اي في زول ، انا يا فيحاء انا بكرهو و بتمني يموت والله العظيم .......فيحاء بقت مقهية فيها و بتتخيل ابوها الحنون و الطيب و البحبهم و بدلعهم و كمان ما بتخيلو الحياة من غيرو رغم انو ممكن يشاكلهم لو غلطو و يعاقبهم و اي شي بس ما بتصل يكرهو.......يا اميرة حتى لو بابا ضربك مافيها حاجة هم عايزين مصلحتنا في الاخر .......وسط دموعها اميرة قالت ليها ياااااريييييت ياااريت لو بقت على الضرب يا فيحاء .......انا ابوي ما حصل مد يدو علي تخيلي بس انا بكرهو لي اسباب كتيرة .......اولها بضرب امي و كل ما يجي من برة بالحزام ، و امي مسكينة بتقول لينا ما تجو و بتتحمل و تسكت عشان نحن نفسياتنا ما تتاثر و دا غير انو قليل ادب شديد .......فيحاء بقت فاتحة خشمها .......كيف يعني قليل ادب في زول بقول عن ابوهو كدا .......انا بقول و اكتر من كدا .......انتى عارفة انا من كنت صغيرة بقول لي كلام قلة ادب اكبر مني و من عمري كنت في أولى ولا تانية .........بقول ليك شنو يا اميرة مثلا ........بقولو في شكل تحذير عشان ماف زول يفهمو ، بس انا حاسة كلامو ما طبيعي بلمح لي حاجة ........كلنا اهلنا كانو بحذرونا ........لالا ياخ بقول لي عديل كدا .........يا اميرة انا برضو ماما و بابا كانو بقولو لينا لو زول لمسكم في عورتكم حرام و ما صاح و كان مراة او راجل لو قال ليكم تعالو و لا عمل لينا كدا ولا كدا غلط و حرام عادي حتي اقول ليك ........عموري اخوي الكبير كان مرة جا حكى لي ماما و بابا انو ولد جيرانا كان كبير في الثانوي اسمو ابوعبيدة .......يلا الولد دا قليل ادب و اتعرض لي اخوي ، بس اخوي لما كلم ماما و بابا حسموهو تفتكري لو عموري ما عارف ابو عبيدة بتكلم عن شنو كان مشى لعب معاهو اللعبة القالها ليهو دي عادي بدون ما يفهم ........أميرة سكتت شوية .......و غير كدا يا فيحاء حتى بعد كبرت ......بقى ما طبيعي بطلع لينا زي ما الله خلقو و بقول لي تعالي و مرات بحس بيهو نظراتو ما طبيعية انا عايشة في جحيم ........معقول يا اميرة ما قادرة اصدق .......والله جد يا فيحاء شفتي انا في ازمة .......يمكن تكوني فاهمة غلط .......معقول الفلتو ليك دا كلو فاهمة غلط انتي لو ابوك طلع ليكم عريان كدا ما بتتخلعي ؟ ......والله مشكلتك كبيرة يا اميرة لكن انا حاشاور ماما عشان تشوف ليك حل ........اميرة اتخلعت .......لالا يا فيحاء ما تكلمي زول عليك الله ........ما تخافي امي بتحفظ الأسرار ما تحكي لي زول .......
اميرة رجعت اليوم داك البيت و عيونها مورمات من البكاء.........امها حست بي تغيرها بس ما سالتها ........طلعت شالت حاجات توديهم الدكان .......بعد امها طلعت اميرة قعدت في الحوش منتظرة امها .......فضل جا طالع برضو زي ما الله خلقو كالعادة .......اميرة قربت تقع من طولها و خافت لمن بقت ترجف .......جا عليها قال ليها .......أميرة امك وين مشت .......اميرة بي رجفة ......الدكان الدكان .......خلاص امشي وقولي ليها بابا قال ليك تعالي فورا .........اميرة جرت لبست التوب و هي خايفة ........لبست الباقي في الشارع ........و بقت تبكي و صلت الدكان امها كانت بتراجع في حساباتها مع بتاع الدكان .........امي امي .......مالك يا اميرة ......اجري ابوي يا امي قال ليك تعالى اسي ........خلاص خلاص جاية .........و مالك انتي اسي بتبكي كدا ......امي والله صراحة انا تعبت نفسيا من البيت دا حاسة اني ما قادرة اقعد فيهو معاكم .......يا بت بسم الله مالك ابوك ضربك ؟ ولا مالك .......بس انتي تعالي شوفي بي عينك .......عواطف رجعت مع بتها البيت ........وصلو البيت لقو فضل واقع في الارض بتشنج و مصروع ........عواطف اتخلعت جاتو جارية رفعتو و لفلفتو بالملايات .........اميرة بي قلبها تتمني يكون دا مرض الموت عشان تخلص ........اجري يا اميرة اجري قولي لي عم محمود دايرين العربية نودي بيها ابوك المستشفي اجري .......اميرة مشت بي برود كلمت جارهم عندو بوكسي جا رفع معاها فضل بعد لبستو عواطف و رفعوهو و جرو بيهو المستشفى ........اميرة قعدت مع اخوانها في البيت و امهم مشت مع راجلها المستشفى .......هناك بعد الفحوصات الوقت اتاخر عليهم و فضل فاق ّ.......الدكتور جا اتكلم مع عواطف .........الدكتور جا لي عواطف قال ليها زوجك دا بتجيهو الحالة دي من متين .......ولا مرة اول مرة والله ........لالا بس زوجك مريض ليهو فترة ........بري والله يا دكتور اول مرة .......طيب بتعامل معاكم في البيت كيف عادي ؟ على طبيعتو .......عواطف اترددت شوية .........اي على طبيعتو يا دكتور بس عندو بعض الحركات البسيطة جديدة ........يا استاذة راجلك بتكلم برة راسو تقولي لي بسيطة شكلو مريض من بدري و اهملتو في علاجو ........عواطف ارتبكت شوية و خجلت ........عندو شنو يا دكتور بالضبط ........بنعرف اصبري خلي الفحوصات تطلع .........بعد ساعتين من الانتظار جاها الدكتور راجع .........انتي زوجك دا بتعاطي مخدرات صاح ؟. .......عواطف اتخلعت يتعاطى شنو بري طول عمرو خمرة ما ضاقها ....ّّّلالا والله في كمية من المخدر في دمو شكلو مدمن ........عواطف ياداب فسرت عدم شغلو و تصرفاتو الغريبة البقي يتصرفها في الفترة الفاتت ........الدكتور نصحها يحولوهو لي مصح عشان يراعوهو و يتابعوهو احسن من هنا .......يا دكتور يعني زوجي دا عشان المخدرات التصرفات دي ........لالا على المرض العلي يتعاطى اكيد بي سبب مرضو بتعاطي ......الدكتور وصف ليهم مصح ممتاز في الموضوع و عواطف كانت اشايلة هم التكاليف .......
#البسالو إذا القصة حقيقية ما عايزة اصدمكم بس في الحقيقة شخصية فضل اتوفت و الاهل للاسف سكتو و قالو الاتنين اولادنا و دفنوهو و كتمو الموضوع .....بس غيرت الأحداث للعظة .
يتبع.....
