المراهقة الفاتنة (الجزء الثاني)

البارت 55 والأخير من الجزء الثاني

وصلوها لواحد البيت فين ناعسين العيالات لي ولدو، كانو بعض الأسرة خاويين جلسوها فأول واحد حدا الباب على اليمين كانت مفرشة فيه مانطا تسرحات فوقو معنقا بنيتها والبكية شاداها جاها داكشي فشكل وتما كاين لي حاضيها وكاين لي ناعس ماجايب للدنيا خبار وباقا كاتسمع صوت الغوات، تكات شويا وعاود حلات عينيها عطات لبنتها البزولة لي ماقدراتش تشدها وتاهي تعgرات فيها وجمعاتها تا سمعات الحس وهزات راسها لعند الباب لقات زهير داخل محمل كايقلب بعينيه تا طاح عليها ومشا عندها مبتاسم باس ليها راسها والعيالات كايبرgو ..
زهير : عمري الحمد لله على سلامتك
دنيا : الله يسلمك
شاف بنتو صغيورة مغمضة عويناتها وفيمها وكلشي ليها صغيور ويدياتها جامعاهم تحدر عندها باسها وشم ريحتها وجبد تيليفونو صورها وشد الصاك لي كان هاز حطو حداها هو والمانطات ..
زهير : هاكي خذيت ليك شي حاجة تاكليها تا تجيب ليك فرحة الماكلة ماشي بزاف باش وصلو، كانت بادخل عندك ولكن ماشي وقت الزيارة هادا وخلاو غير واحد فينا لي يدخل ليك هادشي وقالت ليا ندخل أنا
دنيا : واخا
زهير : وها المانطات تغطاي وغطي ليا بنتي من البرد صافي؟ خاصاك شي حاجة ادنيا؟
دنيا : لا والو
زهير : امم مابقى والو للزيارة ونعاود ندخل عندك (عاود باسها) ردي البال لراسك
حركات ليه راسها وخرج حيت الحارس قاليه مايتعطلش ومابغاش يخسر مع شي حد تما، خرج للباب ولقا خوه وفرحة كايتسناوه ..
فرحة : لاباس عليها؟ كي لقيتيها
زهير : شويا وصافي باينا فيها عيانة
مراد : الحمد لله على سلامتها ومبروك عليك اخويا تربى فعزكم
زهير : الله يبارك فيك ابا مراد
فرحة : يالاه وصلوني لدار نصاوب ليها الفطور باش نجيو مع الوقت قد قد، مسكينة ختي غاتكون تعذبات بزاف حاسة بيها
رجعو للدار بعدما تقدات فرحة شنو خاصها ودخلات نيشان للموزينة بجلابتها بدات تصاوب فالحريرة وتفيض الحليب وطيب الخبز وتا اللويزة دارتها المهم كاع لي صحي دارتو وجمعاتو ليها فسلة، وصلات ثاني الوقت ومشاو عندها دخلو هاد المرة بثلاثة بارك ليها مراد وفرحة تلاحت عليها عنقاتها وتاتحثث معاها وزهير هز بنتو أذن ليها فوذنيها مع قبيلة كان مزروب وأجلها ..
بقاو معاها تا سالات الزيارة ومشاو واخا زهير ماسخاش والغد ليه داو ليها الرفيسة قاداتها ليها فرحة ولقاهم عطاوهم ورقة الدوا للام وبنتها مشا خذاهم ليها باش توضى تاهو وداوي لإيمان البوط، وفرحة بقات على اتصال مع رابحة لي خلات عندها ليليان والدراري بقاو معاهم تاهوما مقابلاهم فوزية ..
#كملات 48 ساعة لي خاص تجلس فيهم فالسبيطار، ومشاو ليها تسناو تا شافتها الطبيبة ودارو تحليلة للبنيتة من رجليها عاد عطاوها ورقة الخروج ودخلو جمعو معاها تما وتوادعات مع دوك العيالات لي شرات معاهم الصحبة وتشاركات معاهم الطعام، تما فين كايحننو فبعضياتهم وكايتعاونو حيت مارين من نفس التجربة، شدو الطريق نيشان للدوار تما فين غاترتاح كثر ..
كي دخلات للدار لقات لوايساتها سابقين تما قادو ليها فراشها والاولاد تعرضو ليها فرحانين بيها وبختهم لي بغاو ياكلوها، تجمعو عليها كاملين فالبيت ناشطين كايضحكو وفرحة كاتوريها كيفاش تهز وترضع وتبدل وكلشي، نهار الثالث دارو رفيسة لعائلة والعيالات براس الحانوت والمساخن، إيمان تزادت معاها فرحة خرى والدار ولات منورة كثر وكثر ..
خرجو النتائج والاولاد نجحو بنقط مزيانين وتا دنيا جابت مزيان من غير الامتحان لي جاها الوجع فيه جابت المعدل ولكن فرحات عادي المهم دخلات ليها وصافي، ودابا تفرغات فالعطلة الكبيرة لعائلتها وخاصة بنتها ولات هي روحها وكلشي تعلقات بيها بزاف وتخاف عليها وخوتها جابهم ليها مراد يدوزو معاها العطلة ونجاة اتاصلات باركات ليها فالفون وواعداتها تزورها عما قريب غير تاتشد مرات يحيى فراسها حيت تاهي حاملة (فرحة الحمل وشهادة الباك 😍) ..
#وتمضي_الأيام
عام آخور وولدات فرحة ثاني ولد ادريس سماه مراد، كان بغا يسمي على باه ولكن سبقاتو رابحة وسمات ولدها عليه صالح وتبعاتو بنت سماتها باتول على اسم حماتها حيت فوزية ولدات بنية وسماتها فاطنة على مها وخديجة تاهي فرخات ولد سماتو خالد وهاكا العائلة زادت كبرات ومراد نجح فالمشروع الفلاحي ديالو وولا داير جمعيات الحليب والدواجن، المهم ربي كبير وجازاهم على صبرهم ومع ذلك مابغاوش يخويو الدوار حيت ولفوه وتما حياتهم، دنيا وفقات بين دارها وقرايتها وكاتجيب مزيان .. يحيى كايسول فختو ديما وكايزورها مرة مرة هو وريماس لي ولدات ليه توام من الدقة اللولة ههه جاد وآياد وماكايشوفش دنيا حيت كاتخبى وماكاتلاقاش معاه وتاهو ماكايسولش عليها تا لواحد النهار جا وشاف بنيا صغيرة كاتوقف وطيح ومشا عندها هزها كايشوف فيها، نفس عينين ختو الزرقين ونفس الملامح سبحان الله عرفها بنتها عنقها بجهد بحال يلا كايحاول يشم فيها ريحة مها ولا كايتخيلها هي، شافتو فرحة هاكاك ودوات معاه وقاليها خلي كلشي للأيام  ..