مرحبا اسمي شهد مواصفاتي متوسطة الطول شعري طويل عيوني عسلية بيضة وجسمي متناسق.
بابا جان عسكري استشهد بحرب ايران عمري بوقتها كان اقل السنتين، ماما معلمة.
بعد استشهاد بابا ماما ما كدرت تعيش وحدها بالبيت اجرت بيتنة ورجعت لبيت اهلها، اهل بابا جانت حالتهم كلش زينة املاك وبساتين طلبوا من ماما تزوج عمي بس ماما رفضت طلبهم شرطوا عليها اذا تزوج ياخذوني منها.
ماما اصلا ما جانت مفكرة تزوج لان جانت تحب بابا كلش وحتى تحافظ عليه.
اهل ماما عبارة عن جدو علي وبيبي سعاد، عندي خال واحد عسكري متزوج وكاعد بمشتمل يم بيت جدو زوجة خالي (خالة اخلاص) تصير بنت عمة ماما.
جدو جان عسكري يجي بالشهر مرة يبقى اسبوع بيبي ربة بيت.
من ماما تروح للدوام اني ابقى يم بيبي تكعدني يمها بالمطبخ وتظل تسولفلي وتحجيلي قصص هي وتشتغل جدو من يرجع باجازة ميخلي شي ميسوي ابد ما خلوني احس ما عندي اب.
كبرت وتسجلت بالمدرسة نفس المكان الماما تداوم بي جنت شاطرة وعاقلة ما ينسمع صوتي لا بالمدرسة ولا بالبيت اكمل واجباتي واكعد العب عندي لعابات بببي علمتني اخيطلهم هدوم.
اهل بابا كل فترة يمرون علينة ومرات احنة نروح يمهم علمود نشوف بيبي ام بابا جدي جان متوفي، بيبي توفت بعد سنتين من استشهاد بابا بعد ما رحنة عليهم بقوا عمامي كل فترة يمرون علينة يجيبولي ملاعيب وحلويات ومن هالسوالف بس اني ابد ما احبهم من ماما تكول رح يجون اضوج مرات اسوي نفسي نايمة بس لا مفر لازم اشوفهم.
كبرت وصرت بالمتوسطة بيبي سعاد تمرضت صارت عندها جلطة بالدماغ ضلت كل فترة تتخربط وياخذوها للمستشفى ماما تبقى يمها واني ابقى يم خالة اخلاص جانت مثل صديقتي كلش حبابة وتحبني عندها ولد اثنين اصغر مني.
بيوم من الايام بيبي تخربطت اخذوها للمستشفى بنفس اليوم ساعة 2:30 الصبح رن التلفون الارضي ورد خالي وكام يبجي عرفنة بيبي توفت سوينة فاتحة والعالم تجي وتروح اصدقاء جدو والمعلمات صديقات ماما والكرايب والجوارين واصدقاء خالو كلش هواية ناس.
مرت الايام جدو تعب بعد وفاة بيبي طلع تقاعد من الجيش وكعد بالبيت مرات جنت اشوفة بالغرفة يباوع على صورة بيبي ويحجي وياها.
ماما زادت مسؤوليتها بين البيت والمدرسة واني وجدو بس ضلت تسولفلي على بابا وتشوفني صور ودائما تكول جان يريدج تصيرين دكتورة كل فترة نروح نزور قبره حبيتة بدون ما اشوفة من حب امي واخلاصها ووعدت نفسي ووعدت ماما اذا الله راد احقق امنية بابا.
مرت السنين وصرت بالسادس اعدادي امتحنت الامتحانات النهائية وجاوبت كلش زين طلعت النتائج وطلعت معدل عالي وقدمت على المجموعة الطبية والحمد لله انقبلت كلية الطب جامعة بغداد كملت معاملتي وبديت اداوم جدو يوديني ويرجع ياخذني بين ما اشوف خط.
تعرفت على بنية وياية بالشعبة كلش حبابة ونفس طبعي والاهم بيتهم بنفس منطقتنة الحمد لله صديق اخوها خوش ولد امين وابن ناس ماخذها خط ويريد بعد طلاب وياها كلت لماما وقنعت الحمد لله سجلت وياهم بالخط.
ماما تخاف علية كلش وبنفس الوقت قاسية علية تريد كلشي بنظام وبحدود والغلط مرفوض بكل اشكالة.
اول ايام بالكلية عادي كلشي ماكو بالاسبوع الثالث قرروا يسون حفلة تعارف جنت شايلة هم لان اني خجولة كلش ومن احجي خدودي تصير حمرة.
اكو ولد اثنين ويانة بالشعبة مو مثل باقي الطلاب كلش ثكال ومرتبين ومحترمين واحد منهم سمعت والدة مسؤول بالدولة وجان دائما ولد ويا يكولون الحماية مالتة...
ميس بعكسي تحب تضحك وتشاقة مو خجولة مثلي....
ميوسة يصير منروح للحفلة..
انت صدك تحجين لا عفية شهد اريد اروح اريد اعرف هذا الولد شنو منو وليش هذا اليمشي وية ابن المسؤول كلش حلو....
هههههه والله خوش اسم ابن المسؤول امشي عيني امشي نشوف تاليتج شلونها..
دخلنة للقاعة الكل متحضرين بدوا بالتسلسل يعرفون على نفسهم ووصل الدور الي جريت نفس عميق ووكفت على حيلي كلت اسمي وعمري وين ساكنة وهواياتي وهدفي بالحياه ووصلنة لمرحلة الاسئلة سالوني قسم من الطلاب، قبل ما ارجع سمع صوت خشن وعالي من نهاية القاعة ( اذا احد حب يصارحج شنو ردة فعلج تكون).... رفعت راسي شفت ابن المسؤول حتى ما اعرف اسمه الكل تعجب من السوال وانداروا عليه كان كاعد وساكت ابد ما سال اي احد اني الصراحة تعجبت وما متوقعة احد يسالني هيج سؤال جريت نفس....
ما اعرف شنو اسمك؟.....
خالد....
اهلا خالد بالنسبة لسؤالك جوابي اني هنا حتى ادرس واخذ شهادة مو حتى انتظر احد يصارحني جوابي يكون الرفض...
صارت عيني بعينة نظراتة جانت حادة ووجه معبس حسيت يريد ياكلني بنظراته....
شكرا شهد....
العفو...
خلصت الحفلة طلعنة للكافتريا اني وميس ننصف وحدة عالثانية وعلى باقي الطلاب اخذنة اكل وكعدنة ناكل ونسولف على سؤال خالد اني كاعدة وظهري على الباب مال كافتيريا وميس وجها عالباب..
شهد اكو ناس جايين علينة لتديرين وجهج بس اتحضري.....
منو تتوقعون راح على شهد؟؟؟؟؟
