لحظه لوجين
لوجين التفتت عليه/ايوه
مشعل/ليش ضحكتي بعدما سمعتيها وحنا تحت دام انك ماتعرفين معناها!!
لوجين/مبسووطه.. فيها شي
مشعل استغرب اكثر/لا..
لوجين/يلا باي
مشعل/باي
/
/
/
/
/
*اليوم الثاني..
في مجلس ابو مشعل ..جالس وعنده اخوه ..وباين عندهم امور مهمه ..ويناقشونها مع بعض...

بو مشعل/وش الاخبار يا بو علي..
بو علي/بخير الحمدلله..
بو مشعل/رحت تزور علي
بو علي ووجه عابس/ايهه
بو مشعل/المفروض ما نخليه ينسجن.. بس وش نسوي بهالعمال اللي اعترفوا عليه،لو اننا درينا قبل الشرطه كان تصرفنا
بو علي بضيق/اللي صار صار..
بو مشعل/حطيت له محامي ..والا اتركني اتصرف واجيب محامي يطلعه من هالسجن
بو علي/حطيت له محامي.. لكن اقصى شي وصلت له تخفيف العقوبه بدال 5سنوات 4
بو مشعل/ايييه الله يعينه..
بو علي/اميين.
بو مشعل/وش اخبار الربع والجماعه
بو علي/مدري وش اقولك يا شيخ.. ،البارحه زاروني صالح ومنصور عيال جمعان الله يرحمه..وكانوا معصبين وثاير غضبهم بالحيل
بو مشعل استغرب/افاا.. وش معصبهم.
بو علي/سالفتهم جابت الراس للأرض.. ومعاد يبون يسكتون عنها ويبون الكل يدري ان مالهم دخل باللي سواه اخوهم ناصر.. بعدما زوج بنته لواحد مب قبيلي من عندهم في الطايف،انت عارف ان ناصر من زمان ساكن بالطايف علشان عمله هناك
بو مشعل استنكر هالشي/وشوو.. مزوج بنته واحد مب اصيل
بو علي/اي والله هذا اللي قالوه يا شيخ،
بو مشعل/طيب ماقالوا لك كيف بيتصرفون..
بو علي/اللي عرفته ان ناصر طاح مريض.. واخوانه راحوا يزورونه ومن هذيك الزياره عرفوا بالسالفه... وراسهم الف سيف ليتم طلاق البنت من هالرجال اللي زوجها ابوها له.بس ناصر رافض هالشي.. وقرروا انهم يقولون لك وانا اوصل لك قضيتهم علشان كذا جيتك بدري هالصباح
بو مشعل دق بعصاته ع الأرض وحواجبه معقوده/مب بكيفه..غصب عنه بيطلقها منه.. لازم يجي ناصر مع اخوانه هنا ونتفاهم ونقرر وش راح يصير.
بو علي/صار طال عمرك.. يلا استاذن
بو مشعل/اجلس افطر معي
بو علي/مستعجل والله.. سلام
بو مشعل/سلام..
/
/
/
/
بغرفتها..
صحت من نومها وهي تحس جسمها وكأنه كان مخدرر!!. والصداع اللي كان ملازمها خف كثيير..
استقعدت لوجين ووابعدت اللحاف عنها وتناظر بساعتها وتشوف العقرب الصغير على 8..نزلت من السرير ودخلت الماستر روم واخذت روبها ودخلت الحمام واخذت دوشها ع السريع،وهي تحمد ربها اللي انقذها وخلا مشعل يفكر يعشيها برا.. لانها قدرت تمر الصيزليه وتاخذ دواها.. اللي ريحها شوي.. بعد كذا ماراح تفكر وتضغط على نفسها راح تفكر كيف تقنع مشعل يخليها تكمل دراستها وبس.وهي تكلم نفسها (اذا اقتنع مشعل بالفكره ماراح اتعب،مشعل واضح انه متفهم واعقل من البقيه)
طلعت وهي لافه الروب الطويل حواليها ورابطته ولافه شعرها بالفوطه..ولبست ملابسها بنطلون اسود وبدي وفوقه جاكيت كروشيه انيف رمادي لنص الفخذ بقصه حلوه من قدام.. مشطت شعرها بعدما نشفته.. وربطته كله بربطه فوق وكأنه ذيل حصان وتعطرت.. بدون كحل وغيره..
