المراهقة الفاتنة (الجزء الثاني)

البارت 12

لقيتها مكمشة فقاع البيت فوق واحد الملاية مفرشاها فالأرض بجلابتها مازولاتهاش، سديت البيت وقربت عندها نزلت على ركابيا جلست حداها، ماهزاتش فيا عينيها وغير ساهية، الكسدة قدامي ولكن العقل ماكاينش، تنحنحت وبديت نفرك فصبعان يديا ماعرفت مانقول ولا باش نبدا، صوت نفسي الي كايتسمع مجهد فالبيت من شدة التوتر، مديت يدي لراسها حيدت ليها الخرقة ودوزت يديا على شعرها اللي فكرني بشعري فاش كنت حتى أنا متأزمة غير مكلكم ومعقود، ماتحركاتش كاع ..
فرحة : خديجة
خدوج : (لا رد)
فرحة : عارفاك دابا كاتقولي هادي شنو جابها عندي وبأشمن وجه جايا وجالسة حدايا وباللي هي السباب فاللي وقع ليا وكون ما المشكل ديال العرس ماكنتيش تعرضي نتي للاعتداء بلاصتي أنا، هادشي اللي وقع معاك نتي كان خاصو يوقع ليا أنا، غاتقولي أنا غير داوية ولكن ماحاساش بيك حيت مادزتش من نفس محنتك وماوقعش ليا اللي وقع ليك نتي وأي حاجة خرجات من فمي غاتمشي فالهوا وماغاتفيدك نتي فوالو، ضميري مامرتاحش اخديجة من نهار سقت الخبار لهادشي وأنا كانتعذب فالداخل ديالي، محملة نفسي المسؤولية، من نهار دخلت لعائلتكم والمشاكل فوق دماغكم، كاتعيشو نهار واحد زوين وشهووراا مكفسين وضروري تكون عندي أنا يد، خوك حمقتو ومع ذلك صابر عليا عارفة، غاتقولي بعدتو عليكم بعدما كان هو اللي حاميكم ومهتم بيكم وماكاتغيبوش على عينو وعمر الشوكة هي اللخرة دكاتكم وكون مابززت عليه داك النهار يديني لدارنا ماكانت تقيسك حتى حاجة 😢
مسحت دموعي اللي نزلو وكملت بعدما خديت نفسي ..
فرحة : خديجة هادشي اللي وقع ليك كان غايوقع بأي طريقة سواء كان مراد هنا ولا ماكانش هادشي ايوقع حيت قدر الله 😢 ونتي ماليك فيه ذنب، ماشي نتي اللي خاصك تعذبي نفسك وتحمليها الذنب، ماشي نتي اللي خاصك تحشمي وماشي نتي اللي خاصك توضعي حد لحياتك، حيت ماعرضتيش راسك، ماقلتيش ليهم جيو تعداو عليا جيو خوذو مني شنو بغيتو، هوما اللي خاصهم يتعذبو ويتحاسبو على عملتهم، هوما الظالمين ماشي نتي، هوما المجرمين ماشي نتي، نتي اخديجة ضحية، ضحية وحوش وذياب مافقلبهم لا رحمة ولا شفقة والأكثر ضحية مجتمع بحالهم ماكايرحمش وديما كايحمل الضحية مسؤولية الجرم المرتكب فحقها، كاينبذو المغتصبة على أساس أنها وصمة عار وأنها هي سبب اللي وقع ليها، عارفا هادا هو السبب الرئيسي اللي مخليك فهاد الحالة وكاتمناي الموت، كاتقولي فنفسك باللي نتي عار على عائلتك وخذلتيهم فاش ترزيتي فشرفك وأن أصابع الاتهام كلها غاتاجه ليك، غايحكمو عليك بلا مايسمعوك ولا يحسو بيك ولا يديرو راسهم مكانك، خديجة نتي باش ترضي الناس راك كاتعصي خالقك، كاترتاكبي معصية كبر منهم وهي قتل النفس، باغا تقتلي راسك وتغضبي الله منك باش تريحي الناس؟ ناس اللي عمرهم يفوتوك ولا يوقروك واخا تكوني تحت التراب ديما فمهم محلول وعمرهم يتسد؟ باغا تحرمي عائلتك منك؟ وتزيديهم هموم؟ واش عارفا باللي مراد لحد دابا كايحس بذنب كبير من جهتك؟ الله اللي عالم بحالتو وبقلبو شحال محروق من جهتك نتي، ختو وبنتو، بنتو اللي رباها وكبرها من فاش حلات عينيها على الدنيا، وختو اللي وصاه باه عليها وهو على فراش الموت، ودابا كايقول ماحميتهاش وخلفت بالوعد اللي عطيتو لبا قبل مايموت، ماكايبينش ولكن أنا حاسة بيه وكايداعي القوة باش مايشطناش حنا، ومك؟ واش ماشفتيش حالتها كيف ولات؟ خوفها عليك وحزنها على حالتك غايقضي عليها وغايطفي شمعة الدار 😢 خالتي مابقات كاتمنى من الدنيا والو غير أنك ترجعي ليها كيف كنتي، كلنا ولينا عايشين فحالة رعب أن اليوم نعتقوك وغدا مانقدروش، مافكرتيش فينا اخديجة؟ حاسة بيك والعذاب الجسدي والنفسي أكثر باش كاتمري وحنا معاك وغانبقاو معاك وحتى نتي تعاوني معانا اخديجة، ماتبقايش حابسة نفسك وقاتلاها بالسكااات، دوي وبكييي، ويلا مابغيتيش تبكي قدامنا حنا بكي على الله وبين يديه، توضاي وصلي ودعي ربي يهون عليك ويهديك ويبعد عليك الشيطان والوساوس ديالو، دعيه ياخذ ليك حقك من دوك المجرمين، حيت داكشي اللي غايدير ليهم الله مايقدرش العبد يديرو، خليه هو يحسابهم، وكليهم لله وحدو قادر ينتاقم ليك منهم، هادا ابتلاء، والله سبحانه ابتلاك باش يختابر صبرك لذلك صبري وزيدي فالصبر وإن الله يحب الصابرين، قوي إيمانك اخديجة ..
تحدرت عندها كثر وبستها فراسها وشديت يديها بين يديا ..
فرحة : خديجة رجعي لينا 😢 نتي ختي ماشي غير لوستي، والله شاهد شحال كانعزك نتي وخواتاتك وخالتي، توحشنا طلتك فالدار، توحشنا صوتك ومزاحك، توحشناك اخديجة، ماتحرميناش منك اختي، ماتحرميش ولدي من عمتو (حطيت يدها على كرشي) اليوم درت طريقة من الطرق التقليدية ديال اختبار الحمل اللي كانت وراتها ليا دادا وطلعات إيجابية 😢 ونتي أول وحدة نقولها هادشي، حتى من مراد ماقلتهاش ليه بغيت نديرها ليه مفاجأة وبغيتك نتي تعاونيني، كانواعدك مانخبر حد حتى ترجعي نتي لطبيعتك وتعاونيني ..