قلتة لي مهند اسي اخوك فاهم اني حبيبتك قال لي لا هو عارف نحن اصدقاء بس بحب يعمل حركات عشان يكشفني ضرب تلفونو رد بعد انتهت المكالمة قال لي دا المعز اخوي قال جاهو مشوار مابيقدر يجيني وقال اضرب لي سهام تجي تسوقني قلتة ليهو اجر امجاد انا بجيبة ليك قال لي ياخي امي مصرة يودوني ويجيبوني انا بقدر امشي براي جاني تلفون من نهال قالت لي بتجي متين جاينن ضيوف قلتة ليها مايجو انا دخلي شنو قالت لي ناس خطبة قلتة ليها لي هديل قالت لي هديل شنو جاينك انتي قلتة ليها الجاية يخطبني منو قالت لي قريبتنا وولد كان جا من السفر وقالو شافك يوم جاب امي وابوي قلتة ليها انا ماعاوزا اعرس الكلام دا قلتة مية مره وبعدين هم ماعارفين ردي بجو ساي قالت لي واثقة من ولدا ياختي مابترفض انتي تعالي بس قفلتة منها قلتة لي مهند معقولة في شباب كدا قال لي عريس قلتة ليهو اتخيل قال لي انتي بتعرفيهو قلتة ليهو معرفة بعيدة هو مغترب وشغال كويس بس منو دي العاوزا تعرس اسي ياداب بنقول ياهادي قال لي كان كويس ما تطيري قلتة ليهو اتلهي خليني اجيب ليك امجاد وهو يضحك قال لي مبروك مقدما ولو محتاج اديهو معلومات عنك انا تحت الخدمة مشيت جبتة ليهو امجاد وشغال يكاوي قلتة ليهو غلطانة انا الكلمتك مشيت علي الموصلات وصلتة البيت لقيت اخواتي وبنات اختي يلعبو تحت النيمة من شافوني جو جارين العروس جات العروس جات نهرتهم ودخلتة لقيت امي ونهال شغالات شغل جد وعبير جو الاوضة قلتة ليهم انتو شنو البتقولو دا لي الشفع فضحوني فضيحة لقيت ولد عبير راقد شلتو بستو وريحتو صندلية قلتة ليهم والله ريحة عموري حلوة حلا امي قالت لي عبير شيلي ولدك دا ومسكتني ساقتني جوة الاوضة قالت لي اسمعي هنا دا انا وابوك مادايمين ليك ود ولد كويس بنات اهلو جت راجياتنو قلتة لي امي خلاص يمش عليهن انا ماعاوزاهو قالت لي هو سافر وشافك وكلم اهلو يخطبوك ليهو ابوك رضيان جريت حفيانة لي ابوي مسكتو من يدينو يحليل ابوي يدينو من مسك المنشار ناشفات وقويات حنني قلتة ليهو يابوي انا ماعاوزا اعرس عايزا اقراء واساعدك انت تعبتة فينا ختة يدو في راسي وقال لي دا بخليك تقري وهو ولد كويس وتاني ما بتلقي زيو وشغال ومتعلم انا ما عاوز اديك زول كعب واهلو بعرفم ماتكسري كلمتي قدامم انا اتبكمتة وسكتة المهم جو واستقبلوهم احسن استقبال واكرمناهم امو واختو وابوه واخوانو اتنين مبروك مبروك حسيت روحي في حلم في حاجة مسكت لساني وخلاص لقيت روحي اتورطتة ابوي ضرب لي عمي كلمو اخواتي رجالم حضرو وباركو وساقوهم انا الليل كلو مانمتة لقيت مهند ضارب لي يمكن تلاتة مرات رجعتة ليهو قال لي بشري قلتة ليهو انا اتورطتا بكره بديك الشمار قال لي هو بجيني نوم انجزي كلمتو فقع الضحكة وبارك لي سامعة معاهو اخو بيقول ليهو وطي صوتك دا عالي كدا انا مغيوظة منو قلتة ليهو اسمع كلام اخوك تمينا كلامنا وقفلتة التلفون الصباح شابكني العروس العروس لقيتم جايبين حلاوه ماكنتوش اربعة علب وبارد وحاجات انا ما كنتة منتبها بقيت حاسة بعزلة ماشة الجامعة شيلوني لي صاحباتي حلاوه المهم وصلتة الجامعة لقيت زولي مسنتر قاعد يتبسم من شافني
يتبع....
