..يا ولدي عليك الله وصلني ليهو دايرة اشوفو ........لا حول ولا قوة إلا بالله العلي العظيم ......كويس يا امي اصبري خلي نرفع الفراش بعدين بوديك محل عايزة ........
اميرة رجعت من المدرسة مرهقة جدا و كانت الوقت داك ممتحنة تامنة و مضغوطة مع الدراسة ........سلمت على امها و بدات تعبي معاها الداردمة و تجهز معاها الفطائر و الحاجات البتبيعها .........فجأة الباب دق .......جرى محمد اخوها الاصغر منها مباشرة 12سنة فتح الباب ........جو ناس كتار سلمو جلاليب بيضا ........اميرة اجري البسي ليك توب و جيبي لي توبي النشوف الحاصل شنو .......جرت اميرة جابت لي امها توب وهي زاتها لبست ليها توب ........مرقت عواطف سلمت عرفتهم ديل جيرانهم بالشارع التاني .......و الموقف كان مهيب لانو عواطف براها بس ياهو اولادها لولو 10 سنوات و محمد 12 سنة و اميرة 15 سنة .......قالو ليها وين ابوكم عندنا معاهو كلام ........عواطف خجلت و بقت تتراجف .......والله فضل دا بجي المساء ........ايوااا نحن زاتو كان ننتظر لي بكرة حتى نجي لانو بكرة الجمعة ما فات شئ خلاص بكرة المساء بنجي .......عواطف نقشت الحنك .......ياها اميرة جاين يخطبوها لانو عندها كم جارة لمحت ليها انو عايزة بنتها لي ولدها .......اميرة ماشاء الله طلعت جميلة و فارعة و طويلة زي اهل ابوها ........بعد طلعو عواطف بدأت تفكر في الموضوع جادة .......على الأقل ناس هشام ناس كويسين و سمعتهم كويسة و يخففو عنها الحمل بتاع دارسة اميرة و تبقى علي محمد و وائل.......
المساء فضل جا بي هيئة كل يوم و عواطف جرت هي الفتحت ليهو الباب عشان بتخاف اولادها يشوفو ابوهم بالمنظر دا خاصة انو عندها اولاد شباب قايمين .........تتلقاهو سريع في الباب تدخلو غرفتو ........عواطف ما جابت سيرة لي فضل باي شئ عشان خايفة من ردة فعلو و خايفاهو يتجنن على الضيوف .......خلت الموضوع يمشي عادي لحدي ما الضيوف جو كانت مجهزة عصيرها و فواكه و حاجات خفيفة .......فعلا جو اتكلمو مع فضل عايزين يخطبو اميرة لي ولدهم أحمد الصغير ........فضل قال كدا اتنفض فيهم .ّّّ.ّّ......دايرين تخطبو بنتي انا ؟ انتو مجانين ولا شنو ........بتي هي قدر شنو عشان تعرسوها لي ولدكم ........يا فضل استهدي بالله و البت ما صغيرة على العرس .......لالا دا كلام فارغ ما بنفع معاي ........الناس اتحرجو جدا و قامو طلعو بدون تردد .......عواطف قالت ليهو فيها شنو يعني يا فضل .......انتي كمان دايرة تتخلصي منها موش........في زول بتخلص من بتو بالزواج ؟ الناس ديل كويسين و أحمد ولدهم زول كويس ما بتفوت و بنتك بكرة كان عرسوها تلد ........يا مراة انتي مغفلة ؟ مجنونة في راسك دا ........عواطف سكتت خلتو ........اميرة دي لسة قاصر اصلو مستحيل الا انا اموت .....اميرة كانت مصدومة كانت حاسة ابوها مستحيل يخليها تتزوج عشان يعمل فيها مصيبة ........وهي حاسة الزواج ممكن يخلصها من ابوها للابد ........
اميرة بقت بعدها مكتأبة جدا .......عندها صاحبتها في المدرسة بقت تزرزر فيها من شنو هي متغيرة و النهار كلو متوترة و ما مركزة و حتى الونسة بقت ما بتتونس معاهم .......صحبتها اسمها فيحاء ........اميرة بترتاح ليها بس ما عارفة تحكي ليها كيف الحاصل معاها و هل ممكن تصدقها ولا لا ........قالت ليها انا لو قلت ليك ما حتصدقيني .......انتي احكي و انا اوعدك لو ما حليت ليك مشكلتك اساعدك و حتى لو ما ساعدتك حترتاحي نفسيا انك فضفضتي معاي ........اميرة بدات تبكي و تقش في دموعها .........انتي عارفة يا فيحاء انا اكتر زول بكرهو في الدنيا دي ابوي ؟ .......بكرهو اشوف العمى ولا اشوفو .......يوم يكون مافيش في البيت بكون مبسوطة شديد بس لو هو موجود ما بقدر حتى اتعامل بي راحتي .......ليه دا كلو حرام عليك يا اميرة في زول بكره ابوهو ...
يتبع.....
