المراهقة الفاتنة (الجزء الثاني)

البارت 44

وهي كاتغوت وتسب وهو حلف لا طلقها، فرحة شافتهم مشادين وقربو يطيحو عليها هي وبنتها لي تخلعات وبدات تبكي، ناضت هازاها وبعدات منهم كاتفرج تافرقهم مراد بزز ..
مراد : يا ولاد الجد الله ينعل طواسلكم 😡 واش أنا دابا دري صغير وسطكم ولا شنوووو، ونتي حالة داك الفم وتسبي مااالك؟ دايراها قد راسك وزايداها بتخراج العينين، حمدي الله قبل عليك
دنيا : ماطلبتووووووووووش
زهير : وتا دابا باقي الحال، سيري نطحي راسك مع الحيط، الخرااا لا صورتي مني شي حاجة
مراد : سكت نتاا، (شافيها) دابا نتي مابيتيش تسكتي وديري شنو قلنا ليك ياااك؟ واخااا فرحااااا ضوري لخوك يجي هو يحل هادشي يالااااه دااابااااا
جلس فوق الكرسي ويديه على ركابيه كايزعزع فيهم بعصبية وزهير كايمسح على شعرو قرب ينتف راسو بالاعصاب ودنيا واقفة حداهم كاترعد وضور فعينيها أنا فرحة لي واكلة الدقة حارت وماعرفات مادير ماتحركاتش من بلاصتها من جهة راجلها ومن جهة خرا ختها لي لسانها طوال على القياس ومابقات تحشم من حد تا من نسيبها لي داير جهدو يحل مشكلتها ماوقراتوش ودخلات فيه طول وعرض وكون ماحشم كان يخلطها ويطلق عليها زهير يكمل على ما بدا ..
مراد (بالغوات) : فرحاااا ماكاتسمعيييش؟
دنيا (بترجي) : خويا مراااد
مراد : شنووو؟
دنيا : عافاك ماتعيطش لخويا ماتقولو ليه والو الله يخليك
مراد : وشنو بيتي ابنت الناس؟ درنا معاك حل ماقبلتيش بيه اللهم نعيطو ليه هو نيييت يتصرف فحريرتكم
دنيا : هادي حريرتي أنا ومابغيت حد يتدخل فيها 😢 أنا لي درتها خليوني نفكها عافاكم
مراد : وكيفاش غاديري ليها ابنت الناس؟
دنيا : غانزل هاد الولد ونتهنا، نقدر كاع تا نمشي لبرا ونلقا ليه حل المهم مانتزوجش بهادا وماتوضلش الخبار لخويا 😢
مراد : من نيتك تادويي؟ باغا تصلحي معصية بما كثر منها هااا؟ باش غاتواجهي لي خلقك ونتي قاتلة روووح؟ وباه معتارف بيه وبغاه (شاف فزهير وحمر فيه مزيان باش يأكد كلامو) ولا لا ازهير؟ دوي تا نتا وقول اش عندك ياك نتا باه اوا هضر على حقك ولا غاتخليها دير لي بات هي؟
زهير : لي عندي قلتو امراد، بات الزواج غانسترها ماباتش تعاود لمها وداك الولد فاش يتزاد تحطو يتربى مع خوتو ماغانرميهش
مراد : اش قلتي نتي؟ يا نحلوها بيناتنا يا خوك يسيق الخبار ونسيفطو تا لباك فالحبس ماعندناش مشكل
سكتات كادمع وتشوف فيهم، زيروها مزيان وخاصة بيحيى لي عارفاه علاش قاد وفكلتا الحالتين غاتبقا بلا قرايا، غير الحالة اللولة غاتبقا عايشة والثانية يقدر خوها يقتلها ماشي بعيد، هزات عينيها فختها كاطلبها بعينيها تعاونها ولكن فرحة ماعندها مادير ليها قلبات عليها وجهها وخلاتها كاتشوى فنارها بوحدها ..
مراد : ماغانباتوش هنا الالة، طلقينا خلاص را تابعنا مايدار
دنيا : مراد ..
مراد (قاطعها) : اه لا ؟
دنيا : و وواخا 😢 ولكن بشرط
زهير : وكاتشرط من الفووق 😡 باز لكمارتك
مراد : اشمن شرط؟
دنيا : نكمل قرايتي
زهير : شناهوااا! نتي مريضة لا؟ نسااااي شي حاجة سميتها قرايا
دنيا : ماغانساهااااش 😡 ولا الموت حسن ليا كاااااع
زهير : مووتي شكون حبسك؟
مراد : سكتووو شويااا، شرحي ليا مزيان! فين باغا تكملي قرايتك؟ يلا كان على برا غير نسايه
دنيا : عارفا 😢 ضيعت مستقبلي باديا حيت حماااارااا وماعندي عقل
مراد : وشنو؟
دنيا : غاندخل لافاك نكمل فشعبتي
مراد : لافاك ماكايناش هنا ادنيا يعني غايخصك تمشي للمدينة تقراي
دنيا : وشنو فيها؟ أنا ماغانعيشش هناا
زهير : اهاااه، ياكما نبني ليك قصر تعيشي فيه؟ واش كاتفلاي على الوقت ولا شنو؟ القرايا ماكايناش وهنا فين غاتعيشي تا تولدي
دنيا : اوا مابغيتش
مراد : تسناو بلاتي
ضار يديه على لحيتو كايحكها وكايفكر فشي مخرج لهادشي، حار بيناتهم وعصبوه بالبيان ومازال فيه شوية الصبر تا يشوف فين غايوصلو، تا دخلات فرحة لي كانت حاضيا معاهم ..
فرحة : خليوها تسجل بعدا وتحط وراقها فلافاك باش ضمن بلاصتها ومايقدامش ليها الباك وتصدق بوالو وهي طلبات غير لافاك تا لاغيبات ماكاينش اشكال عكس المدارس الاخرين لازم تحضر
مراد : وفين عرفتي نتي هادشي؟
فرحة : الجروبات 😑 لي بغيتي تلقاه فيهم ودابا ماعلينا خليونا فالمهم
دنيا : فرحة الحضور ماشي ضروري فكليات الاداب لي مافيهم تا حاجة مهمة 😡 ولكن العلوم ضروري نحضر للمحاضرات وأنا باغا نحضر، ضيعت فرصة عمري ومابغتش تالافاك نضيعها، و وووزعما خليوني فدار خويا نقرا عندو
زهير : ماتجلسيش عندو بمرا حسن؟
مراد : مشكلة صافي، نعطيييكم أنا ساروت ديال الدار تما جلسو فيها ولكن بقات فالدراري وقرايتهم شنو غاديرو فيها؟
زهير : ولادي غايقراو هنا وحدايا حيت ماغادي فين، ماغانخويش الدوار باش هادي تخرا، نمشي نجلس انا تما حداها تيتي نيني ونخلي شغلي هنا، مايمكنش وأصلا هي حاملة دابا اش بات بشي قرايا؟ وفاش تبان قنبولتها اش دير ..