سمعت صوت طق ع الباب وراحت تفتح/..
مشعل وهو خايف تكون قالبه عليه/صباح الخير
لوجين ببتسامه/صباح النور
مشعل كان معه اكياس/عادي ادخل!!
لوجين ابعدت عن الباب/تفضل
مشعل دخل وهو يطالع فيها وواضح مُعجب/
لوجين انحرجت/مشعل.. ايش بك تطالعني كذا
مشعل/اليوم طالعه حلو حيل
لوجين ارتبكت ووردت خدودها وحاولت ما تبين احراجها/بس اليوم!!
مشعل/بصراحه من اول ماشفتك عند السلم وانتي تنادين اخوك وانا مبهور فيك..
لوجين حاولت تغير الموضوع/ايش شايل بيدك
مشعل تذكر اللي جاي علشان ومد الكيس الأول لها/هذي أشياء بسيطه جايبها لك.. المفروض اجيبها لك من الخطوبه بس انتي عارفه الظروف.. جات ضدنا
لوجين تحاول ماتفكر بشي يعكرها،اخذت الكيس/اشووف
فتحت الكيس ولقته جوال آيفون S6 ذهبي، وطلعته وهي مبسوطه/واااو.. Thank u
مشعل/الحمدلله طلعتي تحبين الآيفون
لوجين التفتت عليه ببتسامتها الطبيعيه وهي ممتنه/الهديه حلوه مهما كانت.مايصلح نتشرط فيها... مشكور مشعل كلك ذوق.. كنت محتاجه هالتلفون.. تليفوني مادري وينه
مشعل/تحت امرك يا عروس..
لوجين/بديت اطمع وش في هالكيس بعد
مشعل طلع علبه صغيره وفيها خاتمين دبله،فتحها ومدها عليها/ما أمدانا نلبس خواتم زي الناس.. قلت مستحيل اعديها.. وما ألبسك خاتمي.. عااادي حتى لو ما اعتبرتيني زوجك ومابينا علاقه..
لوجين استغربت اصراره/ليه..
مشعل ببتسامه ذابله/لو احد غيري كان ماترك هالفرصه انه يرتبط بك ويلبسك خاتمه.. شقلتي ممكن ما تفشليني و تلبسينه
لوجين بدون تردد مدت يدها اليسار/هنا دبلة الزواج صح؟
مشعل ببتسامه مسك يدها وهو مبسووط ولبسها الخاتم، وضم كفها بكفه بسكات..
لوجين تناظر فيه مو مصدقه تصرفاته/ذوقك حلو عجبني الخاتم..
مشعل مد عليها خاتمه/يلا لبسيني خاتمي
لوجين اخذت خاتمه ولبسته/
مشعل/شرايك ننزل نفطر،مت من جوعي،زينه حاطه فطورنا في الدكه..
لوجين ببتسامه/يلا..
/
/
/
/
/
جـــدّه..*
جالس يشرب قهوته مع ام احمد وهو يفكر ببنته.. اللي تركها وراه هناك،براسه مليون شغله وفكره/انا خرّبت حياة بنتي بنفسي..
ام احمد/لا تقول كدا يا ماجد انتا ما كان بيدك شي..
بو احمد/كان يمديني سفرتك انتي واخوها معها وانا اروح معكم لعيون لولو.. بس خوفي غلب تفكيري..
ام احمد/ايش نسوي.. هذا مقدر
بو احمد/يا ترى بنتي كيف عايشه هناك..
ام احمد/انتا مو تقول مشعل انسان كويس
بو احمد ببتسامه/مشعل طلع غيير عنهم كلهم.. تربية أمي ماراحت عبث.. كنت وانا اتكلم معه اشم ريحة أمي في كلماته، كان متعلق فيها كثير ..خصوصا بعدما طلق ابو مشعل زوجته الطلقه الاولى.. ربته جدته كم سنه ..حتى بعدما فيصل رجع زوجته ام مشعل.. ظل متعلق بجدته ومايسمع غير كلامها علشان كذا الولد احسه غيرهم.. يحترم الكل بدون تمييز وتصرفاته عاقله.
ام احمد ارتااحت/طمنتني الله يطمن بالك..
ابو احمد/انا متأكد ان لوجين بتكون مرتاحه معه.
