رجعت للبيت فرحان حتى نسيت اتعارك وية اسامة بس يلة خلاني اشوف شهد عمري امي تلكتني
ها شوية العقل عندك طارن...
اي والله يمة طيرتهن بنت رجاء...
بنت رجاء منو...
يوم شلون مرة مرمرة درة تنحط عالجرح يطيب.. عفتها اريد اصعد لغرفتي...
ولك تعال تعال هاي منو تعال احجيلي والله ترة اكول لابوك...
رجعت كعدت يمها تمددت بحضنها يمة شلوه بنية تخبل جنها گمر...
وانت شبيك عيني كل البنات تبوس ايديك...
شلوني اسمر اجلح ما ادري شافت بية...
ولك انت صدك تحجي هاي اول مرة اسمعك تحجي على بنية...
اي والله يمة صدك ابنج وكع ومحد سمه عليه بنية وياية بالكلية بنت ناس ومؤدبة وحلوة وفوك كل هذا تحبني وتخاف عليه والاهم متحملة خبالاتي...
يا يمة الولد راح مني..
هههه يمة تبقين انت الاصل انت مكانج بالگلب... سولف لامي على شهد شوية وعلى اهلها بعدين صعدت تمددت بفراشي وخليت صورتنة اني وياها اخذناها بالكلية على الميز كبالي وبقيت اباوع عليها...
رجعت للبيت ماما جانت بالحمام وجدو يباوع اخبار سلمت على جدو وصعدت بدلت نزلت شوية كعدت يم جدو سولفنة توسلت بي يجي ويانة لعمامي ما قبل طلعت ماما...
ها شهودة جيتي
اي ماما ومن زمان
حضرتي غراضج بعد باجر نطلع
لا بعدني باجر الصبح رح اروح يم خالة اخلاص شوية...
لا رح تجي تتعشى هنا هي والجهال خالج جاي..
صدك والله مشتاقة لخالو يلة نحضر العشة...
اجة خالو فدوة لعينة ما مبقي شي مجايية تعشينة وكعدنة سولفنة اشرت لخالة اخلاص اني رح اروح احضر شكم شغلة اخذهم وياية...
اوكي شهودة اجي وياج..
تعاي خالة حتى هم تشوفين غرفتي بدلت الديكور وماما جايتلي بردات جديدة...
صعدنة فوك وحجيت لخالة اخلاص كلشي...
شهد حبيبتي اني صديقتج بس ميصير يوصلج للبيت اذا احد شافج شلون...
مو على اساس سايق...
يا سايق هذا ماما سيارته اخر موديل حتى شكلة ما مبين سايق مبين ابن عز بعد ليوصلج للبيت حبيبتي...
ان شاءالله خالة وعد والله..
بقينة نسولف بعدين راحوا للبيت واني هيج طايرة من الفرح يا ناس والله احبة.
مرت يومين وباجر الصبح لازم نطلع للحلة على اهل بابا بالليل اخذت التلفون بغرفتي وخابرت على حبيبي...
رن التلفون اني جنت نايم بين الصاحي والنايم اسمع التلفون هذا الرقم جديد ماكو اي احد يعرفة بس اسامة وشهد رديت واني نايم الوو..
حبيبي نايم...
شهد؟؟؟
منو غيري يخابرك على هذا الرقم....
ماكو احد والله بس متعجب يعني متخابرين هيج وقت...
مو باجر اروح واريد احجي وياك..
لتذكريني والله ضايج اريد بس انام واكعد خلصان الاسبوع وانت راجعة.
حبيبي تعرف شكد احبك
شكد
بكد الدنيا كلها
الللللله بعد بعد كوليلها..
احبك والله احبك يا خالد وما احب واحد غيرك بس انت لاخر يوم بعمري.... بقيت اسولف ويا للصبح يعدين نمت ساعتين وماما كعدتني حتى نروح.
كمت بدلت عالسريع طبعا من نروح هناك لا مكياج ولا نفس هدومي اخلي شال على راسي وخالد فرح من كتلة هيج... طلعنة خالو وصلنة وراح للبصرة التحق خلصت اجازتة...
نزلنة لبيت جدي الكل رحب بينه والمفروض ثاني يوم الحنة اول يوم ما كدرت اخابر خالد بس ثاني يوم الصبح ماما كابت خابري على جدو طمني عليه خابرت جدو شوية وبعدين خابرت خالد طمنته شوية حجيت ما اكدر اطول...
صارت الحنة وكلهم كاعدين ويياعون عليه وعلى ماما ميحبوها يكولون بنت المدينة اخذت ابنه من عدنة... المهم ثاني يوم العرس وزفوا العرسان ورجعنة لبيت جدي عمي جان هم عسكري عندة ولد ثلاثة الجبير متزوج والثاني جان العرس مالتة والثالث اكبر مني سنة كاعدين نسولف ....
والله شهد كبرانة وصايرة حلوة.. ماما ردت شهد من يومها حلوة الله يرحمة المرحوم جان يكول الا تطلع تخبل وصدك جنها وردة...
الله يخليها يلة يوم نفرح بيها ناخذها لمنتظر..
اني كمزت من يمي يا منتظر هذا اني شكد احبهم بس ماما راسا ردت عليه لا عيني شهد متريد تزوج تريد تكمل كليتها وتتخرج تريد تاخذ دراسات عليا حتى تصير أساتذة بالجامعة قبل فترة خطبها استاذ يمهم وما قبلت.... اني صافنة على امي شعجب هيج حجت...
عمي سكت ولا حجاية حجة بعد...
