المراهقة الفاتنة (الجزء الثاني)

البارت 46

مراد تكا على الحيط كايشوف فالمشاكل لي طاحو على راسو وخاصة هادشي لي وقع اليوم، نزل عينيه عند فرحة ولقاها جامدة بلاصتها وكاتشوف فالارض ودموعها نازلين وتعصب كثر من يحيى حيت جرحها بكلامو وهي ماليها ذنب فلي وقع ووصل ليه ميساج أنه مامهليش فيها وجايبها خدامة ليه ولخوه، كون قالها فظرف آخر ماكانش يتردد لحظة وحدة أنه يهرس ليه فمو، ضرب يديه مع الحيط كايسب ونزل عندها حط يديه على كتفها وزير ..
مراد : فرحة
فرحة (لا رد)
مراد : نوضي من الأرض يالاه (ماجاوباتوش وبقات على نفس الوضعية، تنهد وجاه صوت بنتو من البيت) فرحة البنت كاتبكي
عند هنا وفاض بيها الكاس، هزات راسها كاتشوف فيه بعينين حمرين وعامرين دموع وشفايفها كايترعدو وشعرها نازل على جبهتها خارج من الخرقة ..
فرحة : بنتي بوحدي اااه؟ وااااش بنتييي بووووووحدييي واااش جبتها معاياااا؟ فاااش نتا ماقاااادرش على الاولاد لااااااش واااالدهم معااايااا لاااااش وكاتقوليا زيديهم مااازااال فين غانزيدهم هااا فيييين؟ صااافي باااراااكاااا عيييت منك عيييت منكم كااااملييين تقهرت ووصلاااات بياا للحد، طلع ليا هاد الوييييل فراااااسي (نترات الخرقة من فوق راسها)، وصلااات لخويا يعايرنيي بالوسخ 😢 يحيى عايرني أنا وبنتي وقال عليا مووووووسخة فيين بانت ليييه فييين (وقفات شانقة على مراد كاترعد) مرااد واش أنا موسخة هااا قول ليا الحقيقة هو قاليا مامهلياش فراسي وفبنتي واش بصح هاا واش عمرك شميتي فيا شي ريحة خايبة ولا لقيتي فيا شي وسخة هئهئهئ ه هو جا اليوم ولقاني هاكا ولكن والله ما أنا هاكا 😢 أنا ديما مهلية فراسي ونتا عارف ياااك هئهئ عاارفني واخا نكون ميتة بالعيا ماكانعس تا كانطرف حالتي وحالة بنتي هئهئ أنا الصباح لبست هاكاك حيت غانشقا ومابيتش نزيد الحوايج الاخرين للغبرا والوسخ هئهئ ويديا (كاتوريهم ليه) يديا عمرهم كانو هاكا ولكن تلهيت مع مشكلة دنيا ومابقيتش رطبتهم اه اه مارطبتهمش ومع البرد ولاو هاكا والما وجافيل داكشي علاش هئهئ ووجهي مابقيتش درت ليه شي واقي غ غير تلهيت والله هئهئ و وو بنتي اه بنتي عمري خليتها موسخة والله غير غير وكلتها وهزيتها بزربة باش نكمل شقايا ومايجيش خويا يلقا الدنيا موسخة و وأنا كنت ناوية كي ديما نحمي الحمام وندخل معاها را قلتها ليها الصباح هانتا شوف جيبها وسولها سول بنتي تقوليك اش كانعاود ليها وديما كانقيها 😢 (ولات كاتبكي وتهضر بهيستيرية ومابقاتش عارفا اش كاتقول) أنا درت هادشي على قبلك هئهئ حيت كانبغيك و وهو ماعندوش الحق يتدخل هئهئ ماشي شغلو و وونتا ماعليك والو (عنقاتو) نتا مامخليني مخصوصة من والو اه هئهئ نتا قلتي ليا ديها فراسك وبنتك ولكن أنااا لي بغيت ندير هادشي أنااا 😢 (كاتقيس ليه فوجهو) ه ههو نقص منك ياك ش شوف ماتديهاش فيه هو ماعارف والو ونتا حسن منو بألف درجة اه حسن منو و وتانا مابقيتش بيت نهضر معاه ح حيت ماحتارمكش
مراد : ششش صافي ماوقع والو دابا تهدني واخا شش
فرحة : لا لا وقع هئهئ وقع وبزاااااف هو را راه عايرني
ضارت شافت فدنيا وزهير لي واقفين حداهم وكايشوفو فيها كيفاش كاتهضر ودنيا كاتبكي مزيرا على زهير على يديه ..
فرحة : نتي اه اه نتي السباب فهادشي نتي 😢 علاش درتي هاكا هاا علاش؟ شنو درت ليك انا تا تجازيني هاكا، هو هو خلطنا بجوج وتبرا مننا بجوج ومنعني من ماما ودادا سمعتي منعني منهم بجوج هئهئ
دنيا : خ ختي
فرحة : ختك؟ ختك وديري فيا هاكا وطعنيني هااا 😢 و معامن؟ وعلى قبل من؟ على قبل واحد طيح بقيمتك قدام خوك وهانو وقاليه نتا ماربيتيهاش وهي ماتسواش وجات عندي هااا على قبلو هو؟ واش بعد هادشي غاتسنايه يحتارمك ويقدرك ويدير ليك قيمة؟
مراد : فرحة صافي باراكا
ولات غير كادوي وماواعياش بشنو كاتقول فقط كلام خوها كاينخر فيها وماعرفات تلوم مراد ولا طيب بخاطرو ولا شنو دير، حسات براسها غايطرطق ومشات كاتجري نيشان لبيتها سمحات تا فبنتها لي غايخرج ليها العقل بالبكا، دخل عندها مراد هزها وخرجها برا، داز من حدا خوه ودنيا لي حيدات من حداه وضربات ليه يديه كاتشوف فيه بغضب ..
دنيا : هادشي لي بغيتي هاا؟ هانتا وصلتي ليه اوا فرح مع راسك بالانجاز العظيم لي درتي 😢 الله ياخذ فيك الحق عمري نسمح ليك على هاد الفضيحة وعمري نسمح تا لراسي لي درتها بيديا وخليت حمار بحالك يحط عليها يديه الموسخين (شافتو هز يديه وفاللخر تراجع فاش شاف حالة وجهها وجمعها ونزلها) ضرب ياالااه ضرب شنوو كاتسنىىى، داكشي لي خلا خويا كملو نتااا ياالااااه ولكن عااادي أنا دابا كانخلص على مادرت وهادا غير سخط بابا ودعاويه كايخرجو فيا حيت خنتو وثقت فناس خرين عند أول عقبة رماوني، كون كان باقي معايا مايوقعليش هادشي ومانطيحش فهاد الوحل، وتا دابا باقي الحال فين نصلح هادشي ونزيد فحالي، يحسابلكم ماكاين فين نمشي ولا عند من؟ راكم غالطين أرض الله واااسعة ..