ثانوية المراهقين (جميع الأجزاء)

الجزء 08

عروة اتلفت بالصوت...ظهرت ابتسامة في وشو وهو بيقووول : اوووو فلة .
فلة : ازيييك
عروة : والله بخير الحمدلله...كيف انتي مع 3 ؟
فلة : والله الحمدلله .
جاهم صوت هزاع : يلا نمشي يا عروة.
فلة قبلت وراها...ظهرت الدهشة في وشو : همام ؟
عروة :بتعرفيهو ؟
فلة :كيف دا معاي في المدرسة.
عروة :دا واحد من التوينز القلت ليك ممتحنين الشهادة معاك.
فلة : سبحان الله صدفة عجيبة....لكن كدي دقيقة انت التوأم الشرير ولا الطيب؟
ورد : دا مستحيل يكون شرير .
فلة : اخوك حصل ليهو شنو ؟
عروة : قال ما حينزل المدرسة تاني .
فلة : لا لا اوعاك دا الهم عايزنو خليهو ينزل عادي...بعدين ياخ شكلو مؤدب ودي ما حركاتو بس هم حقدو عليهو عشان وقف ليهم في وشو وهم ماعايزين كدا .
هزاع وهو بيرفع يدو : انا بتاع هندسية الشرير .
فلة وهي بتضحك :همام ياخ بطل هظار 😂.
عروة :لا دا هزاع .
فلة وهي بتتلفت عليهو بسرعة :احم كذاب والله .
ورد : والله دا هزاع 😂.
فلة بي توتر : احم ط طيب ...انا ....انا اشوفكم قريب في المدرسة سلمو لي على همام.
هزاع : يوصل.
مشت بي سرعة .
عروة وهو بيضحك : البت دي ظريفة شديد ( انا برضو ظريفة بس انت اديني فرصة 😀)
عاين لي ورد : نطلع ؟
ورد : اي .
طلعو على جهة العربية وركبو .
سمسم :حمض الله على الصلامة ياخ.
ورد :الله يسلمك يا سمسم 😌.
همام :جريتي السيفون ؟
ورد : اقول بس اتلهي 😒.
همام : بس التقول فيها عرق رباطاب الرد في طرف خشمها دي شنو دي 😒( ومن على البعد تحية لصديقتي الرباطابية )
عروة :خلاص اهدو خلوني اسوق بي تركيز.
هزاع : لاقيت صحبتك فلة جوه وكالعادة قايلاني انت 😂.
همام : يا حليلها 😂
ورد : انتو بتعرفو اشكال زي دي من وين ؟؟؟ حلوة شديد ماشاء الله .
همام :يعني مظلومين من حيث حلاوة الاخوات نتظلم في الصحبات برضو ؟
عروة : كذااااااب والله احلق شنبي لو في بنت احلى من ورد حبييييببتي
ورد :🙈🙈🙈🙈
وصلو بيت خالتهم ونزلو ...طبعا بيشيلو هم السلام ....لانو خالاتهم الواحدة بتمسك الواحد فيهم من خدودو وبتبوسو وتجضمو وتحضنو 😂😂😂.
وهم بيكون رد فعلهم كدا 😳.
بعد العشاء والونسة الحلوة...عروة ركب مع امو واخوانو في عربيتو وسمسم ساق عربيتو واتحرك ( يا جماعة سمسم دا ممكن يضيع كان توصلوهو معاكم 😂...دا انا حاموت واعرف كيف سمسم دا ادوهو رخصة قيادة )
المهم وصلو هلكانين ومشو ينومو ....هزاع اتفق مع عروة انو بكره حيفتشو على انس ويورهوهو بي انهم عايزنو معاهم في المدرسة .
قمر قعدت في طرف سريرها وهي بتسرح في شعرها سرحت بعيد وهي بتتذكر في عبدالله زوجها.
طبعا كلكم عايزين تعرفو قمر حكايتها شنو مع عبدالله راجلها.
Flash_back
في تمنينات القرن المنصرم 🐸
ماما يسرية كانت قاعدة مع امنه جارتها وبيتونسو.
ماما يسرية : والله عبدالله ولدي دا قال عايز يسافر يقرا طيران في كندا.
امنه : بري ياختي ولدك صغير دايرة تفكيهو في البلد البعيدة ديك الله وروحو .