بس اريد يجي وقت النوم رحنة للغرفة امي كالت مخبل هذا عمج. الشفتة منهم قليل حتى انطيج الهم ابوج راح وما راضي عليهم الله يرحمك .... مرت يومين خابرت خالد ضايج و متنحس اني ماكو بس من كتلة باجر نرجع فرح ثاني يوم الصبح رجعنة لبغداد عبالك ردتلي روحي يس قررت ما اكول لخالد على شغلة عمي حتى ليضوج...
العصر خابرتة بس طمنتة وكتلة بالليل اخابر.....
رجعنة للدوام ومرت السنة الثانية والثالثة بدون اي مشاكل مرات خبالاتة تطلع علية بس عادي تعلمت اصلا اذا ماكو خبالات اكول اكو شي غلط بالموضوع حياتي بالبيت عادية ماكو شي جديد... بالمرحلة الرابعة مصطفى خطب ميس وقرروا يتزوجون بالعطلة وصارت العطلة وتزوجوا وبقيت بوحدي بالخط....
المرحلة الخامسة ام المشاكل بعد امتحانات نصف وبيوم من الايام طلعوا خالد ومصطفى يجيبون كيكة لميس لان جان عيد ميلادها وبقيت وياها لان نريد نسويلها مفاجئة نزلنة جوة ونسيت ملازمي بالشعبة صعدت اجيبها ووكعت منها ورقة تهديد (اذا متجين يم المختبرات احجي وياج اسويلج فضيحة واخلي خالد يعوفج) باوعت يمنة يسرة ماكو احد خفت وعرفت هاي مهند بس شسوي ما اعرف اكول لخالد لو بس اروح واسوي خل لهذا العديم اخلاق.... اخر شي قررت اروح...
يومية من اوصل للكلبة اخلي محفظتي وغراضي كلها بجنطة شهد طلعت ونسيت اخذها رجعت عالسريع شفت ميس وحدها تعجبت ميس وين شهد...
راحت تجيب الملازم من فوك... هسة تجي انتظرها..
لا مستعجل اروحلها.. صعدت شعد ماكو بالشعبة تعجبت نزلت من الدرج الثاني وتمنين الله ماخذني ولا الشفتة شهد واكفة تحجي وية مهند.. ما اعرف شلون صبرت وما سويت كلشي بقيت انتظر واباوع عليها تحجي ويا وهو يضحك واني صرت اعصاب شفتها عافتة وراحت تخبلت بس تمالكت نفسي ورحت عليها جريتها من ايديها حيل امشي اوصلج للبيت...
رجعت شهد وجها مخطوف وشفت خالد وراها يمشي اول ما وصل يمها جرها حيل من ايديها وراحوا مشيت وراهم واحجي هاي شبيك خالد شبيكم شنو السالفة اوكف شهد شكو ماكو محد يجاوب طلعوا بطريق البارك ومصطفى واسامة واكفين شافوا الوضعية ركض اسامة عليهم خالد دفعة وجر شهد صعدوا بالسيارة وطلعوا ظلينة واحد يباوع عالثاني منعرف شكو اسامة اخذ مفتاح السيارة مال مصطفى صعدنة كلنة وطلعنة وراهم ماكو اختفوا....
عرفت خالد شافني وبعد ما كدرت احجي كلشي شيريد يسوي حقة صعدنة بالسيارة وطلعنة...
ولج بس فهميني ليش شسويتلج لج مو مثل الزمال صايرلج ولج تستغفليني وتروحين توكفين يمة...
خالد والله ..
اششش ولا كلمة دوام بالكلية ماكو بعد واذا بس فكرتي تدوامين اكص رجلج والله يلة انت بنت امج وابوج داومي وحسابج بعدين اشوفج منو خالد... تلعبين عليه اني صوجي امنت بيج وغيرت حياتي كلها علمود خلفتج ويا ريت لو تستاهلين والله يا شهد اذا بس فكرتي تطلعين من البيت متلومين الا نفسج وتلفونكم اليوم يتراقب اشوفج شلون لعبتي بالنار....
اني اسمع الحجي والوم نفسي شلون سويت بي هيجي وبكلبي اكول شلون تصدك هيج شي خالد وانت اكثر واحد تعرفني بس حقك شتحجي وتكول وتسوي بس شلون افهمة هو يحجي ويصيح ويغلط ويكفر وكلشي الف شغلة بوقت واحد طبعا يسوق سريع شوية شاف مرور ورانة لان يمشي سريع وكف على صفحة اجة المرور وبدون اي حجي بس انطاه الهوية المرور اعتذر وراح طلعنة بطريق بيتنة واني بس اريد احجي وما اكدر هو سكت بس مبين عصبي وصلني للبيت....
نزلي وبعد ما اريد اشوف خلقتج بحياتي كلها.....
باوعت عليه ما اعرف شحجي بس انطيتة الورقة الشفتها بالملازم ونزلت دخلت للبيت ماما جانت ما موجودة بس جدو شافني تعجب عفتة وصعدت فوك بقى يصيح عليه ما جاوبتة....
قبل متنزل خلت ورقة بحضني ونزلت شلتها وشمرتها بالسيارة شخطت السيارة وطلعت للبيت واني اتمنى الموت شلون هيج وليش بشنو قصرت وتجازيني هيج....
صعد جدو عليه شمرت نفسي بحضنة وبجيت بحركة وحجيت لجدو كلشي
كافي بابا ارتاحي هسة وبعدين لتحجين كلشي كدام امج خليني افكر شلون نتصرف كوليلها لامج مريضة ورجعتي ومتريدين تداومين....
رجعت للبيت شفت اسامة واكف بالباب هليت السيارة بنص الشارع ونزلت اسامة ما اريد اسوي مارثة عوفني ما اريد اشوف اي احد ولا اسمع اي شي....
