..فعلا مشى فضل مع رامي فتحو بلاغ بي فقدان متوكل و حكو ليهم الحصل كلو و انو زول في كامل قواه العقلية ، و اول مرة يعمل كدا و يختفي و ما يظهر ولا يتصل و حتى تلفونو مقفول ........دونو البلاغ و مشو ......رامي قال لي فضل والله انا مخلي امي وابوي براهم و هم ناس كبار انت عارفهم ما حاقدر اتابع معاك الا انت تتابع بي جاي و انا بتصل بيك بالتلفون عشان نفهم الحاصل .......فضل قال ليهو جدا والله انا بتابع ........بعد رامي رقد في السرير قبل على فضل قال ليهو .......انت يا فضل خليت البيت لي شنو زمان و انقطعت كدا بقيت ما بتسأل مننا ........فضل اتوتر شوية و اتنحنح ........ساي بس زهجت من البيت قلت اجي الخرطوم دي الرزق فيها كتير و زي ما شايف الخير الحمد لله ، عملت بيت و اسرة و شغلي ماشى تمام ........لكن يا فضل حتى بعد عملت بيتك و اسرتك ليه ما جبتهم لي امك و ابوك عشان يشوفوهم و يسلمو عليهم .........فضل دنقر و اتضايق من اسئلة اخوهو ........ياخ الشفع صغار و ما بتحملو السفر و التلتلة .......رامي ما اقتنع ......على فكرة يا فضل انا عارف اي شئ عشان ما تقعد تتزاوغ في الكلام ساي .......فضل اتخلع ......ع عا عارف اي شي كيف ......عارف انك متشاكل مع امي و ابوي و هم زعلوك و انت طلعت من البيت ......حاكون..زعلان منهم في شنو مثلا؟ ........ما عارف والله لكن شكلها مشكلة لما انا كنت صغير و ما حضرتها .......انا وقت مرقت من البيت كان عمرك تلاتة سنة تقول ولا كم .......يعني معقول يا فضل ديل مهما كانو امك و ابوك مهمااا عملو مهما عملو انت ما ممكن تبقى ليهم عاق كدا الله زاتو ما بوفقك ........فضل وقف على حيلو و قال ليهو .......رامي لو سمحت خليني في حالي و انا ربنا موفقني و هم رضاهم و سخطهم ما فارق معاي كتير و ربنا رازقني ، كان سخطهم بعمل شئ ما كان اسي انا في المستوى الانت شايفو دا ........لالا يا فضل انا قصدي انصحك يعني انت اخوي الكبير و ما ممكن تكون بعيد عننا كدا انا لو ما عايزك ما بقول ليك الكلام دا ........انت على عيني و راسي لكن رجوع للبلد ما برجع لو انطبقت السماء على الارض و امك و ابوك انفعوهم انتو انا ما بنفعهم ........رامي سكت خلى فضل في حالو .......
من الصباح رامي ودعهم و سافر البلد ........مجرد ما وصل امو جاتو و دموعها في عيونها ........اها يا رامى لقيت اخوك .......لا لا والله يا امي مافي ليهو اي اثر ربنا يجيب العواقب سليمة ........قصدي ليك فضل لقيتو .......كيف ما لقيتو ؟ لقيتو و قعدت معاهو طول ما انا هناك ......اها اولادو كيف كويسين ......كويسين ماشاء الله عندو ولدين و بنت .......اي عارفة الله يحفظهم و يحفظ اولادو ........امي انتي اسي بتبكي ليه ولدك دا ولا يستاهل دمعة من عيونك ولد عاق ما عارفو طالع لي منو....... لالا يا رامي ما تقول كدا الله يوفقو وين ما يقبل ........رامي حن على امو قال ليها قلبك ابيض يا امي لكن بشوفو في اولادو عقوقو دا .... .....قلب الام يا ولدي .......بعدها جا ابوهم قال ليهو رامي انت جيت اها وينو متوكل اخوك .......والله يا ابوي ما لقيناهو انا وفضل فتشنا عليهو في كل مكان و ما عرفنا عنو اي شئ في الاخر بلغنا الشرطة .......ابوهو قال ليهو تمام أن شاء الله يتلقي ياخ اسي الشغل كلو واقف عشان هو مافي .......الله كريم يا ابوي أن شاء الله يرجع و يحصل كل خير ......
اليوم داك فضل مشى لي واحد صاحبو في السوق مكنيكي ........قعد إتونس معاهو و شرب الشاي .......قال ليهو يا اسحاق انا زهجان و قرفان والله الايام دي حاسي نفسي ما طبيعي .......كيف يعني مالك .......والله ما عارف بس حاسي اني كاره الدنيا دي و كاره ناسها .......يا زول خلاص الليلة ساهر معانا والله تنسى الدنيا و الهموم و تحبها من اول و جديد .........لالا ياخ سهراتكم دي ما بتعجبني .......يا زول نحن كلنا لو ما وصلنا لي حالتك دي ما كان مشينا الاماكن دي بس تقول شنو الزول عايز يتنفس شوية و ينسى همومو .......بعد نقة كتيرة .......يا زول انت جرب خسران شنو لو ما نفعت معاك السهرة تاني ما تجي .......فضل وافق على مضض و قال ليهو نشوف .......
عواطف بقت تتصل بي فضل كتير من غير ما تلاقي اي رد ........خافت شديد على زوجها اول مرة يتأخر كدا و كمان ما يرد .....
يتبع....
