الساعة كانت تلاتة العصر ، سمعت صوت خبط خفيف علي الباب ، فتحت لقيت راجل طويل و عريض و شعره طويل ، بيفكرني بهالك ، سألته عاوز مني إيه ، مد إيده في جيب الجاكيت بتاعه طلع ظرف و إداهوني ، الغريب كان إزاي حد يلبس جاكت صوف في شهر أغسطس ، غريبة شوية دي ... صح ؟
خدت الظرف منه و بصيت عليه ، دا مبعوت من سجن سانت لويس ، أنا معرفش حد في السجن أصلًا ، بقلب الظرف لقيت ملحوظة مهمة علي ضهره ، مكتوب بخط واضح إن لازم الظرف يتفتح و يتقرأ أدام البوسطجي ، بصيت للراجل و برغم حجمه الضخم كان شكله طيب ، شاورتله يدخل ، إبتسامته بتقول إن حد كويس ، سألته عن أي معلومات عن الجواب رفع كتفه دليل علي إنه ميعرفش حاجة ، دخل البيت و شاورتله علي مكان المطبخ ، قعدنا قصاد بعض علي ترابيزة المطبخ ، سألته إذا كان عاوز قهوة شاورلي براسه إن لا ، فتحت الجواب و لقيت جوا خطاب من عشر ورقات مكتوبين بخط مرعوش و إستعجال علي ورق أصفر قديم ، اللي باعت الجواب بإختصار كان بيقول إنه ميعرفنيش و لا عمره سمع عني قبل كده ، قالي إن محكوم عليه بالإعدام في سجن سانت لويس ، مسجون بتهمة قتل زوجته و ولاده الإتنين ، ليونيل كان عنده 3 سنين لكن ميكي كان 6 شهور بس ، قالي إنه برغم إنه حبهم جدًا لكن هو فعلًا قتلهم ، قال كمان إنه بيكره نفسه و إنه بيتمني يموت و يتعفن جوا زنزانته ، قالي إنه هيبدأ يحكي قصته ، دا كان ملخص الورقة الأولي ، بصيت للبوسطجي بحيرة ، إبتسامته ثابتة مبتتهزش ، كملت قراية ، اللي كاتب الجواب قالي إن إسمه فيتز ، مسجون من إسبوعين ، مقالش أي تفاصيل عن إزاي جاب عنواني أو إسمي لكن بدأ يحكي القصة بتاعته علي طول ، و صدقوني كانت قصة وحشية !!
فيتز قال إنه كان ملعون ، راكبه شيطان ، في البداية فكرته إنفصام أو هلاوس لكن الموضوع أكبر من كده ، قال إن الشيطان اللي معاه شيطان شرير ، عنيف و علي طول بيعذبه ، بيظهره في المراية و بيهمسله في ودنه بأفكار شريرة ، دايمًا بيبث له الوحشية و الدمار و القتل و الدم ، أفكار عن ضعف البشر ، هشاشة أجسامهم ، مدي متعة إسالة دمهم ، حياة فيتز إتدمرت تمامًا !
بدأ الشيطان يلعب في دماغه ، قاله إن مراته عاهرة و بتخونه، قاله إن الأولاد مش أولاده ، إنهم مش بيحبوه ، قاله إن بيتهم عبارة عن مقلب زبالة و إن هدومهم خرق مقطعة ، بإختصار خلي كل حاجة في حياته عبارة عن أضحوكة كبيرة و ذله بيها ، لما فيتز تجاهله بدأ يجيله في كوابيسه ، وراه أشنع كوابيس ممكن يتخيلها ، خلاله كل المية دم سواء بيستحمي بيها أو بيشربها ، الدبان بيتلم عليه طول الوقت و بكميات كبيرة ، كل اللمبات اللي فيتز بيقرب منها بتفرقع ، كل ده مع الزن و الهمس و التهديد لحد ما في يوم فيتز إنهار تمامًا !
خنق أولاده وضرب مراته بالسكينة لحد ما ماتت ، كسر جماجمهم بالشاكوش عشان يتأكد إنهم ماتوا و يتخلص من الشيطان ، الجواب خلص لحد كده !
حاجة غريبة ، ليه واحد مسجون عليه بالإعدام يختار واحد بشكل عشوائي عشان يحكيله حكايته ، البوسطجي قام بدون كلام حياتي و مشي !
***
تاني يوم و في نفس الميعاد الباب خبط ، البوسطجي جايب جواب جديد من نفس الشخص ، شاورتله يدخل لأن بصراحة كنت عاوز أعرف أكتر ، الجواب المرة دي حكالي فيه عن إزاي كلم 911 و حكالهم كل حاجة ، إزاي قعد جنب جثث مراته و أولاده يستني الشرطة ، إزاي في المحكمة كان مستسلم و معترف ، لحد ما الشيطان ظهرله ، قاله إنه لازم يخطف بندقية من واحد من الحراس ، لازم يشتم القاضي و المحاميين ، لازم يتبول علي الحضور من جوا القفص ، و قالي إنه عمل كل ده إلا موضوع خطف البندقية لأنه مقدرش ، مع الجواب كان فيه رسمتين ، واحدة لمراته و هي ميتة و شعرها منكوش و شكلها بشع زي ما تكون مشوهة ، و واحدة لأوضة محكمة كل اللي فيها ميتين ، القاضي و الحضور و المحلفين و المحاميين ، كلهم ميتين و قالي إن ده اللي الشيطان كان عاوه يعمله ، لحد هنا خلص الجواب التاني ، بهدوء قام البوسطجي و برضه بدون و لا كلمة خرج من البيت
***
اليوم التالت كنت مستنيه ، كنت عارف إن للحكاية باقي ، قبل ما يخبط كنت فتحت الباب و دخلته و خدت منه الجواب ، قعدنا نفس القعدة بتاعة اليومين اللي فاتوا في المطبخ ، فيتز قالي في أول الجواب إن ده الجواب الأخير ، حكالي فيه عن أيامه في السجن ، عذابه و آلامه و ندمه علي شريكة عمره ، قالي |إن الشيطان بيعذبه ، بيخليه يعور إيديه و يكتب الدم حاجات غريبة علي الحيطان ، بيحاول يقتله و هو نايم ، مخلي حياته جحيم ، الجواب كان عليه نقط من دموع فيتز مبللة الورقة ، في آخر ورقة و بخط نضيف و منظم كان فيه ملحوظة مهمة جدًا !!
قالي إن الشيطان زهق منه ، جه وقت إفتراقهم خلاص ، قالي كمان إن الشيطان قاله إزاي يتخلص من اللعنة ، الموضوع بسيط ، لازم يسلم اللعنة لشخص غيره ، عشان كده هو كتبلي ، كتبلي عشان ينقل ليا أنا اللعنة دي ، لكن عشان يموت و هو مرتاح هيقولي علي الطريقة عشان لو عاوز أنقل اللعنة لشخص غيري ، الموضوع بسيط أوي ، عشان تمرر اللعنة لشخص تاني لازم تسمح للشيطان إنه يدخل بيتك بإرادتك 3 مرات !!
الورقة إترعشت في إيدي و قلبي دق بخوف ، رفعت عيني للبوسطجي و لأول مرة شفت شكله الحقيقي ، كان عنده حق فيتز يخاف منه ، كان عنده حق !