ام احمد/واذا صار العكس،انت عارف انها ساكنه معاهم
بو احمد بجديّه/ساعتها،بتصرف التصرف اللي كان المفررض اتصرفه من زمان..
/
/
/
/
عند مدخل الباب..
ام مشعل متغطيه وهي تكلم عزيز/اسمع يا ولدي اخذ هالاغراض ووصلها لساره ..
عزيز/ابشري يا خاله.. تامرين
ام مشعل/و قل لها تدق علي،مادري شفيها قطعت
عزيز/ان شاء الله.. تبين شي ثاني
ام مشعل/ا...
قاذعها صوتها جاي من بعيد/يمااااااه
ام مشعل التفتت تجاه الصوت/نعم يا زيينه قصرري صوووتك،عزيز عندي.
زينه تفشلت واشرت لها تجي تتقهوى برا اذا خلصت..
عزيز استااانس بعدما سمع صوتها/يلا خالتي استاذن
ام مشعل/الله معك..
دخلت ام مشعل وهي تخز زينه/لازم العالم كلها تسمع صوتك يا بنت ما تتوبين
زينه ببتسامتها/شدراني ان عندك احد.. انا مدرعمه من هناك.. تعاالي بس مسويه هذيك الفطاير اللي يحبها قلبك وشاهي وجلسه رهيبه في الحوش،انا ولوجين وبعد شوي بتجينا منيره
ام مشعل/وش ذالاختراع يعني فطاير وشاهي
زينه وهي تبوس خد أمها/لا تعبسييين اضحك يا قميل
ام مشعل ابتسمت على حركاتها وراحت معها..
/
/
/
/
/
/
عند بيت اهل زوج ساره..
خالد اخو سالم الصغير وهو ينادي ساره/ثااراا
ساره ابتسمت على اسمها بفمه/لبيه خلودي وش تبي
خالد/في واحد برا اثمه عذوذ يبيكِ معه اغراض بيعطيك اياها تعالي
ام سالم/ياحليله هذا صبيكم عزيز
ساره استنكرت/لا.. عزيز حسبت اخونا
ام سالم انسانه طيبه/شكله طيب وابن حلال ابو سالم يمدحه..
ساره انبسطت لان عزيز حسبت اخوها الصغير/عادي يا خاله اروح اخذ اغراضي والا تروحين انتي؟
ام سالم/مافيني شدّه وانا امك.. روحي اخذيها انتي مافيه غيرك..
ساره قامت/اجل بلبس نقابي وجلالي وبطلع..
ام سالم/ززين تسوين
/
/

طلعت ساره بعدما تغطت وبجلال كبير/السلام عليكم عزيز
عزيز وعينه بالارض/وعليكم السلام.. شلونك وانا اخوك. عساك طيبه
ساره/الحمدلله ..
عزيز/مبروك زواجك نسيت اهنيك
ساره/الله يبارك فيك
عزيز مد الاغراض عليها/هذي من عند الوالده. وتراها تسلم عليك وزعلانه منك.. تقول اتصلي فيها وطمنيها عنك
ساره/اي والله انشغلت الله يلعن بليس..
عزيز/مايخالف اتصلي وهي بتعذرك.. يلا سلام
ساره /سلام.. دخلت..
بهاللحظه دخل سالم/خييير عزيز وراك جاي
عزيز استغرب نبرته ونظرته/كان معي اغراض لساره وصلتها وهذا انا ماشي
سالم خزّه/اغراض هااه!!
عزيز استغرب نظراته/يلا عن اذنك..
سالم دخل بسرعه وهو يناديها/سااره
ساره التفتت عليه وهي تشيل نقابها/هلا سالم.. حياك وصلت؟
سالم/عزيز وش كان يسوي هنا
ساره استغربت نبرته في السؤال قدام أمه خزّته وطلعت غرفتها وهي ساكته.
سالم لحقها بسرعه..
ام سالم وهي تشوف تصرف ولدها، وتفنجل قهوه وهي متحسفه على حظ ساره/الله يهديك يا ولدي..ساره من خيرة البنات هالايام مامثلها،وانت،بتضيعها
..

بغرفتهم... *
ساره نزلت اغراضها وحطت جلالها ونقابها ع الكرسي وجلست زعلانه/...
