المراهقة الفاتنة (الجزء الثاني)

البارت 47

واقفة وسط الكوزينة كاتمشي وتجي وتخبط فالماعن وتهز وتحط فيهم وحوايجها توسخو ووجها تاهو حالتو بالعجينة ..
دنيا : اووووووففف شنو غاندير أنا دابا شنوو 😢 فينك افرحة اجي طلي على ختك
كبات أتاي فالكاس برداتو شويا وذاقتو وخيبات سيفتها ..
دنيا : يععع مالو جا باسل هاكا، ياك درت النعناع وأتاي والسكر اش خاصو ثاني
وقف قدام الباب كايشوفيها تالفة وكاتهضر مع راسها وتضرب رجليها مع الارض وشعرها مخربق وحوايجها مقزبين ولاصقين عليها كيما العادة ..
زهير : مالك؟
دنيا (تفزعات) : هأ، خلعتييييني ففف واش ناوي تقتلني نتا ولا شنو
زهير : ماكرهتش
دنيا : يخ على جنس 😡
زهير (تنهد) : شنو كاديري؟
دنيا : راك كاتشوف على عينيك، كانصاوب الفطور لولادك جاو فيقوني من النعاس
زهير : ومالهم مافيقوني أنا
دنيا : زعما ماعارفش علاش؟ راك منوض فيهم الرعب، هاعار الله لاباقيش تقيسهم راه ضربك خايب وغاتخليهم يكرهوووك، واش مهم رماتهم ماحناتش فيهم وجاو عندك نتا كاطحنهم! عيب عليك والله
زهير : كايديرو علاش
قرب منها وشاف الصينية وبراد أتاي فيها والكاس لي شربات منو هزو وذاقو ..
زهير : مال هاد أتاي هاكا؟ ماخليتيهش يطبخ شويا
دنيا : كيفاش؟
زهير : والو، خلي دابا نقادو مال وجهك عامر عجينة؟
دنيا : عجنت
زهير : واايلي، وريني نشوف
هزات الوصلة وحيدات ليه الزيف لي مغطيها وراسمة ابتسامة على وجهها كادل على الانجاز العظيم لي دارت 😂، زهير شاف دوك الgرصات وحبس الضحكة بزز زام فمو ..
دنيا : كي جيتك؟
زهير : لا لا تبارك الله عليك، عرفتي نتي غاتمشي بعيييييد راك حادgة مع راسك
دنيا (بافتخار) : عارفا عارفا
زهير : ههههه الثقة فالنفس
دنيا : أكيييد
زهير : وفين غاتخبزيه؟
دنيا : الفران
زهير : لا لا بعدي على الفران تصدقي مفرgعانا
دنيا : وفين غانطيبهم؟
زهير : را المقلة والبوطة، غير ردي بالك، شوفيه واش خمر هههه
دنيا : كيفاش؟
زهير : الصبر ياربي، سيري سيري خبزي دغيا
ميقات فيه وشعلات البوطة دارت فوقها المقلة وهزات بطيبيطة دايرا كسيدة مسكينة مدكدكة عوجة رماتها فيها وهو حاضيها وكايضحك وكايحرك راسو، هز داك البراد رجعو فوق البوطة ونقص عليه شويا وجبد طبيسلات خوا فيهم الزيت وحط الزبدة وداكشي كامل لي كاتحط فرحة ولي عرفو بحقها نيت ..
زهير : ها البلاطو فيه كلشي هزيه للطبلة وعنداك تشتتي هادشي
خرج من حداها بعدما طفا على البوطة وخلاها مدابزة مع خبيزتها وهازة معلقة ديال الخشب كاتقلب بيها وتأفأف ..
سالات وحطات داكشي فشبيكة وبدات تنقل للطبلة حتى حطات كلشي وجاو الدراري تجمعو عليها وزهير وهي جالسة كاضحك، غير هزو الخبز باش يبداو وهوما يشوفو فبعضياتهم وتكرشخو بالضحك وتا زهير ماقدرش يحبس راسو وهي كاتشوف فيهم مافاهمة والو ..
دنيا : ضحكونا معاكم
رضا (ميت بالضحك) : ههههه شنو هادشي؟ (هاز خبزة بطرف صبعو)
دنيا : خبزة مالها؟
أمين : ومالها عوجة
زهير : هههههههه
يونس : ومحروgة وقاصحة هادي غاتهرس لينا ضراسنا
دنيا (بغضب نتراتها ليه من يديه) : اوا جلسو هاكاك لاتاكلوش 😡 سري أنا لي دايرا فيكم راسي ونضت صاوبتو ليكم
رضا : فين خالتي فرحة؟
دنيا : مشات تجلب لبنتها مالها غاتبقا مقابلاكم نتوما
يونس : ودابا شنو ناكلو؟
دنيا : را زيتون والزبدة دوزوهم مع أتاي
أمين : عطيني أنا داك الخبز نقضي بيه
دنيا : لا عيبتوه غاناكلو بوووووحدي
زهير : عطي للدراري ياكلو اهياتا
دنيا : عندي سميتي 😑
زهير : واعطيهم باراكا
دنيا : را هو يهزوه ومايبقاوش بعيبو الحاجة يحمدو الله لي لقاوه 😑 را تايقوليك لي مارضا بخبزا مايبقا يلقا تا ربعها ماشي غير نصها
زهير : هاهاي وا تعلمتي دوي
دنيا : وعلاه مالي لي مانعرفش
بداو ياكلو والدراري شدو الخبز رطبوه وسط أتاي أما زهير اكتفى غير بكاس ديال أتاي عصر عليه وهو ساهي تا نغزاتو دنيا ..
دنيا : زهير بيت نمشي للمدينة
زهير : وعلاش بسلامة؟
دنيا : خاصني نتسجل قبل مايتسد السيت ديال لافاك ونبقا بلاش
زهير : اوا يتسد أنا مالي؟
دنيا (بعصبية) : زهيييير الله يرحم باااك لاتفقسنيش ثاني 😡 غانقرا هي غانقراا سمعتيي طييير تنزل غاانكمل قراااايتي وسدييينااا وغدااا دير بحساب غانمشي نهز وراقي ونتسجل وغانبقا تما 3 أيام ولا كثر تا نقاد أموري عاااد نرجع
رضا : ديونا معاكم
زهير : فين للروووضة؟
دنيا : اييه 😡 ماتغوتش على الولد وشنو فيها يلا ديناهم معانا؟ مساكن عمرهم مشاو للمدينة وحنا غانرجعو قبل الاثنين
يونس : اه اه ابا عافاك ديونا معاكم نشوفو المدينة
أمين : والله ماندير الضسارة غا ديونا
دنيا : غانديوكم وغانمشيو كاملين ياك ا زهير 😘 😉
رمات ليه بوسة فالهوا مع غميزة خلاتو مفعفع وغير حال فمو فيها ووافق بلهلا يطريه ليه خلاهم كاينقزو بالفرحة وكايشكرو فدنيا لي تسناتهم كملو ماكلتهم وناضت جمعات الطبلة وزيداتهم يعاونوها فالروينة مابغاتش تخليها لفرحة وهي عاد صحات ورجعات شويا وقررات تبدا تعاونها ..