Marahil ay limot mo na
ang mga alaalang minsan
na natin magkasamang nalikha
sa imahinasyon, o kung hindi man doon
ay dito sa mundong ibaba
Marahil ay hindi mo na natatandaan
bawat titik ng awiting minsan nating inawit
saliw sa himig ng damdamin
na hindi na natin nagawang pigilan
Marahil ay hindi na maibabalik muli
kung akin mang subukang ipaalala sa iyo
ang bawat memoryang natatago, natitira
buhat ng ikaw sa akin ay nawala
Marahil ay hindi na rin matutupad
lahat ng noon ay aking hiniling
iyong habang ikaw ay nahihimbing,
iyong panahong ikaw ay sa akin
Kaya't ipauubaya ko na lamang
ang lahat ng pighati
dalhin na lamang sana ng hangin
sa kung saan, palayo sa akin
At siguro kung hindi man dito magtapos
o kung patuloy ka pa ring ibigin ng lubos
ay babalikan ko ang tulang ito
at ipapalala sa aking sarili
kung bakit ito minsang nasulat
Kaya't kung nasaan ka man ngayon
hinihiling ko na lamang
ang iyong kasiyahan, lahat ng katuparan
sa iyong mga pangarap
Dinggin din sana
ng langit ang iyong mga hiling
at pati na rin ang akin
na sa pagdating ng panahon,
mga sugat ay maghihilom,
at ako ay makakalaya na rin.
--------
Hindi ko nasisiguro kung natatandaan mo pa ako. Matagal na rin buhat nung huli akong nakapagsulat ng tula. Salamat at napabalik ako dito. Salamat at napadaan ulit ako sa mga tula mo.
