المراهقة الفاتنة (الجزء الثاني)

البارت 22

عييت نغمز فيها وهي كاتشفا فيا وتخرج فيا عينيها، جراتو بيديها قدام عينيه وكرشي بانت نزلت التيشورت غطيتها وهزاتو فيديها كاتوريه ليه ..
نجاة : شفتيها باش مخبياها، هاا باش
مراد : وعلاش مخبية؟
نجاة : كنت نيت غانضور ليك على قبل هادشي، تجي ترد ليها عقلها فراسها را تسطات
مراد : مافهمتش؟
نجاة : دخل للداخل ونفهمك ونوضي نتيا غبري عليا الله يتبعك البلا 😡 عمر صوتنا تسمع فالاقامة حتى لليوم شوهتينا
شديت فالحيط بيديا حتى وقفت بزز ورجليا فاشلين وشعري مشعكك ووجهي خلاص بلا ماندوي حاسة بيه بلا مانشوفو ..
نجاة : بقيتي تا جبتيها فراسك 😡 تحركي لبيتك شوفي شنو ديري لداك الوجه ونتا اولدي الله يرضي عليك بدا تشد يديك شويا، شوف كي رجعتيها وكون ماكنت أنا مانعرف فين غاتوصلو، كلشي كايتحل بالهداوة
مراد : ولسانها هي خلا شي هداوة الحاجة، تحمد الله حاملة
فرحة : سير بعد مني 😢 الله ياخذ فيك الحق، عطيني التيسااااع يااااك طلقتيني واصافي فرقني عليك وهاد الكرش شكون قاليك ديالك هاا ياك عاد شفتيني معامن كنت
نجاة : سيري بغيت ليك القطع فداك اللسان ابنت الحرااااااام، مابقيتي تحشمي نعلة الله عليك، لاعنداك اولدي البنت بنتك وجات من عندك حاملة ودابا أنا غانعاود ليك الواقعة ونتا حكم ونتي والله لابقات فيك، هاد القتلة اللي شديتي ومازال زايدا فيه خلاها راجلك كون ماديك الكرش كون خليتو يهرس ليك عظامك باش تعلمي، راه نيت خاصك ترباي وأنا ضسرتك بزااااااف
فرحة : ياك اماما
نجاة : يعطيك الغمة
فرحة : جيتي عليه يااااك وأنا اللي بنتك تحاميتي معاه عليا هئهئ بلاتي يجي يحيى
نجاة : يجي عليك حيط المسخوطة، وا بلاتي يجي خوك ونشوفو تاهو شنو يدير معاك وليتي تخرجي من ورايا وضوري فالزناقي، اجي بعدا فين كنتي ومعامن ها؟
فرحة : كنت مع حسام وكون قلتها ليك ماكنتيش تخليني نخرج
نجاة : يخليك بلا راس وكاتقوليها بوجهك حمر نيت 😡 ياك قلت ليك عطيه التيساع ولاباقيش دوي معاه ااا مالك ماكاتسمعي الهضرا وكاديري ها اللي فراسك
مراد : شكون هادا الحاجة؟
نجاة : هادا ولد عمها اوليدي
مراد : ولد عمها! وشنو بينها وبينو تا تخرج معاه 😡 واش ديك الحالة فاش لقيتك معاه بقا ليه شويا ويبوسك، كون وصلت عندو قبل مايزيد اقسم بالله ماكنتو تفلتو بجوج
فرحة : ديها فراسك نتا مادواك حد
جراتني ماما من يديا بجهد حتى غوت وتمات غادا بيا لبيتي كاتزرب وأنا شادا كرشي ..
مراد : بشويا عليها الحاجة
ضرنا عندو بجوج وهو كايشوف فيا مخلوع وماما بدات كاضحك وجراتني بشويا دخلاتني للبيت وحمرات فيا وخرجات عندو، مشيت لمرايتي نيشان كانشوف وجهي كي ولا شداتني البكيا وعرفت غايصبح مافيها مايتشاف، جلست ففراشي وأنا كانبكي حظي المزفت، ماعرفتو علاش جا ياك سالينا كلشي لهيه ودابا اش جابو وحتى ماما غاتعاود ليه كلشي وتخسر ليا مخططي وضربو ليا فالزيرو، خفت نخرج عاوتاني ونزيد نعصبو ونجيبها فعظامي، تكمشت وجلست كانتسنا شي واحد فيهم يطل عليا ولكن باينا هضرتهم مازال مطولة، هزيت تيليفوني شعلتو باش نهضر مع حسام ونعاود ليه، غير شعلتو وبداو كايجيوني الميساجات، دخلت ليهم ولقيتهم كاملين من عند دنيا اللي شاداها العلبة الصوتية كثر من 30 مرة وميساجات خرين كاطلبني فيهم نجاوبها ضروري مسألة حياة أو موت، خلعاتني ودوزت نمرتها، دغيا جاوباتني تقول كانت هازاه دايرا عليه صبعها ..
دنيا (بلهفة) : فرحة، أخيييرا اختي
فرحة : مالك شنو كاين
دنيا : فرحة خاصني ندوي معاك ضروري، موضوع مهم
فرحة : الله يسمعنا خير، دوي كانسمعك
دنيا : ماشي فتيليفون بغيت نتلاقاك، أنا دابا فالطريق جايا عندك للدار
تفكرت مراد اللي كاين ويلا تلاقات معاه مايحصل خير ..
فرحة : لا شوفي أجليها واخا دابا عندي مشكل
دنيا : مايمكنش نأجلها افرحة راها حياتي اختي خاصك ضروري تسمعيني وراه متعلق بيك تانتي وكايهمك
فرحة : شوف..
قبل مانكمل كلامي قطعات عليا، رميت تيليفون وأنا كانأفأف، مانعرف منين طلعات ليا تا هي، باراكا عليا غير هاد الغول ماقادا على صداع خور، نضت بدلت حوايجي ولبست بيجامة مزيرا وجمعت شعري بزز ووجهي غسلتو وخرجت نجيب الثلج نديرو ليه، دزت من قدام الصالون وسمعتو كايقوليها ..
مراد : واش هاد ابليس مازال مابغا يتوب، بغاني نعوقو من شي قنت باش يحشم ويعطي لمرتي التيساع
نجاة : واهادشي اللي وقع اولدي وديك المكلخة ديال بنتي تيقاتو وكادير غير اللي قاليها، يحسابها هاكا غاتهنا منو أنا اللي كانعرف دك الشيبة العاصية
شافوني دايزا وهو يعيط ليا ..
مراد : اجي نتي
درت بحال يلا ماسمعتوش حتى عاودها وبالغوات هاد المرة ورجعت بلهلا يحزقو ليا، وقفت حدا الباب وربعت يديا ..
فرحة : شبغيتي؟
مراد : دوزي تركني هنا بغينا نهضرو
فرحة : ماعندي فاش ندوي معاك
يالاه وقف ليا مخنزر وحنا نسمعو الصونيط وناضت ماما ..
نجاة : شكون غايكون ثاني!
فرحة : هادي دنيا حيت قالت ليا جايا ..