مرات السكوت ونظرات العيون تحجي المنكدر نكولة....
كعدت الصبح بدلت ونزلت ماما وجدو كاعدين يتريكون صباح الخير.....
صباح النور....
تعاي اكلي شوية يومية تطلعين بدون اكل....
حبيبتي ماما والله مااشتهي مو تعرفين ما احب اكل الصبح.... ضلت تدردم جدو اشرلي اكلت شوية وبستها ها جدو نروح....
يلة باباتي بس اجيب سترتي...
طلعت الجو بي برودة وصوت العصافير جريت نفس قوي وشلت هم شلون رح اشوف خالد وشكول.... صعدت بالسيارة وجدو يضحك ويصنف علية ومشغل اغاني فيروز ولا عبالك ابوها لامي وصلنة للكلية وكف جدو شفت خالد ينزل من سيارتة هو واسامة....
شهودة هذا مو زميلج البارحة وصلج....
سويت نفسي ما منتبهة وينة ها اي جدو خالد...
سلمينة عليه خوش ولد....
يوصل جدو مو تنسى اليوم عفية مو تتاخر وميس ويانة...
ان شاءالله ديري بالج على نفسج..
بست جدو ونزلت صارت عيني بعين خالد صباح الخير...
صارت عيني بعينها سلمت علية رديت صباح الورد عالورد سلمت على جدها ودخلنة للكلية تمشينة للقسم شفت مصطفى وميس واكفين يسولفون شوفي طيور الحب....
يا طيور وينهم؟؟؟؟..
ههههههه هاي شبيج مصطفى وميس...
ها اي... عبالي صدك طيور
عوفيهم امشي نروح للكافتريا نشرب شي قبل المحاظرة..
اوكي.. صدك جدو يسلم عليك يكول عليك مبين خوش ولد....
الله يسلمة والله اني حبيتة لجدو سلميلي عليه وكوليلة خالد خوش ولد...
شربنة كهوة وصعدنة للقسم شافونة مصطفى وميس تعجبوا كعدنة على ستيج واحد وميس بقت تسال وين جنتوا...
كتبتلها عالورقة شفناكم واكفين وخالد كال منريد نضوجكم رحنة شرينة كهوة ورجعنا....
خلصت المحاظرة جانت اكثر من ساعتين حسيت راسي رح ينفجر بس اريد ادخن اول ما طلعت اخذت اسامة ومصطفى تمشينة دخنت وعيني عليها شلون يا ربي هاي شسويلها ولا عبالك اخاف ما سمعتني لا سمعت لان كالت شنو يا رب شلون....
خلصت المحاظرة نزلت اني وميس والولد ورانة كعدنة بالسنتر والولد تمشوا يدخنون وخالد عيونة علية كل ما ارفع راسي اشوفة يياوع عليه بس اني قررت ما افتح الموضوع ويا اذا هو كال شي احجي اذا بقى ساكت اني هم اضل ساكتة. المهم صعدنة للمحاظرة الاخيرة دخلناها بالكوة تعبانين واني جنت جوعانة بس اريد نخلص حتى نطلع للبيت.
شهد وميس ومصطفى دخلوا المحاظرة الاخيرة اني مالي خلك بقيت بالسنتر جانت اكو بنية اسمها مروة بالكلية ويانة لزكة كلش من اول ما دخلنة للكلية وهي تتلوكلي واني متعجبني هيج بنية خفيقة كاعدين نسولف اني واسامة جتي عليه...