ماما يسرية :والله مصر شديد ماعارفة اعمل ليهو شنو
امنه :هو مش كان بيقرا اداب في الخرطوم مالو فجأة غير رايو
ماما يسرية :والله ماعارفة...فجأة جا ورانا بالقرار بتاعو دا...والمشكلة انو عنيد شديد لو اصر على حاجة لازم يسويها.
امنه وهي بترشف من قهوتها : خلاص وقت اصلو مصر كدا عرسو ليهو وخليهو يسافر عشان ما يقع في الحرام هناك ولا يجيك بي خواجية بنت كلب وتكوني فقدتي ولدك.
ماما يسرية :فكره والله لكن لو ما وافق ؟
امنه : قولي ليهو دا شرطي الوحيد عشان تسافر.
ماما يسرية : لكن هسه اجيب ليهو عروس من وين وهو زاتو عمرو 18 سنه بيقدر على العرس ؟
امنه : مالو ياختي 18 سنه ما صغير...اما بخصوص العرس لي تمشي بعيد عندي بنت اختي حلااااااتا يا يما السنة الجاية ممتحنه لي تامنه لكن بيني وبينك جني وجن قراسة البنات البنت اخير ليها تعرس وتشوف حياتها بلا قراية بلا كلام فارغ ( فكوني عليها 😠...طبعا انا كنت مع كلامها دا ايام امتحان الشهادة 😂)
يسرية : يعني عمرها 13 سنة ؟ صغيرة شديد ياخ
امنه : بري ياختي ما صغيرة ولا شي حلااااتا يايمة ...اللون دا زي لون الذهب ...وشعرتها دي بتقعد فيها....فيها عيون ماشاء الله بتحسي بيها بتاخد دقيقة كاملة عشان ترمش....وفيها جسم بسم الله ماشاء الله ولا عند البنات الكبار مقسمة ومفصلة ياختي اخير ليكم شيلوها اصلها اخر واحدة في بنات اختي كلهن عرسنا ليهن.
يسرية : خلاص نجي نشوفها.
امنه : اعقدو طوالي وسوقوها معاكم ماعايزين اي شي...يكفينا انكم ناس عز وشرف.
يسرية : الله ما ضراك ...بس اسمها منو ؟
امنه :اسم على مسمى اسمها قمر.
يسرية : خلاص بنجيكم يوم الاحد ان شاء الله .
امنه : طيب انا امشي بعد دا والله ما استغني .
يسرية :مع السلامه.
قمر كانت عمرها 13 سنه بس واهلها ما بيهتمو بي تعليم البنات بس همهم يعرسو ليهم وخلاص...لمن وروها رفضت بي شدة وهي بتقول : يا جماعة انا عايزة اكمل تعليمي .
[١٢:٢٣ ص ١٤‏/٤‏/٢٠١٧] لنوووش: يا بنت تعليم شنو اخير ليك عرسي العرس ستره وسمح ....هسه اخوانك كلهم عرسو اخير ليك .
قمر : يا امي عليك الله انا ماعايزة كدا .... لو كبرت بعدين وحصلت مشاكل واطلقت حيحصل لي شنو اجيكم راجعة بي اولادي واقعد في نصكم...بعدين انا لسا صغيرة بيجوني لمن اكبر.
امنه :يا بت هوي بطلي قلة ادب حتعرسي ورجلك فوق راسك انتي لاقياهم ديل ناس عززز والقروش دي عندهم كوم وردوم....ولدهم زاتز صغير عمرو 18 سنه وحلااااتو يا يما وكمان مسافر بلاد بره .
قمر : ماعايزة انا مالي ومالو سمح ولا ما سمح.
امنه قامت عليها وادتها كف بي قسوة : شفتي قلة ادبك دي اخير ليك تخليها...غصبا عن عينك حتعرسي ويوم الاحد جايين ناس عقد . طيري السوق اذتري ليك فستان ولا اي شي .
قمر وهي بتبكي :ابيت والله ما اشتري اي شي.
امها :والله يا بتي دايرين مصلحتك .
قمر وهي بتبكي : لو عايزين مصلحتي ما بتعرسو لي بالقوة.
في بيت يسرية :
كان قاعد شاب لابس جلابية بتبرز بنية قوية وطول فارع...ملامحو حادة ومقععععدة ...بتمسكو من راسو لي اخمص قدميه مافيه حاجة شينه...ملقبنو بي جنى الملايكة من شدة وسامتو.
يسرية : اها قلت شنو ؟؟؟ غايتو دا شرطي لو عايز تسافر.
