المراهقة الفاتنة (الجزء الثاني)

البارت 16

فرحة : بلا ماتفكريني فهاداك تاهو 😡 ماعرفنا واش ولادو ولا ربايبو ففف
نجاة : الله ينتاقم منو الظالم لاخور، خان العشرة ونسا شنو درت على ودو وبشحال ضحيت وحتى من خدمتي خسرتها فسبتو هو
فرحة : صافي نساي اماما مايستاهلش نفكرو فيه نهااائيا وخلينا دابا فخويا هو اللي مهم
نجاة : يحيى كيتو بوحدها ابنتي حرت وماعرفت فين نصد ولا شكون نقصد باش يعاوني، راني نقلب ليه على محامي ومازال مالقيت والاغلبية ولاو يطلبو يتخلصو هو اللول عاد يشدو الملف
فرحة : غانلقا شي حل ا ماما، الله كبير وخويا مظلوم وغاينصفو
نجاة : ان شاء الله
جلسنا أنا وياها دايرين يدينا على حناكنا وكانفكرو وكل شوية نطلقو تنهيدة مخرجينها من الأعماق، حسيت بظهري غايتقسم عليا وترمتي طابت بالجلاس ونضت ..
فرحة : ماما غاندخل للبيت شويا وحتى سيري ترتاحي يحن الله
نجاة : ومنين تجيني الراحة، فرحة مامزيانش ليك ابنيتي تبقاي بالجوع، كولي ليك واخا غير شويا بززيه
فرحة : واخا اماما على خاطرك وصافي
نجاة : تسناي نسخنو ونجيبو ليك
فرحة : غير خليك غانمشي نصاوب راسي وناكل تما نيت
نجاة : واخا ابنتي، حلي الثلاجة وغاتلقاي السوبيرة الصفرا فيها والعصير دوزي بيه وشبكة الخبز راها فوق الفران
حيدت جلابتي ومشيت للكوزينة حفيانة حليت الثلاجة وجبدت السوبيرة والعصير، خويت الماكلة فطبسيل وسخنتو وحطيتو فصينية وكاس عمرتو بالعصير وربع ديال الخبز، حطيت الصينية فوق الطبلة وجريت الكرسي جلست وقسمت الندغة غمستها وحطيتها ففمي وفاش جيت نضغ ماقدرتش وتكهمت واخا مانزلت والو، وقفات ليا فالحلق وحلفات لانزلات، طاح عليا الضيم وتفكرت نهار كنت ناكل أنا ومراد وقلبناها بسالة 😢 شداتني البكيا وحسيت يلا مافشيتش قلبي غايطرطق ليا، هزيت داك كاس العصير شربتو دوزت بيه ديك الدغمة ودموعي هابطين، دازت وانفاجرت بالبكا ..
فرحة : علااااش اربي علااااش هئ هئ علاش هادشي وقع ليا، حتى قلت كلشي تقاد ودابا تكفس هئ توحشتو توحشتو بزاااف، كيفاش غانقدر نكمل بلا بيه كيفااااااش وأنا وليت نتنفس بيه ودابا حاسة بروحي غاتزهق وأنا بعيدة عليه هئ هئ علاااااااش هئ هئ اشنو درت فحياتي وفاش غلطت حتى نتعذب هاااكااا، من جهة راجلي ومن جهة خويااا هئ علاااش مامكتابش ليا نفرح هئ هئ
دخلت فهيستيريا ومابقيت نشوف والو قدامي، هزيت ديك الصينية فطختها مع الأرض وضربت بالكرسي وطحت للأرض كانتمرغ وننتف راسي اللهم الدق فيا ولا نريب ليهم دوك البلاكارات ديال الماعن، ماما سمعاتني وجات كاتجري عندي للكوزينة مخلوعة، شافتني طايحة فالأرض كانتحير وتحدرات عندي كاتحاول تشد ليا يديا وتحيد الشعر منهم ..
نجاة : بسم الله عليك ابنيتي 😢 بسم الله عليك، ششششششش ماديريش فراسك هاكا الله يرضي عليك غاتسكتي ليا القلب افرحة هاعار الله ابنيتي سكتي ورضاي ماديريش فراسك هاد الحالة خلعتيني عليك
شدات ليا يديا وبدات تقرا فالقرآن وأنا ماسكتش من البكا ..
فرحة : ااااااه هئ هئ ااااااه اماما قلبي كايضرني بزااااااف مابقيتش قادرااا هئ عيييت نكابر اماما ونقصح قلبي ولكن تهرس اماما تهراااااااس هئ هئ
نجاة : الصبر ابنتي الله يرضي عليك ششش واش بغيتي نعيط لراجلك يجي افرحة؟
فرحة : فييين غايجي اماما فييين هئ هئ صافي كلشي سااالاااا وأنا ماقادرااااش هئ حتى قلت غانفرحو اماما وربي سيفط لينا السبب ولكن كلشي ضااااع كلشي هئ هئ ضيعت راسي وضيعت حتى ولدي معاااايا اماما هئ هئ
نجاة : ولدك ابنتي ربي بغاااه ماعندك ماديري، سكتي وماتعضيش اللي خلقك ابنتي الله يستر علييك
فرحة : هئ ماشي ضيااااء ا ماما ماشي ضيااااء 😢
نجاة : وشنو؟
فرحة : أنا حاااملة اماما هئ هئ هئ
هزات ليا راسي عندها كاتشوف فعينيا المسدودين بالدموع ..
نجاة : حاملة! وراجلك عارف
حركت ليها راسي بالنفي وكملت على مندبتي ..
نجاة : اويلي ستغفرت الله العظيم، وعلاش بسلامة ماقلتي ليه والو؟
فرحة : هئ هئ عاونيني اماما نمشي للبيت عافاك رجليا ماهازينيش هئ هئ بغيت غير نعس ولا نموت كاااع أنا ونتهنى
نجاة : الله ينجيك ويحفظك ابنتي، لاتقوليش هاكا الله يهديك، نوضي نوضي سندي عليا حتى نوصلك، رتاحي ومن بعد لينا كلام
عاوناتني حتى وقفت بزز وشدات فيا جاراني ورجليا لاصقين فالارض، وصلاتني بمشقة النفس للبيت وهي عيانة كثر مني، دخلاتني وسط الفراش وطلبت منها تمشي وتسد الباب وداكشي اللي دارت، تقلبت على جنبي وغمضت عيني كانتنخصص حتى غفيت، مافقت غير على صوت الغوات برا، نضت كانحك عينيا وراسي كايحرقني، خرجت من البيت كانجر فرجليا وصوت ماما كايجهاد تخلعت ومشيت لفين كاين الباب لقيتها واقفة مع دنيا وآخر شخص فكرتو يجي عندنا بعد هاد المدة ديال الغياب، شفتو ورجع ليا تركيزي وتحلو ليا العينين والوذنين ..
فرحة : نتااا شنو جاااابك هناااا؟؟
هز راسو فيا كايطلعني ويهبطني ودار ابتسامة خبيثة بحال أفعالو وقرب جيهتي بعدما تخطى ماما اللي كانت مانعاه من الدخول ..