انا مبترعبش ، مبخفش ، مبقلقش لما اسمع جن وعفريت والكلام ده ، معترف بالجن اها مذكور ، بس ال اعرفه انه مبيئذيش غير ال يقربله ! ، وانا من عادتي مبحبش الغموض انا واحد في حالي ، لا بقرأ ، لا بسمع ، مبحاولش حتي اعرف عنهم اي حاجه ، اصلهم هيشغلوني ليه ، انا عارف اتعامل مع البشرية دي عشان اشوف ماوراء الطبيعة ؟ ابويا وامي ناس مثقافين ، متعلمين ودارسين كويس المشكلة الوحيدة هيا جدتي ،لما بتيجي تقضي معانا اسبوع الصيف ، كلمها كله عن السحر والاعمال واننا لازم ندبح ونبقي محصانين ، اي وقت فاضيه في بتبقي بتتكلم عن الحاجات دي كلام مقرف، الاسبوع ال بتيجي في البيت كله بيتغير ، كل حاجه بتسوء ! كلمتها المعتاده لو تحبه تعرفوها .. متقعدش في الصالون بليل !! متطفيش نور الحمام !! علي الكاسيت علي اذاعة القرأن الكريم ، موضوع مستفز ، ديما بتحاول تجيب سيرتهم ! انا مبخفش ومش هخاف .
.
الموضوع بدء وانا في الحمام من اسبوع من عادتي بحب اشغل تركات وانا باخد دش بس نسيت ان جدتي عندنا ، ديما امي تقولي غلط ، بس انا بقالي 8 سنين بعمل كده هاهاها مفيش حاجه يعني ، مره واحدة لقيت صوت جدتي برا بتقولي ، اطفي الاغاني ياعمرو ، لقيت جدتي برا بتخبط عليا بكل قوة وهيا بتقولي صوتهم وحش وهما بيغنوا معاك !! طلعت لقيتها بتكشر ، بكرهها ، انا ضحكت عليكوا انا بخاف من جدتي جدا ، بخاف من قلبة وشها دي !! شكلها مخيف ، لسه جي هقولها ياجدتي مفيش حاجه ، قالتلي انا قولتلك وحذرتك وانت مبتسمعش الكلام ! وسبتني ومشيت ! ، جديتي عنيفه جدا بتحاول تخوفني باي شكل ، ديما احاول ابان قوي قدمها ، مبقدرش ديما بضعف ، بتطفي الانوار كلها في البيت ، وتقعد في ركن في الصالون ! معرفش بتعمل ايه برقبها من بعيد ، هه بس بتعرف ، بتقولي خش اوضتك علي طول لاخليهم يئذوك ! بس يئذوني ازاي وانا معملتهمش اي حاجة .. !
.
من 3 ايام حولت الانتحار منها ! لما جت اوضتي وجايبه كتاب وبتقراء كلام معرفوش كان وشها وحش اوي !! عليه غضب ، انا معملتلهاش حاجه لكل ده ، انا حقيقي معملتلهاش حاجه ، هيا عارفه اني مبحبش الضلمة ، ومع ذلك بتبقي قاصده تضلم وتلف البيت كله بشمعة ! ، فكرت اقتلها ! من خوفي منها فكرت اقتلها ، بس بفشل ، بحس ان عليها حراسه ، مش بني ادمين ، بشوف جمبها ناس ! اها ناس بس كباار ، كبار اوي ..! بيحموها ، جدتي صعبة وست قادرة امي مبتقدرش تكلمها ، وابويا بيخاف منها ، اوقات بحس انها عقاب ، عقاب من ابويا وامي ليا ، اسوء كوابيسي كانت النهارده ، وانا بتشجع واقتلها ! ولقيت امي مسكتني من ايدي ، وابويا شدني وقالي كلام كتير كلام مش فاهمه ! بس خلاص كنت هقتلها من ال بتعمله فيا !
.
دكتور انا مش مجنون ، جدتي مامتش من 8 سنين زي مبيقولوا ، دكتور جدتي مجنونة ولازم تموت وانا مكنتش هقتل اختي ، ياما متجيش عندنا تاني ، انا عايز اروح ، انا عايز امشي من هنا واروح بتنا بس ميبقاش في جدتي