عبدالله : جدا ماعندي اي مشكلة لكن البنت دي مش صغيرة شديد ؟
امنه : كدي نمشي وشوفها بنفسك.
عبدالله : ان شاء الله .
قام وطلع الشارع : لو كنتو قايلني حخلي السفر عشان العرس بتغشو على نفسكم 😏
المهم مرت الايام وجا يوم الاحد...قمر دي بكت بكا لمن عينها طلعت بس ولا في زول اشتغل بيها الشغلة.
غطت يدينها بي وشها لمن سمعت صوت النسوان بيزغردو بعد كلمة عقدو ( اعقدو لي عليهو انا ما مشكلة 😸)
طلعوها بي الفستان الكلوش ( فساتين زمان ديك ...والله كلوش دا معارفة معناه شنو 😂 بس بسمع الوالدة دايما بتقولو وهي موضة قديمة وكدا غايتو اسألو امهاتكم بيعرفو 😉)
صحي قممممر...وشها كان احمر من البكاء...عبدالله ركز فيها طويل بس بالرغم من كل العاملنو ليها عشان عمرها ما يظهر كان في براءة شديدة في وشها.
عبدالله ما اتكلم معاها...بعد تم العقد كم يوم كدا سوو ليهم العرس....عبدالله خلاها عند امها...خاف انو تخاف منو ولا حاجة...حكاية اسبوعين تاني سافر بيها على كندا.
اول ما الطيارة اقلعت بكت شديد كانت مرعوبة موت...صغيرة وبعيدة من اهلها ومعلقة في الجو....من يوم عقد عليها لحدي الليلة ماف يوم رفعت عينها عشان تشوف وشو حتى....وصلو كندا بعد ساعات طويلة...طبعا زمان كان عندنا خطوط جوية قوية بتسافر اي مكان.
نزلو في شقة في تورنتو.
عبدالله قعد جمبها في الكنبه الهي قاعدة فيها من اول نا وصلو هدومها ماعايزة تقوم تغيرها...
عبدالله بي ابتسامة : ما تخافي انا ما بعضي...بس كنت عايز اقول ليك حشوف ليك مدرسة قريب تنزلي فيها
رفعت راسها ودي كانت اول مره تعاين ليهو .
عبدالله : ماشاء الله انتي جميلة شديد.
اكتفت بالسكات....عبدالله دي حتكون اوضتك...ما تخافي مني ما حاعمل ليك شي طيب ؟
هزت راسها.
مرت الايام يوم ورا التاني...عبدالله نزل الكلية...طبعا دراسة الطيران ما بتاخد وقت طويل شديد....المهم نزلها مدرسة في البداية كان صعب تتاقلم على اللغة وعلى الناس والمجتمع ...مره كانو طالعين لبست ليها توب.
عبدالله : لا لا انتي صغيرة شديد على التوب البسي حاجة تانية .
شوية شوية عقدتها ناحيتو اتفكت بقت بتحبو شدييييد...كان ليها اي شي ....ابوها واخوها وحبيبها وصديقها وزوجها....كانت متميزة في المدرسة واتعلمت الانجليزي كويس وبقت متقناهو...شوية شوية لحدي ما دخلت الثانوية....خلاها لحدي ما كبرت اكثر وعقلت ووعت بي اي شي...في عمر ال17 حملت بي عروة...وولدتو بعد ساعات صعبة شديد وهو وقتها كان عمرو 22 سنه...عاشو هناك فتره طويلة وهي دخلت كلية ادارة الاعمال...واخدت منحة دراسية لي مدة سنة في جامعة لندن وسافرت كملت دراستها ورجعت ليهم في كندا...بعدها ولدت التوأم....كان شغال كابتن في الخطوط الكندية....بعد سنين سافروا قطر....كانت ورد عمرها 4 سنوات تقريبا...
كانت امورهم ماشا كويييييس...بس دايما اي اتنين متزوجين لازم تجي بنت لذينا تدخل بينهم .
حست بي انو في واحدة تانية داخلة فيهم...لمن واجهتو نكر وحلف ليها انو ما عندو غيرها هي....بس الغيره عمتها شديييييد....وفي يوم اثناء ماهم بيتشاكلو في الموضوع دا ... اتغاظ منها وقال ليها : يا اي بعرف واحدة وحعرسها تاني في شي.
وفي الحقيقة دا كان كلام لحظة غضب بس بس هو ما عندو غيرها.