سالم درعم وهو معصب/ماتقولين لي ليييش جاااي لك هالأدمي
ساره تنرفزت من اسلوبه/هالادمي له اسم وتراه حسبت اخوي الصغير..كان جايب لي اغراض من عند أمي.. وباقي الهدايا اللي ما اخذتها معي
سالم بنص عين/الهدايا هاااه
ساره/انت وش بلاك تنقز لي بكل كلمه اقولها!!!
سالم مسكها بكتفها/انتي مخبيه عني شي؟!!
ساره سحبت يدها منه/انت اليوم منت طبيعي ابعد عني تركته ودخلت دورة المياه..
سالم جالس وهو معصب.. والشيطان يلعب بعقله..!!
/
/
/
/
/
مروا يومين ع الأحداث السابقه.. ،
كان الليل هادي والسماء صافيه والنجوم تسطع..
مشعل وزينه ولوجين جالسين بالجلسه العربيه في الدكه ويسولفون ويضحكون.. وبينهم شاي ومكسرات وفشار..
مشعل ملاحظ ان لوجين حيل متغيره نفسيتها من البارحه..هو فرحان بهالتغير بس باله مو مرتاح ابداً "كيف تتغير بين يوم وليله"
اقبلت أم مشعل وشافت لوجين مبسوطه معهم وتضحك/ماشاء الله اصواتكم ملعلعه،و بنت الحجازيه مرووقه الليله
لوجين خافت منها و قامت وراحت تجلس جنب مشعل،بسكات..
مشعل فرح بوجودها جنبه بس ما بين هالشيء/..
زينه استغربتحركة لوجين بس فرحت لانها متقبله مشعل/تعالي يمه اسهري معنا
ام مشعل جلست وهي تخز لوجين بنظرات حقد.. وهي تشوفها تجلس جنب ولدها مبسوطه،ومقهوره كيف ولدها يحترم زوجاته بالأول اميره وهاللحين لوجين!! ،عكس ابوه/
مشعل/شلونك يمه
ام مشعل/خلف الله علي معاد تنشد عني،من عقب هالسحليه
لوجين مدت يدها ليد مشعل ومسكتها تحتمي فيه،وتطلبه يدافع عنها/..
مشعل/فديتك يمه ماله داعي هالكلام.. انا عندك وين رحت يعني
ام مشعل/مصييرك عندي اصلاً محد بيقعد لك غيري..
مشعل فاهم قصدها/انتي وزوجتي عينين في راس
ام مشعل/انا أمك مهما سويت ما راح امل وازهق منك.. اما غيري اذا شاف ما منك فايده بيتركك.. <<تقصد الخلفه
زينه تحاول تغير الموضوع/يمه اشربي كاسة الشاهي بتبرد
ام مشعل قامت عقب ما عكرت الجلسه/مااابي برووح اناام
راحت وتركتهم..
لوجين ببرود عجيب/شفيكم سكتوا فجأه .. تكلموا.
زينه ومشعل ناظروا بعض مستغربين منها!!
مشعل/لوجين ما ودك تنامين؟
لوجين/ودي اسهر.. ما وراي شغل بكرا
مشعل/اوكي براحتكم ،بس انا وراي شغل.. يلا انا رايح انام تصبحون على خير..
زينه/وانت من اهله..
لوجين التفتت على زينه ولقتها تناظر فيها مستغربه/ انتي بعد شفيك تطالعيني كذااا
زينه مستغربه انها ماراحت مع زوجها وتوهم معاريس/ولا شي
لوجين/انتي تظنين انو فيه شي بيني وبين مشعل!!.. حابه اطمنك انو مافي شي بيننا
زينه فرحت/خفت تكونون
لوجين تقصد شي وزينه تقصد شي ثاني خالص/لا لا تطمني، انا وهو متفقين.
زينه/كذا الواحد يرتاح
لوجين وهي تبتسم/عارفه يا زينه.. اخوك سووو جنتل
زينه تستهبل/مافهمت
لوجين استغربت/ماتعرفين ايش يعني جنتل
زينه/لا..
لوجين/هههههههه هذي حتى مايحتاج تدرسينها بيقولوها في الافلام
زينه بعباطه/بيني وبينك انا ماحب الافلام الهنديه
لوجين انفجرت ضحك ومعها زينه..
/
/
/
/
/
بغرفتها ببيت اهل زوجها.. *
جالسه ع سريرها وتلتهي بالجوال عن سالم.. لأنها حييل زعلانه منه/..
