حوشنا كلو ماتمي مية متر نحن ستة بنات انا رقم تلاتة اخواتي الاتنين الاكبر مني متزوجات واحده متزوجة غريب ودي اختي نهال الكبيرة والتانية متزوجه ولد خال امي ودي عبير انا التالتة فيهم وبقرا في الجامعة سنة اولي بقرا اقتصاد جامعة الخرطوم وانا جيهان اختي الاصغر مني في اولي ثانوي هديل والبعديها سابعة سمر واختي الصغيرة رماح ابوي الصادق نجار ساكنين الخرطوم بيتنا ملك وامي زهور امي كان نفسها في ولد وكل مرة تولد يقول بت فترت من الولادة وقفتا ابوي زاتو مع ارهاق الحياة بقي وضعو المادي تعبان اخواتي الاتنين نهال وعبير عرسو ليهم هم في الثانوي والرجال الماخدنهم واحد عندو امجاد واحد زول سوق اختي الكبيرة ساكنة في بيت ايجار وعبير قريبنا مسكنا مع اهلو في غرفة والمطبخ واحد كل اسبوع بجونا انا كان عندي هدف اني اتعلم واساعد ابوي وكنت قراية شديد وعندي معزة خاصة في قلب ابوي حتي لما اجي ماشة الجامعة بشيل قدر حق الموصلات والفطور ولبسي بسيط والعباية كنتة بلبسة اغلب وكتي في الجامعة برجع البيت بغسل وبنضف وبقري اخوتي الصغار هم شاطرات بيتنا الصغير دا غرفة وبرندة ومدبخ وعاملين مظلة من بواقي الخشب البجيبو ابوي قريب الباب ابوي وامي في الشتاء برقدو فيها وعندنا نيمة كبيرة قدام الباب اهلنا في الجمبنا وفي البعيد عمي ساكن جمبنا ابوي حنين وعاوز يوفر لينا اي شي بالامكانيات العندو وقدر ظروفو كلنا بنوم في الحوش ابوي سريرو جمب الباب وامي قريبة منو انا واخواتي لي جوة سرايرنا زاتم ناقصات وعندنا واحد مكسور تاكلين رجلو بطوب بلك بس امي الله يديها العافية عندها النضافة مرض يعني سرايرنا ديل يلمعو تغسل باليفة والصابون والغرفة فيها تلاتة سراير ودولاب ضلفتين والترابيز عاملا ابوي ودولاب المطبخ عاملو ابوي حياتنا زي اغلبية الشعب السوداني ابوي بجي داخل البيت العصرية والمغرب نتلمة نشرب الشاي باللبن ونتونس وكل زول يحكي يومو انا اهلي بقولو علي الحليوة بقولو حلوة زي حبوبتي ام ابوي يوم ضربت لي اختي الكبيرة قالت لي تعالي نمشي نبارك لي حماتة خطبوها كلمتة امي من الجامعة مشيت ليهم لقيتة تبكي سالتها مالك قالت لي فترتة من راجلي قلت ليها في شنو قالت لي شال التلفون كسرو سالتها لي يعمل كدا قالت لي واحد مريض بشك فيني وحماني ما امشي ابارك لاختو قلتة ليها اسمعي كلامو قالت لي جاية بيتنا انا فترتة من العيشة معاهو وبناتي بسوقم في وشي قالت ليها وهو يشك فيك علي ياتو اساس قالت لي قال لي بتتكلمي مع الاولاد هو في الساعه دي جا داخل انا سلمتة عليهو وقلت ليهم انا ماشة البيت قال لي اقعدي اشكي ليك اختك قلتة ليهو اختي مالا قال لقيتا بتتونس مع واحد في التلفون وكم مرة كمان واسي ماشايفها مدخنة ودايره تطلع دي اخلاق مره ماكويسة اختي بقت تبكي طبعا راجل اختي بعد العرس اكتشفنا انو واحد شكاك ويعني بتوهم حاجات مافي حننتني اختي بس كمان ابوي مسكين مابستاهل يزيدو عليهو همو هديتم وعملت نفسي بشاكل في اختي نظام هي غلطانة وراجلك يتقل بالدهب هو طوالي جرا واطي ود كلو انا بغمز لي اختي قال لي خلاص امشو سوا قلت ليهو مره تانية اتخرتا وهي بيتا مابعيد مننا حافلة واحدة بتوصلني بيتنا اختي قالت لي ماتكلمي ابوي هو زول ضغط قلت ليها وانتي خلاص راجلك دا بقيتي بتعرفي وجبتي منو البنات اصبري قالت لي انا كملتة الصبر معاهو انا مرقتا منها ركبت المواصلات وصلت بيتنا امي سالتني نهال مالا مابترد علي تلفونة حكيت ليها الحاصل قلت لي كر علي بنياتي مايستاهلن اختك ديك كمان راجلة ضاربة في وشها انا كنتة عاوزة اسوق اختك نمشي باكر عليها قالت مابتجينا كدي ابوك بشوفة انا من زعلي علي اخواتي النوم غلبني قمتا بدري ومشيت جامعتي اول زول قابلني مهند صديقي مهند دا اول يوم جامعة اتشاكلتا معاهو شكلة ونبزتو حصل بينا كييس وانا حركات المشاغلات وحبكانات الاولاد دي ماعندي ليها زمن بعد لقينا نفسنا في سكشن واحدة المهم جا اعتزر وقال لي ماكان قاصد بقينا فرد شديد وبيعرفي عني اي شي انا صراحة كنتة كايسة فيهو اخوي الماولدتو امي قلت ليهو انت انا بعتبرك اخوي وهو كمان وعندو حبيبة من ايام الثانوي وهي بقت تعرفني ورقمة عندي وهو ساكن بحري ابوه اتوفي وهو صغير وعندو اختو مهندسة اسمها سهام واخو الكبير المعز طبيب جراح بس عايش برة وامو مرة صعبة شديد تعبت في تربيتم وشبة متحكمة فيهم حتي اختو سهام ماعرست عشان امو اي واحد يجي مابيعجبة واخوه ماتزوج ولم يجي من السفر هي البتختار ليهو وهو كل سنة بخلي العرس ويرجع
يتبع....