قمر بي عصبية :انت بس لو راجل صحي عرسها 😠
عبدالله : لو راجل ؟
قمر :اي
عبدالله : طيب تمام.
كلمتها دي استفزتو لي درجة قف تأمل وزعل منها شديد.
وللاسف الاسيف فعلا عرس واحدة من زميلاتو..قمر اتصدمت وحلفت ستين يمين ما حتقعد معاهو وطلبت الطلاق...وهو حلف برضو انو ما حيطلقها لو عملت السبعة وذمتها.
الكلام دا قبل ست سنوات بس كانو حصل الليلة...لمن لقتو ما حيطلقها فصلت حياتها منو زي ما شايفين..كانو مامعرسها....اولادها علاقتهم بي ابوهم ما تأثرت كويسة جدا
[١٢:٢٣ ص ١٤‏/٤‏/٢٠١٧] لنوووش: الا هزاع انكسر شديد من الحاجة الحاصلة....وبقا ما بيحب ابوهو لانو عرس...عشان هو كان بيعشق ابوهو عشق ما طبيعي بالنسبة ليهو بطل خارق ومثل اعلى...بس اتغير كل دا.
رجعت للواقع بي صوت عروة : امي سرحانه وين انا واقف هنا من قبيل .
قمر رجعت تسرح في شعرها : اي اي مالك ؟
عروة : بكره حتجي معانا المدرسة ؟
قمر : طبعا لازم اجي.
عروة : طيب تصبحي على خير
قمر : وانت من اهلو حبيبي .
كدي هسه بغض النظر القصة الفوق دي عرفتو لي الاسرة دي جميلة من كبيرها لي صغيرها...يعني الابو قشطة والام عسل عايزنهم يجيبو شنو 😂😂😂...طعمية ؟
__________________________________
صباح اليوم التالي...بعد صلاة الصبح عروة وهزاع لاقو انس وعرضو عليه حلهم لي مشكلته.
انس : مدرسة المستقبل ؟؟؟ دي مدرسة ناس كبار احنا ناس على قدر حالنا .
هزاع : احنا على فكره بنقرا مجاني ....وانت برضو حتقرا مجاني.
انس : طيب المقابل اني اعمل شنو ؟
عروة : انك تتفوق وتدخل الجامعة.
انس سكت مسافة وبعدها قال ليهم : انا ماعارف اشكركم كيف والله .
هزاع بي فرح : يعني موافق ؟
انس : في زول بيقول للنعمة لا ؟
هزاع :طيب حتمشي معانا عشان الزي والكتب.
انس : سمح بس اغير هدومي واجيكم.
رجع بيتو بي سعادة وزف الخبر بي فرحة لي امو الحمدت الله كثير.
بعدها مشا معاهم المدرسة كان مندهش من المبنى سالهم بي استغراب :دي شركة ؟
هزاع : لا دي المدرسة 😂.
سجلو ليه وصرفو ليه كتبو وحاجاتو ... واتناقشو في موضوع هزاع .
ماما سامية :لو الولد دا ما بطل قلة الادب دي انا حخلي الادارة .
قمر :لو سمحححتي ولدي ربيتو احسن تربية وما بسمح ليك تقولي عليه قليل ادب....قلة الادب في انو اولاد يختو ليه بلاوي في شنطتو وما تعاقبيهم ولا حتى تعرفي هم منو...ولا عايزاهو يكون امعة ليك وليهم ؟
عمو جلال :كلامها صح .
ماما سامية : اذن انا قدامكم بثدم استقالتي.
عمو جلال : جدا ما عندك اي مشكلة وتم قبول استقالتك.
طلعو كلهم بي سكات .
قمر :انا اسفة يا عم جلال لو سببت ليك مشكلة
عمو جلال : لا ما تعتذري ولا شي ... انتي كلامك صح...وهي لو ماكانت استقالت انا كنت حرفدها...بكره بجيب الاحسن منها.
رجعو بيتهم...انس وهو طالع هزاع نده عليهو ...وقف وعاين ليه...هزاع جا شايل ليهو صندوق متوسط الحجم : دي حاجة بسيطة بي مناسبة انضمامك لي مدرستنا.
انس : شكرا جزيلا ليك
هزاع : العفو.
المهم انس رجع بيتو وفتح الصندوق لقاها ...جزمة رياضية من وشنطة من نايك...وهو حياتو كلها مالبس شي زي دا .
ابتسم وهمس بي صوت سعيد : الله يسعدك زي ما اسعدتني

يتبع.....