اولادها كلهم نامو فضلت هي مصنقرة في نص السرير منتظراهو، و خلاص العبرة خانقاها عايزة تبكي من الخوف و القلق .......كل مرة تمشي تعاين للشارع بي قد الباب و ترجع .......في الاخر الباب دق ........عواطف قلبها طار جرت قالت منو الفي الباب ........جاها صوت فضل .......افتحي دا انا .......فتحت سريع سريع .........حمدلله على السلامة مالك اتاخرت كدا ........خلاص ياخ هدا جيت ما تكتري الاسئلة......عواطف اتصدمت من ردت فعلو .......انت عارف انا من متين منتظراك و كنت عايزة اموت من الخوف تقول لي هدا جيت ........ما تكتري كلامك انا مصدع عايز انوم .......دخل فضل نام و عواطف النوم طار من عينها و بقت الليل كلو تبكي ........مالو ياربي حاصل عليهو شنو متغير كدا ......معقول يكون عرس و انا ما جايبة خبر ......
.الصباح بدري عواطف صحت فضل عشان يقوم للشغل كالعادة .......قدر ما صحتو أبي يصحا ......يا راجل مالك الليلة .......عشان تاني تساهر لي وش الصبح .......فضل صحى من النوم وشو ورمان .......عدو كم يوم تاني بقى يساهر طوالي برة و عواطف اتعودت بقت تنوم بدري لما يدق الباب بتصحي تفتح ليهو و تنوم راجعة .......و في يوم كان فضل قاعد في بيتو في امان الله .......جاتو عواطف قالت ليهو ارح جيب المصاريف عشان نجيب الخدار و الحاجات ........ما عندي قروش ........عواطف اتخلعت.....ّكيف ما عندك يا راجل ناكل شنو اولادك ياكلو شنو .......ما بعرف اتصرفي. .......اتصرف كيف يعني بعدين انت كان عرست ما عندي معاك شغلة لكن كمان تظلمنا انا واولادك ؟ كل القروش كملتها ......يا ولية قلت ليك ما عرست شنو شابكاني عرست عرست .......يعرس ركبيك ديل قال عرست قال انا هو قادر عليك عشان اجيب واحدة تانية ........خلينا من الكلام دا اسي انت يعني ما عايز تديني مصاريف. ......قلت ليك ما عندي مااااا عندييييي اتصرفي ......
عواطف مشت كلمت اخوها (عثمان) بالحاصل كلو و استلفت منو مبلغ كويس ...... و بقت تتصرف بيهو و كل مرة تسأل فضل يقول ما عندو ولا قرش ........مشت تاني لي اخوها .......انتي راجلك دا لو ما قادر على مسؤلية بيتو ما تقعدي معاهو ........اها اقعد وين بي اولادي مرتك بتقبل نقعد معاكم .......لالا قصدي ليك يعني لو عايزة تتطلقي اتطلقي و امشي لي اخوك عز الدين .......و اخوي عز الدين يعني حيخليني اقعد بي اولادي و يصرف علينا ........انا بتكلم معاهو كلها ثلاثة شهور العدة و نعقد ليك على سمير ولد حاج موسى ........عواطف بقت واقفة مبحلقة فيهو من الخلعة ........يا عثمان كان ما عندك لي قروش قول ما عندك ماف داعي لي كلامك دا .......مالو سمير ما عاجبك في شنو ؟ ........عن اذنك يا عثمان شكرا ليك يا اخوي انا راجلي ما بطلقو و اشتت اولادي ، خليك مع مرتك واولادك و اسفين إذا تقلنا عليك ........عواطف مشت الدمعة في عيونها .......قالت ما عندي حل غير عز الدين مشت ليهو في الحلة التانية .......سلمت علي امها و حكت ليها ظروفها ........كان تمشي عثمان ماشاء الله عندو القروش ما ببخل عليك ........بخل يا امي بخل علي و قعد يقول لي اتطلقي و شنو .......سجمو قبلو وحححدو كيف يعني تتطلقي ........ياامي صراحة تقلنا عليهو شديد كل مرة نشحدو ........عز الدين مما جاء امو حكت ليهو الحاصل ........كيف يعني بقى ما بصرف بودي قروشو وين خلاص مادام كدا كلام عثمان صاح تتطلقي بس دا حلك ........يا عز الدين انا يعني لو راجلي حصلت ليهو ظروف و اتعكست عليهو شوية اتطلق ؟ .........يا ولدي انتو فيها شنو لو ساعدتو اخدتكم الوحيدة و انتو ماشاء الله تجار و عندكم القرش ........يا حاجة انا صراحة ياداب ملاحق على بيتي و بعدين انتي عارفة الظروف الزمن بقى صعب يا امي .........عواطف العبرة حنقتها و قالت ليهو .......شكرا ليك ما قصرت عارفاك يا اخوي كان عندك ما بتتاخر و انا طلاق ما بطلق لكن ربنا كريم و ظروفنا بكرة بتتصلح.......دقيقة يا عواطف هاك .......مد ليها عشرة جنيه ......في الاول اترددت بس تاني قالت بتنفع شالتها و قالت لي اخوها ......تسلم ما بتقصر .........و مشت عواطف و العبرة خانقاها ........حتجيب من وين مصاريف لي مدرسة اميرة و اكل و شراب لي اولادها .....
يتبع....