سالم دخل بهاللحظات وبدل ملابسه واتجه للسرير بينام..
ساره قامت وتركت السرير وراحت تقعد ع الكرسي بعيد هناك/..
سالم استغرب/خيير وراك قمتي
ساره خزته ورجعت تناظر جوالها/
سالم/لايكون زعلانه
ساره ماعطته وجه،تنتظره يراضيها ويعترف بخطأه/...
سالم وده يروح لها بس متردد راح له ووقف قبالتها/شوفي اذا قلتي لي انك ماتخبين عني شي بسامحك
ساره ارتفع ضغطها زياده ماهو مرتفع وانفجرت بوجهه معصبه/تدري شلون يا سالم.. انت اكبر مقلب صار لي بحياتي..
سالم/افااا وش هالكلام
ساره/توقعتك انسان غييير وذووق بما انك متعلم،لكن للأسف اللحين توني اعرف ان ما كل متعلم مثقف..
سالم/انتي انهبلتي،في حرمه تكلم زوجها كذا
ساره/تووني ماقلت شي،والا عقلك البدائي مافهم الكلام اللي قلت وفسره لشيء غبي!!
سالم شدها من شعرها/شقصدك؟ انتي تظنين اني غبي
ساره ببتسامه بدون ألم/لا منت غبي.. لكن أنا الغبيه اللي حكمت عليك من شهاداتك وشكلك..طلعت مجرد بالوون!
سالم ضربها كف ورماها ع الأرض بقوه/اشوفك تفلسفين علي
ساره ناظرته بشموخ/كل طقه بتعليمه يا سالم.. لكن ماكون أخت مشعل آل عاصم ان مادفعتك ثمن اتهامك وكلامك ويدك الطويله..
سالم خاف من طاري"مشعل"/وش بيسوي يعني واحد و يربي زوجته ويأدبها..كيفي اضربك واذبحك بعد.
<<<طلع وتركها
ساره وهي متحسفه على نفسها وزواجها الخايب،ضحكت على نفسها شوي لكن مستحيل تسكت عن اتهامها والشكك فيها بدون وجه حق/ههههه بعد!! والله وانا اخت مشعل ما اعديها لك يا سويلم..
،
،
،
،
،
،
**الصباح.. الساعه9.
الكل جالس ويشرب قهوته عقب الفطور..
زينه/لوجين شرايك اليوم نروح لساره
لوجين ألتفتت على مشعل/مادري.. اذا وافق مشعل بنروح
مشعل ببتسامه/ماعندي مانع.. اطلعوا وغيروا جو
لوجين/مشكور
ام مشعل تناظرهم وتخزهم بسكات وتشرب قهوتها..
زينه ألتفتت على أمها/يمه وين ابوي
ام مشعل من طرف خشمها/ابوك صحى بدري وراح للمجلس عمك بوعلي عنده.. وجايينه جماعه.. بموضوع..
مشعل استغرب محد قاله/جماعة من؟محد قالي شي!!
ام مشعل خافت تقوله لأن ابو مشعل محذرها ما تقول لمشعل/وانا وش دراني،يمكن الموضوع مايستاهل وما يبي يلهيّك عن شغلك
مشعل كمل شرب قهوته/...
لحظات ويسمعون وحده تنادي..وتصيح/يا شيخخ مشعل الحقنيي يا شيخ..
الكل فزع واتجه لمكان الصوت..
سيده في العقد الرابع من عمرها متوشحه بالسواد وظاهره عيونها من خلف النقاب واقفه تحت بالصاله وتبكي وتنتحب وحالها يرثى له/يا شيخ مشعل تكفى الحقني،بنتي بتروح مني.. بيموتونها قهر
راحوا لها البنات..
لوجين/أهدي ياخاله ايش القصه
زينه/ارتاحي يا خاله وقولي وش صاير
ام مشعل بغرور وعنجهيه/اكيد بنتك تستاهل
زينه تبي تهديها/يماااه ما يصلح..
لوجين تقززت من رد ام مشعل السخيف بس ماعلّقت/يا خاله قولي انتي مين وايش صاير لبنتك
السيده وهي تبكي/انا أم هاجر ،بنتي بتروح مني بغمضة عين والسبب الشيخ..طلب من ابوها يطلقها من زوجها لأنه مب قبيلي! .. وهي حامل ومرتاحين مع بعض وهو من خيرة الشباب ملتزم وحافظ للقرآن وامام جامع الحي مع انه معلم!! ،وابوها موافق على زواجها وانت تدري بعد يا مشعل. تكفى يا شيخ تدخل الكل بالمجلس متفق، وغصبوا ابوها بالقوه.. لان ماعنده اولاد ولا عزوه غير اخوانه اللي فضحوه بدنن فضيحه.. كل ماعندنا خمس بنات..
مشعل من بعيد واقف،ومقهوووور عرف انها *زوجة ناصر جمعان* وعرف ليش ابوه ما اعطاه خبر.. مجتمعين من وراه!!
لوجين التفتت على مشعل وتخزه بنظرات ناريه، بعد اللي عرفته/..
مشعل ماتحمل هالنظره منها وراح لغرفته،مسرع وكأنه بياخذ شي منها..
لوجين هدأت أم هاجر/ولا يهمك يا خاله انا راح اكلم مشعل..
ام مشعل/وش بتقولين له يعني.. الرجال عندنا ما يعطون الحريم وجه ..لا تتعبين نفسك. الطلاق بيتم
لوجين سفهتها و راحت وراه لفوق وهي مستعجله مثله..
،
،
دخل غرفتهم لان اغراضه فيها. ويدور بأغراضه الخاصه في الشوفينيرا ..
لوجين دخلت وراه.. وهي حييل معصبه ومشمئزه من تصرفات القبيله وطبعا هو ولد الشيخ الوحيد المستشار/عجبك اللحين يا سيد مشعل هذا اللي تامركم به مشيختكم.. اي تخلف تعيشونه هنا هاااه..!! يعني حتى الناس اللي متزوجه ع سنة الله ورسوله بتفرقونهم لانهم ماناسبوا هواكم!!! ليش ماتدخل وتحلها دامك الشيخ المنتظر والمثقف بينهم.. انت من ايش مخلوق!!
مشعل مقهور مثلها للي صار للبنت/ لوجين ابعدي عني
لوجين/وااااو بتفهمني ان مالك دخل باللي صار للبنت.. انت مسئول دام انك ولد الشيخ الوحيد والكل يسميك شيخ.. ذكّر ابوك ان ربي راح يعاقبه في بناته اللي هم اخواتك.
مشعل بضيق/انتي مو فاهمه شيء لا تدخلين
لوجين بدأت تعصب/بالله عليك... شلون تبيني أأمن حياتي مع واحد يحكمه الظلم..
مشعل اخذ سلاحه وحطه بجيبه/انتي تظلميني يا لوجين
لوجين وهي تخلع خاتمه من يدها/انا عرفتك اللحين ،ومايشرفني ألبس خاتم واحد ظالم ومفتري
مشعل طلع وتركها لأنه مستعجل..
لوجين جلست على كرسي التسريحه وهي معصبه ورمت الدبله على الطاوله/هذا الشي مستحيل،
(اللي قاعد يصير يأكد لي اني راح اظل هنا طول عمري، الظاهر هذا هو قدري.. ومالي اي اعتراض يا ربي.. وارزقني الصبر)
راحت لجوالها قررت تتصل في لمياء وتحاول ترخي اعصابها قبل تبدأ تسوء حالتها.. لأنها مستحيل تاخذ الحبوب في النهار.. قررت ما تاخذها غير بالليل قبل تنام،علشان مفعوله مايفضحها عند احد..
بهاللحظات دخلت زينه وهي خايفه/لوجين وانا اختك تعالي
لوجين خافت وفزت لها/وش صااار بعد
زينه/ام هاجر انهارت بالبكاء.. بعد مكالمة بنتها. تقول انها حيل تعبانه!!ومارضوا اعمامها يودونها المستشفى،ادري انك درستي طب.. اذا انتي تقدرين تساعدينها فـ..
لوجين قاطعتها وهي متعاطفه مع البنت/وبنتها وين؟
زينه فرحت/ببيت أعمامها.. بالحاره الثانيه
لوجين فزت وأخذت عبايتها وطرحتها ونقابها،وجوالها للضروره/تعالي خلينا نروح نلحقها...وخلي عزيز يودينا لان ابيه يجيب أشياء ضروريه من الصيدليه،فاهمه
زينه/يلا انا رايحه اخذ عباتي وجايه..
/
/


يتبع